మెగా బ్రదర్ నాగబాబు ఇప్పుడంటే మంచి స్థాయిలో ఉన్నాడు కానీ ఒకప్పుడు ఆర్ధికంగా నిలదొక్కుకోవడానికి చాలా కష్టాలు పడ్డారు. అటు మెగాస్టార్ చిరంజీవి, ఇటు పవర్ స్టార్ పవన్ కళ్యాణ్ ఇద్దరూ కూడా సినిమాల్లో టాప్ స్థాయిలో కొనసాగుతున్నా కానీ నాగబాబు ఒకప్పుడు ఆర్ధికంగా చితికిపోయారు.
ముఖ్యంగా నిర్మాతగా మారాక ఆయన చేతులు కాల్చుకోవాల్సిన పరిస్థితులు చాలానే వచ్చాయి. అంజనా ప్రొడక్షన్స్ పేరిట నాగబాబు సినిమాలు నిర్మించాడు. రామ్ చరణ్ హీరోగా నిర్మించిన ఆరెంజ్ సినిమా డిజాస్టర్ గా మిగలడమే కాకుండా నాగబాబును పీకల్లోతు అప్పుల్లో తోసేసింది. అయితే ఆ తర్వాత చిరంజీవి, పవన్ కళ్యాణ్ ఆదుకోవడంలో అప్పుల్లోనుండి బయటపడ్డాడు.
ఇక ఆ తర్వాత నెమ్మదిగా జబర్దస్త్ షో, సినిమాల్లో పాత్రలు, సీరియల్స్ నాగబాబును ఆర్ధికంగా నిలదొక్కుకునేలా చేసాయి. మరోవైపు నాగబాబు కొడుకు వరుణ్ తేజ్ కూడా హీరోగా స్థిరపడి తనకంటూ మార్కెట్ ను సంపాదించుకున్నాడు. ఇటీవలే నాగబాబు ఒక యూట్యూబ్ వీడియోలో డబ్బు విలువ గురించి చెప్పాడు. దానికి సంబంధించిన ప్రోమో చాలా ఆసక్తికరంగా ఉంది.
ఒకానొక సమయంలో నా అప్పులు ఎంతో చూసుకోవడానికి భయం వేసేది కూడా. డబ్బుతో అనుబంధాలు కొలవలేం అని అంటారు అందరూ. కానీ అది సోది మాటలే. డబ్బు సంపాదించడం అనేది చాలా గ్రేట్ పని. అదొక ఆర్ట్. నేను ఒకడ్ని నమ్మాను. అంతా వాడే చూస్తూ ఉంటాడనుకున్నాను. అయితే ఆ తర్వాత ఎంత దెబ్బతిన్నానో నాకు మాత్రమే తెలుసు. డబ్బు సంపాదించడం అనేది చాలా గొప్ప విషయం. ప్రతీ మనిషి డబ్బు సంపాదించగలడు. చేతులు, కాళ్ళు లేని వ్యక్తి కూడా డబ్బులు సంపాదించగలడు. అది ఎలా అంటే? అన్న దగ్గర ప్రోమోను ఆపేసారు. పూర్తి వివరాలు ఫుల్ వీడియోలో ఉంటాయి. మరి అందులో ఎలాంటి వివరాలను చెబుతాడో చూడాలి.