Pokiri: పోకిరి Pokiri ఇండస్ట్రీలో గేమ్ చేంజర్ లాంటి హిట్స్ అప్పుడప్పుడూ వస్తూంటాయి. హీరో ఇమేజ్, దర్శకుడి క్రేజ్ ను ఆకాశమంత ఎత్తుకు తీసుకెళ్తాయి. ఇండస్ట్రీలో సరికొత్త బాటకు పునాది వేస్తాయి. అటువంటి సినిమాలకు టాలీవుడ్ లో కొదవ లేదు. అలా వచ్చిన సినిమాల్లో సరికొత్త రికార్డులతో ఇండస్ట్రీ గేమ్ చేంజర్ గా మారిన సినిమా ‘పోకిరి’. మహేశ్-పూరి.. ఇద్దరి కెరీర్లు పోకిరికి ముందు ఆ తర్వాత అనేంతగా మారిపోయాయి. సినిమా సృష్టించిన రికార్డులకు ఇండస్ట్రీ షేక్ అయిపోయింది. పూరి మార్క్ మేకింగ్.. మహేశ్ స్టైలిష్ యాక్టింగ్ సినిమాను సరికొత్త రికార్డులతో ఇండస్ట్రీ హిట్ గా మార్చేసింది. 2006 ఏప్రిల్ 28న విడుదలైన ఈ సినిమా నేటితో 15 ఏళ్లు పూర్తయ్యాయి. ఈ సందర్భంగా అభిమానులు సంబరాలు చేసుకుంటున్నారు.
కధను స్పష్టంగా, డైలాగులను సూటిగా చెప్పడంలో పూరి స్పెషలిస్ట్. ఈ సినిమా ద్వారా కొత్త మహేశ్ ను పరిచయం చేశాడు. మహేశ్ ను స్టైలిష్, యాక్షన్ మోడ్ లో, మాసివ్ లుక్ లో కొత్తగా చూపించాడు. సరికొత్త హెయిర్ స్టయిల్ తో మహేశ్ లుక్, ఇలియానా అందం.. ఇద్దరి కెమిస్ట్రీ సినిమాకు మంచి ఫ్లేవర్ అద్దింది. ‘ఎవడు కొడితే దిమ్మ తిరిగి మైండ్ బ్లాక్ అయిపోద్దో ఆడే పండుగాడు’ అనే డైలాగ్ సినిమాలో డైనమైట్ లా పేలింది. ‘సినిమాలు చూడట్లేదేంటి..’ అంటూ గన్ తిప్పుతూ చెప్పే స్టయిల్ కు ప్రేక్షకులను ఫిదా చేసేశాయి. పూరి స్క్రీన్ ప్లే, టేకింగ్ సినిమాకు మేజర్ ఎస్సెట్. ప్రీ క్లైమాక్స్ లో సస్పెన్స్ రివీల్ చేసినప్పుడు ప్రేక్షకుల్లో పిన్ డ్రాప్ సైలెన్స్ అయిపోతారు.
మహేశ్ లోని మాస్ యాంగిల్, పూరి సరికొత్త టేకింగ్ సినిమాను ఇండస్ట్రీ హిట్ అయ్యేలా చేసాయి. బ్రహ్మానందం-ఆలీ-వేనుమాధవ్ కామెడీ ట్రాక్, మణిశర్మ సంగీతం సినిమాకు ప్లస్ అయ్యాయి. అన్ని భాషల్లో కలిపి 200 కోట్లు బిజినెస్ చేసిందీ సినిమా. 200 సెంటర్లలో 100, 63 సెంటర్లలో 175, షిఫ్టులతో 200 రన్ అయింది. కర్నూలులో షిఫ్టులతో 500 రోజులు రన్ అయి.. పూరి-మహేశ్ కెరీర్లో మెమరబుల్ హిట్ గా నిలిచింది. మహేశ్ సోదరి ఇందిర, వైష్ణో అకాడమీ పై పూరి సంయుక్తంగా ఈ సినిమా నిర్మించారు.
