Vibhore Steel Listing: స్టీల్ పైపుల తయారీ సంస్థ విభోర్ స్టీల్ ట్యూబ్ షేర్లు ప్రారంభంలోనే అదరగొట్టాయి. గత వారం ఐపీఓ సబ్ స్క్రిప్షన్ ప్రక్రియ పూర్తి చేసుకున్న విభోర్ స్టీల్ ట్యూబ్స్ లిమిటెడ్ షేర్లు ఇవేళ స్టాక్ ఎక్స్ఛేంజీలో నమోదయ్యాయి. ఇష్యూ ధరతో పోలిస్తే మదుపర్లకు 181 శాతం వరకు లాభాన్ని ఇచ్చాయి.
ఐపీఓలో ఇష్యూ ధర రూ.151 కాగా.. ఎన్ఎస్ఈలో ఈ షేరు 181.46 శాతం లాభంతో రూ.425 దగ్గర లిస్టయ్యింది. బీఎస్ఈలో 178.81 శాతం పుంజుకొని రూ.421 దగ్గర ట్రేడింగ్ ప్రారంభించింది. తర్వాత షేరు విలువ 192.72 శాతం పెరిగి రూ.442 దగ్గర అప్పర్ సర్క్యూట్ ని తాకింది. ఐపీఓలో కనీసం రూ.14.949తో 99 షేర్లు (ఒక లాబ్) సబ్ స్క్రైబ్ చేసుకోవాలని విభోర్ స్టీల్ ట్యూబ్స్ నిర్దేశించింది. దీంతో లిస్టింగ్ లో మదుపర్లు ఒక్కో లాబ్ పై రూ.27.126 లాభాన్ని పొందారు. అప్పర్ సర్క్యూట్ వద్ద రూ.28.809 ఆర్జించినట్లు అయ్యింది.
లిస్టింగ్ లో కంపెనీ మార్కెట్ విలువ బీఎస్ఈలో రూ.838.14 కోట్లుగా నమోదైంది. ఈ ఐపీఓ ఫిబ్రవరి 13-15 మధ్య జరిగింది. షేర్ల ధరల శ్రేణి రూ.141 -151గా నిర్ణయించారు. ఐపీఓ ద్వారా సమీకరించిన నిధులను నిర్వహణ మూలధనం, సాధారణ కార్పోరేట్ అవసరాలకు వినియోగించనున్నట్లు విభోర్ స్టీల్ ట్యూబ్స్ తెలిపింది. ఈ కంపెనీ భారీ ఇంజనీరింగ్ పరిశ్రమల్లో ఉపయోగించే అత్యున్నత నాణ్యత కలిగిన స్టీల్ ట్యూబులు, పైపులు తయారు చేస్తుంటుంది. చమురు, నీరు, గ్యాస్ సరఫరా చేసే వాటితో పాటు వ్యవసాయ అవసరాల కోసం వినియోగించే పైపులను కూడా అందిస్తుంది.