ఇటీవల సూపర్ స్టార్ రజినీకాంత్ చేసిన ప్రకటనతో ఆయన అభిమానులు ఎంతో నిరాశచెందారు. ఆయన రాజకీయాలలోకి వస్తారని ఎంతగానో ఎదురుచూసిన ఆయన అభిమానులకు ఎదురుదెబ్బ తగిలింది. ఇంకేముంది ఆయన రాజకీయాలలోకి వచ్చేస్తారు అనుకున్న సమయంలో అంతకు రెట్టింపు వేగంతో వెనక్కి వెళ్లిపోయారు. ఇందుకు క్షమాపణ కోరుతూ ఆయన తన అభిమానులకు ఒక బహిరంగ లేఖను రాసారు. ఒకవేళ రజిని రాజకీయాలలోకి వస్తే అన్న విషయమై ఇప్పటికే, ఎప్పటినుంచో తమిళ రాజకీయాల్లో పాతుకుపోయిన వారితోపాటు ఈ మధ్యనే వచ్చినవారు మరియు త్వరలో రావాలనుకుంటున్న వారందరూ తమ వ్యూహాలు రచించుకున్నారు.
ఎంజీఆర్ జయంతి సందర్భంగా జనవరి 17న రజనీ పార్టీని ప్రకటించడానికి సిద్ధమయ్యారు. ఈ క్రమంలో తాను ప్రస్తుతం నటిస్తున్న ‘అన్నాత్తే’ సినిమాను త్వరగా ముగించి పార్టీ కి సంబంధించిన పనులలో నిమగ్నం అవ్వాలని రజనీ ప్లాన్ చేసుకున్నారట. ఈ క్రమంలో హైదరాబాద్ లో ఈ సినిమా షూటింగ్ మొన్నటి వరకూ శరవేగంగా సాగింది. కానీ అనుకోకుండా ఈ సినిమా షూటింగ్ సమయంలో రజనీ అనారోగ్యానికి గురవ్వడంతో హుటాహుటిన ఆయన్ను అపోలో ఆసుపత్రికి తరలించారు. రజనీ అక్కడ నుంచి డిశ్చార్జ్ అయిన తరువాత ప్రత్యేక విమానంలో చెన్నై వెళ్లిపోయారు. ఆ తరువాతే రజనీ ఎవ్వరూ ఊహించని ప్రకటన చేశారు.
ఇదిలా ఉండగా ఇంకొకపక్కన ఈ పరిస్థితి మొత్తాన్ని తనకు అనువుగా మార్చుకునేందుకు ప్రయత్నిస్తున్నారట ఇళయతలపతి విజయ్. ప్రస్తుతం తమిళ రాజకీయాలలో ఇదే హాట్ టాపిక్ గా మారింది. ఇప్పటికే విజయ్ త్వరలో జరగబోయే తమిళనాడు అసెంబ్లీ ఎన్నికల్లో పోటీచేసేందుకు సిద్దమవుతున్నారన్న వార్తలు వినిపిస్తున్నాయి. విజయ్ ఈ విషయమై ఇప్పటికే తన అభిమాన సంఘం అయిన ‘మక్కల్ ఇయక్కం’ నిర్వాహకులతో సమావేశమయ్యారట. ఆ సమయంలో విజయ్ మాట్లాడుతూ ‘అభిమానులు తొందరపడొద్దు. వేచి చూద్దాం’ అని చెప్పారట.