Kodali Nani : ఒక సెక్షన్ మీడియా ఆనందం గంటల వ్యవధిలో ఆవిరైపోయింది!
కృష్ణాజిల్లా పెదపారుపూడి మండలం యలమర్రు గ్రామపంచాయతీలో టిడిపి అభ్యర్థి సర్పంచ్ గా గెలవడాన్ని ఆ మీడియా భూతద్దంలో చూపి ఇది రాష్ట్ర మంత్రి కొడాలి నాని స్వగ్రామమని ఆయనకు అక్కడ ఎదురుదెబ్బ తగిలిందని విపరీత ప్రచారం చేసింది.అయితే ఆదివారం నాడు ఆ గ్రామ సర్పంచ్ గా ఎన్నికైన టిడిపి మద్దతుదారు అనూష అసలు తన ఎన్నికకు మంత్రి కొడాలి నాని కి సంబంధమే లేదని తేల్చి చెప్పేశారు.అసలు ఎలమర్రు కొడాలి నాని స్వగ్రామమే కాదని కూడా ఆమె తేల్చేశారు.దీంతో కొడాలి నానికి వ్యతిరేకంగా ప్రచారం చేసిన మీడియా ముఖ౦ దాచుకోవాల్సిన పరిస్థితి తలెత్తింది వివరాల్లోకి వెళితే ..
Kodali Nani : టీడీపీ ఘన విజయం!
యలమర్రు పంచాయతీలో టీడీపీ మద్దతు ఇచ్చిన సర్పంచ్ అభ్యర్థి కొల్లూరి అనూష 271 ఓట్ల మెజారిటీతో గెలిచారు. 12 వార్డుల్లో 11 టీడీపీ మద్దతుదారులే సొంతం చేసుకున్నారు. మిగిలిన ఒక్క వార్డులోనూ వైసీపీ మద్దతు పలికిన అభ్యర్థి కేవలం ఒక్క ఓటు తేడాతో గెలవడం గమనార్హం. ఈ గెలుపుపై టీడీపీ కార్యకర్తలు, అభిమానులు సోషల్ మీడియా వేదికగా పెద్ద ఎత్తున చర్చించుకుంటున్నారు. నిజంగా ఇది నానికి ఊహించని షాక్ అని కొందరు టీడీపీ వీరాభిమానులు కామెంట్ల వర్షం కురిపిస్తున్నారు.
Kodali Nani : షాక్ ఇచ్చిన సర్పంచ్ అనూష!
ఈ నేపథ్యంలో అనూష పత్రికాముఖంగా స్పందించారు.మంత్రి కొడాలి నాని స్వంత గ్రామంలో వైసీపీకి ఎదురు దెబ్బ అని కొన్ని మీడియాల లో వచ్చిన వార్తలను ఆమె ఖండించారు. శనివారం రాత్రి నుండి కొన్ని మీడియాలలో వచ్చిన వార్తలు అవాస్తమని పేర్కొన్నారు. మంత్రి కొడాలి నానిది గుడివాడ నియోజకవర్గమని.. తమ గ్రామం యలమర్రు పామర్రు నియోజకవర్గంలో ఉందని ఆమె చెప్పారు. తమ గ్రామంలో మంత్రి కొడాలి నాని ఎటువంటి రాజకీయాలు చేయ్యలేదని వెల్లడించారు. గ్రామస్తుల అండదండలతో గెలిచానని.. రాజకీయాలకు అతీతంగా అందరి సహకారంతో గ్రామ అభివృద్ధి చేసుకుంటామని నూతన సర్పంచ్‌గా ఎన్నికైన అనూష తెలిపారు.
యలమర్రు నా ఊరే కాదు:మంత్రి నాని!
మరోవైపు మంత్రి కొడాలి నాని కూడా ఈ ప్రచారంపై స్పందించారు. యలమర్రు తన పూర్వికులదని.. తన తండ్రి, తాను గుడివాడలోనే పుట్టామని స్పష్టం చేశారు. యలమర్రు పాలిటిక్స్ తనకు తెలియవని.. ఒకవేళ అక్కడ తాను ప్రచారం చేసినట్లు నిరూపిస్తే రాజకీయ సన్యాయం చేస్తానని సవాల్ విసిరారు. 21 తర్వాత వాస్తవాలను మీడియాతో వెల్లడిస్తానన్న కొడాలి నాని.. అప్పుడు అసలు లెక్కలు తేలుతాయన్నారు.