Nara Family: నారా ఫ్యామిలీ Nara Family దేశంలో కరోనా పరిస్థితులు అల్లకల్లోలం రేపుతున్నాయి. దాదాపు దేశంలో ప్రతిచోటా లాక్ డౌన్ నిబంధనలు కొనసాగుతున్నాయి. పరమిత సమయం దాటితే ఎవరూ రోడ్లపైకి వచ్చేందుకు వీల్లేదు. కరోనా తీవ్రతకు అటు ఏపీలో కర్ఫ్యూ, ఇటు తెలంగాణలో కూడా లాక్ డౌన్ అమల్లో ఉంది. ఎవరైనా సరే.. అత్యవసర పనులుంటేనే బయటకు రావాలని స్పష్టమైన ఆదేశాలు ఉన్నాయి. దీంతో రెండు రాష్ట్రాల్లోనూ పోలీసులు పక్కాగా నిబంధనలు అమలు చేస్తున్నారు. ఈక్రమంలో హైదరాబాద్ పోలీసులకు వింత అనుభవం ఎదురైంది. అది కూడా ఒక ఐడీ కార్డును చూడటం ద్వారా..!
రోజూలానే మే 21న శుక్రవారం ఉదయం పది గంటల తర్వాత లాక్ డౌన్ నిబంధనలు మొదలయ్యాయి. అన్నిచోట్లాలానే జూబ్లీహిల్స్ ప్రాంతంలో కూడా పోలీసులు గస్తీలో ఉన్నారు. ఈక్రమంలో రోడ్డు నెంబరు 36, నీరూస్ చౌరస్తాలో ఓ టూ వీలర్ పై ఒక వ్యక్తి రావడం గమనించి పోలీసులు ఆపారు. పోలీసుల ప్రశ్నలకు ఆ వ్యక్తి జవాబిస్తూ.. తనకు బయటకు వెళ్లేందుకు పర్మిషన్ ఉందని చెప్పి.. తన జేబులో నుంచి ఒక ఐడీ కార్డు తీసి పోలీసులకు చూపాడు. ఆ ఐడీ కార్డును చూసిన పోలీసులకు దానిపై ‘నారా ఫ్యామిలీ పర్సనల్ ప్రొటెక్షన్ గ్రూప్’ పేరుతో ప్రింటై ఉండటం గమనించారు. దానిపై ‘జాషువా’ అని పేరు ఉంది. ఇది ఎవరిచ్చారు? ఎక్కడిది? అని ప్రశ్నించారు పోలీసులు.
చంద్రబాబునాయుడు ఇంట్లో పని చేస్తున్న చాలామంది సిబ్బందికి ఇవే కార్డులు ఉన్నాయని వ్యక్తి సమాధానం ఇచ్చినట్టు సమాచారం. విషయంపై ఆరా తీశారు పోలీసులు. ఈ కార్డుకు ప్రభుత్వ ధ్రువీకరణ లేదు. కేవలం ప్రైవేటుగా ముద్రించిన కార్డుగా పోలీసులు గుర్తించారు. దీంతో లాక్ డౌన్ వేళ నిబంధనలకు విరుద్ధంగా బయటకు వచ్చిందనకు.. ఆ వ్యక్తికి ఫైన్ వేసి కేసు నమోదు చేశారు. అయితే.. ‘నారా ఫ్యామిలీ పర్సనల్ ప్రొటెక్షన్ గ్రూపు’ అనే ప్రైవేటు కార్డు ఎవరి పర్సనల్ అయినా కావొచ్చు.. కానీ ఇలా పబ్లిగ్గా, అధికారం ఉన్నట్టుగా చూపడం విడ్డూరమనే చెప్పాలి..!