ఆంధ్రప్రదేశ్ రాష్ట్ర ముఖ్యమంత్రి జగన్ పరిపాలన మొదలై ఏడాది అయిన సందర్భంగా కొద్ది రోజుల ముందు రాష్ట్ర వ్యాప్తంగా అందరూ అతని పాలన పై విశ్లేషణలు చేసి చివరికి దాదాపు ప్రశంసలే కురిపించారు. జగన్ ముందుచూపు గల నాయకుడని మరియు సమర్థవంతమైన నాయకత్వ లక్షణాలు ఉన్నాయని పదేపదే ప్రశంసల వర్షం కురుస్తోంది. అయితే ఎంతో విడ్డూరంగా జగన్ ను అటు నిపుణులు, విశ్లేషకులు మరియు ప్రజలు పొగుడుతుంటే సొంత పార్టీ నాయకులు మాత్రం తీవ్ర అసహనం వ్యక్తం చేస్తున్నారు. ముఖ్యంగా ఎమ్మెల్యేలు మరియు ఎంపీలకు జగన్ ను కలిసి తమ గోడు వెళ్లబోసుకుననే అవకాశమే దొరకడం లేదట.
మనం గమనించినట్లైతే వైఎస్సార్ కాంగ్రెస్ పార్టీ అధికారంలోకి వచ్చిన సంవత్సరంలో ఇప్పటికే చాలా మంది ఎమ్మెల్యేలు సొంతపార్టీ పైన విమర్శలు గుప్పించారు. సారా విషయంలో స్పీకర్ తమ్మినేని సీతారాం, ఇసుక విషయంలో బ్రహ్మనాయుడు, నీటి విషయంలో మహీధర్రెడ్డి ప్రభుత్వం తీరుపై అసంతృప్తి వ్యక్తం చేశారు. తాజాగా ఈ జాబితాలోకి సీనియర్ రాజకీయ నాయకుడు ఆనం రామనారాయణ రెడ్డి కూడా చేరిన విషయం తెలిసిందే. చాలా సెన్సేషనల్ రీతి లో ఆనం తన సొంత నియోజకవర్గమైన వెంకటగిరికి ఇప్పటివరకు తాను అధికారంలో ఉండి ఏమి చేయలేక పోయానని ఆవేదన వ్యక్తం చేశారు. అంతేకాకుండా రాష్ట్ర మంత్రిత్వ శాఖలో ఉన్న మంత్రులపై మరియు అధికారులపై విపరీతమైన విమర్శలకు దిగారు.
ఇకపోతే నియోజకవర్గాలకు సంబంధించిన అభివృద్ధి పనులపై ముఖ్యమంత్రి చర్చించే అవకాశం లేకుండా పోతుందని పార్టీ నాయకులు వాపోతుండగా గతంలో టిడిపి ప్రభుత్వంలో కూడా చంద్రబాబు ఇలాగే వ్యవహరించాలని మరియు జగన్ కూడా ఆ బాటలోనే నడుస్తున్నారని వైసిపి నాయకులు ఆవేదన వ్యక్తం చేస్తున్నారు. అయితే జగన్ సంక్షేమ పథకాలు మరియు ఎన్నో కీలక నిర్ణయాలు తీసుకుంటూ బిజీగా గడుపుతున్నారని…. ఇక ఈ కరోనా సంక్షోభం వల్ల అతనికి అస్సలు సమయం ఉండడం లేదని లోపలి మాట.
కానీ ఎవరైనా ఇంట గెలిచి రచ్చ గెలవమన్నారు కాబట్టి ఇప్పటికే గళమెత్తిన కొంతమంది ఎమ్మెల్యేలు మరియు ఎంపీలకు ఫోన్ లోనే సర్ది చెప్పిన జగన్ త్వరలోనే ఒక అత్యవసర మీటింగ్ ఏర్పాటు చేయనున్నారని వార్తలు బయటకు వచ్చాయి. ఎవరైతే బహిరంగంగా పార్టీ తీరుపై అసహనం వ్యక్తం చేశారో వారితో మరియు పార్టీ హైకమాండ్ కేడర్ లో ఉన్న ముఖ్యమైన నేతలతో ఒక మీటింగ్ ఏర్పాటు చేసి రానున్న రోజుల్లో జరపవలసిన భవిష్యత్తు కార్యాచరణపై జగన్ ఒక ఉన్నత స్థాయి సమావేశం ఏర్పాటు చేసి కీలక నిర్ణయాలు తీసుకున్నారట.. మరి ఇదైనా పార్టీ నేతలను శాంతింపజేస్తుందో లేదో చూడాలి మరి.