ఇటివల సినిమాల్లో బయోపిక్స్ ఎక్కువగా వస్తున్నాయి. ప్రముఖుల జీవితాల్లోని సంఘటనల ఆధారంగా సినిమాలు వస్తున్నాయి. అయితే.. వీటిలో హిట్ అవుతున్నవీ.. ఫ్లాప్ అవుతున్న సినిమాలు కూడా ఉన్నాయి. బాలీవుడ్ లో ఎక్కువగా బయోపిక్స్ తెరెకెక్కుతూ ఉంటాయి. ఇప్పుడు దక్షిణాదిలో కూడా బయోపిక్స్ వస్తున్నాయి. రీసెంట్ టైమ్స్ లో ‘మహానటి’ సావిత్రి బయోపిక్ సృష్టించిన సంచలనం అంతా ఇంతా కాదు. ఇప్పుడు తమిళ్ లో తెరకెక్కిన ‘ఆకాశమే నీ హద్దురా’ కూడా సంచలనం రేపుతోంది. ఎయిర్ డెక్కన్ ఫౌండర్ జీఆర్ గోపీనాధ్ బయోపిక్ గా ఈ సినిమా తెరకెక్కింది. ఈ సినిమాపై ఆయన స్పందించారు.
‘సినిమా అద్భుతంగా ఉంది. నేను పడ్డ కష్టం, ఇస్టం బాగా చూపించారు. నా కుటుంబం పడ్డ కష్లాల్నీ చూపారు. జ్ఞాపకాలు అన్నీ మెదిలాయి. సినిమాపరంగా కాస్త స్వేచ్ఛ ఎక్కువగా తీసుకున్నారు. కాస్త ఫిక్షన్ జోడించినా మెయిన్ పాయింట్ ను అద్భుతంగా తెరకెక్కించి సినిమా అద్భుతంగా తెరకెక్కించారు. ఈ విషయంలో దర్శకురాలు సుధా కొంగరను అభినందిస్తున్నాను. సూర్య నా పాత్రను పోషించిన తీరు అద్భుతం. పాత్రకు పూర్తి న్యాయం చేశాడు. నా భార్య పాత్రలో నటించిన అపర్ణ కూడా అద్భుతంగా నటించింది. గ్రామీణ నేపథ్యం ఉన్న మహిళల ఆలోచనలు, అంకితభావం.. ఎంత శక్తివంతంగా ఉంటాయో చూపించారు. సినిమా చూసి ఎంతో భావోద్వేగానికి గురయ్యాను’ అని తన ట్విట్టర్ అకౌంట్ లో రాసుకొచ్చారు.
బయోపిక్స్ ను తెరకెక్కించే సమయంలో తీసుకోవాల్సిన జాగ్రత్తలను సుధా కంగర తీసుకున్నారు. కాస్త ఫిక్షన్ జోడించినా అసలు కథ దారి తప్పకుండా చూసుకోవడం ముఖ్యం. కొన్ని సినిమాలు బయోపిక్స్ గా తెరకెక్కినా అసలు విషయం పక్కకు వెళ్తూంటాయి. అవి ప్రజాదరణ దక్కించుకోలేవు. కానీ.. ఆకాశమే నీ హద్దురా.. అలా కాకుండా ఇన్ స్పిరేషన్ గా ఉండటంతో సూపర్ సక్సెస్ అయింది. సూర్య నటన సినిమాకు మేజర్ ప్లస్ పాయింట్ అయింది. సూర్య భార్య పాత్రలో నటించిన అపర్ణ బాలమురళికి కూడా మంచి పేరు వచ్చింది. తెలుగులో వచ్చిన ఉమామహేశ్వర ఉగ్రరూపస్య మళయాళ ఒరిజినల్ లో హీరోయిన్ అపర్ణానే.
