Fog Affect Flights: దేశ రాజధాని ఢిల్లీలో పొగమంచు కారణంగా వాహనదారులు ఇబ్బంది పడుతున్నారు. వాహనదారులతో పాటు విమాన ప్రయాణీకులకు ఇక్కట్లు తప్పడం లేదు. పొగమంచు తీవ్రంగా ఉండటంతో విమానాలు గాలిలోకి ఎగరలేని పరిస్థితి నెలకొంది. దీంతో కొన్ని విమానాలను అధికారులు రద్దు చేశారు. మరి కొన్ని విమానాలు ఆలస్యంగా నడుస్తున్నాయి.
ఒకటి కాదు రెండు కాదు పదమూడు గంటల పాటు ఆలస్యమవుతున్నట్లు ప్రకటనలు వస్తుండటంతో విమాన ప్రయాణీకులు నిరుత్సాహానికి గురవుతున్నారు. పొగమంచు దట్టంగా వ్యాపించడంతో ఢిల్లీలో అనేక విమాన సర్వీసులకు అంతరాయం ఏర్పడింది. ఆదివారం వంద విమానాలు ఆలస్యంగా నడవగా, పది విమాన సర్వీసులను క్యాన్సిల్ చేశారు. పొగమంచుతో పాటు చల్లని గాలులు కూడా వీస్తుండటంతో ప్రజలు ఇబ్బంది పడుతున్నారు.
పొగమంచు కారణంగా రోడ్లపై వాహనాలు కన్పించకపోవడంతో ప్రమాదాలు జరిగే పరిస్థితులు ఏర్పడుతున్నాయి. హెడ్ లైట్స్ వేసుకుని వాహనాలు నడుపుతున్నా దగ్గరకు వచ్చే వరకూ వాహనాలు కనిపించని పరిస్థితి ఉంది. పొగమంచు వల్ల మార్నింగ్ వాక్ చేసే వారు కూడా భయపడి బయటకు రావడం లేదు.
మరో పక్క రైళ్ల రాకపోకలు కూడా ఆలస్యంగా మారాయి. అనేక రైళ్లు ఆలస్యంగా నడుస్తున్నట్లు సమాచారం. ఢిల్లీ విమానాశ్రయం నుండి బయలుదేరాల్సిన 17 విమానాలను రద్దు చేసినట్లు అధికారులు ప్రకటించారు. విమాన సర్వీసుల రద్దుతో ప్రయాణీకులు ఇబ్బంది పడుతున్నారు.