AP Pension Distribution: ఏపీలో వాలంటీర్ల ద్వారా పింఛన్ల పంపిణీ పై నిషేదం విధిస్తూ ఈసీ ఆదేశాలు జారీ చేసిన విషయం విదితమే. పింఛన్ల పంపిణీకి సంబంధించి ఈసీ కీలక ఆదేశాలు జారీ చేసిన నేపథ్యంలో దీనికి టీడీపీ, చంద్రబాబు కారణం అంటూ అధికార వైసీపీ నేతలు తీవ్ర స్థాయిలో విమర్శలు, ఆరోపణలు చేస్తున్నారు. వాలంటీర్ల ద్వారా పింఛన్ల పంపిణీ నిలిచిపోవడంతో లబ్దిదారులైన అవ్వా తాతలు, వికలాంగులు తీవ్ర ఇబ్బందులు పడతారని అంటున్నారు. 
వైసీపీ విమర్శలపై టీడీపీ రాష్ట్ర అధ్యక్షుడు అచ్చెన్నాయుడు ఖండించారు. పింఛన్ల పంపిణీ చేయకుండా టీడీపీ అడ్డుకుంటుందని వైసీపీ విష ప్రచారం చేస్తుందని ఆయన అన్నారు. ఈసీ ఆదేశాలను వక్రీకరించి ఎన్నికల్లో లబ్దిపొందాలని వైసీపీ చూస్తున్నారని అన్నారు. టీడీపీ నేతల ఫిర్యాదుతో పింఛన్ల పంపిణీ నిలిపివేసినట్లు లబ్దిదారులకు సమాచారం చేరవేయాలని వైసీపీ కుట్ర చేస్తుందని ఆయన ఆరోపించారు. ఓటర్లను ప్రభావితం చేస్తారనే వాలంటీర్ల చేత పింఛన్ల ను పంపిణీ చేయవద్దని ఈసీ చెప్పిందన్నారు.
ఇదిలా ఉంటే .. పింఛన్ల పంపిణీపై గ్రామీణ పేదరిక నిర్మూలనా సంస్థ (సెర్ఫ్) కీలక ఉత్తర్వులు జారీ చేసింది. ఎన్నికల కోడ్ ముగిసే వరకూ ఇంటింటికీ పింఛన్ల పంపిణీ ఉండదని పేర్కొంది. గ్రామ, వార్డు సచివాలయ సిబ్బందితో సచివాలయాల్లోనే పంపిణీ చేయాలని అధికారులకు ఆదేశాలు జారీ చేసింది. ఎన్నికల కోడ్ కారణంగా వాలంటీర్ల ద్వారా పింఛన్ల పంపిణీ చేయకూడదని స్పష్టం చేసింది. పింఛన్ లబ్దిదారులు ఆధార్ లేదా ఇతర గుర్తింపు కార్డు తీసుకెళ్లాలని సెర్ప్ సూచించింది. అయితే గ్రామ, వార్డు సచివాలయాలకు రాలేని పరిస్థితిలో ఉన్న లబ్దిదారులకు మాత్రం ఉద్యోగుల ద్వారానే వారి ఇళ్ల వద్ద పంపిణీ చేసేలా అధికారులు చర్యలు చేపడుతున్నట్లు సమాచారం. ఏప్రిల్ 3వ తేదీ నుండి గ్రామ, వార్డు సచివాలయాల వద్ద పింఛన్ లను పంపిణీ చేయనున్నారు.
చంద్రబాబు కుట్రతోనే వాలంటీర్ల సేవలను వినియోగించుకోలేకపోతున్నామని ప్రభుత్వ సలహాదారు సజ్జల అన్నారు. వాలంటీర్ల వల్లే నేరుగా ఇంటి వద్దకు ప్రభుత్వ పథకాలు అందుతున్నాయని అన్నారు. వాలంటీర్ల వ్యవస్థను దెబ్బతీయడానికి చంద్రబాబు కుట్రలు చేస్తున్నారని విమర్శించారు. వాలంటీర్లపై చంద్రబాబు పూటకో మాట మాట్లాడుతున్నారన్నారు. సిటిజన్ ఫర్ డెమొక్రసీ నిమ్మగడ్డ రమేష్ చంద్రబాబు తరపున పని చేస్తుందని ఆరోపించారు. వృద్ధులు, వికలాంగ లబ్దిదారులను ఇబ్బంది పెడితే చంద్రబాబుకు ఏమి వస్తుందని సజ్జల ప్రశ్నించారు.
TDP: ఉమ్మడి అనంతపురం జిల్లాలో టీడీపీకి మరో షాక్ .. మరో మాజీ ఎమ్మెల్యే రాజీనామా