(న్యూస్ ఆర్బిట్ స్పెషల్ బ్యూరో )
ముందు అంత ప్రదర్శన చేయకున్నా కీలకమయ్యే సమయంలో వరుసగా 5 మ్యాచ్ లు గెలిచి ఐపీఎల్ ప్లేఆఫ్ రేసులోకి వచ్చిన పంజాబ్ కింగ్స్ యుద్ధం చివరి దశలో ఉన్నపుడు చేతులు ఎత్తేసారు. ఇప్పటికే ప్లేఆఫ్ రేసు నుంచి నిష్క్రమించిన చెన్నై సూపర్ కింగ్స్ గత రెండు మ్యాచుల్లో అద్భుతమైన ఫామ్ లోకి వచ్చింది. ఆదివారం నాటి మ్యాచ్లో పంజాబ్ ను చిత్తు చేసి, తనతో పాటే ప్లే ఆపరేషన్ నుంచి నిష్క్రమించేలా చేసింది. ఈసారి ఎలాగైనా ప్లేఆఫ్ నుంచి కప్పును సాధించాలన్నా పంజాబ్ యాజమాన్యం కలలు ఈసారికూడా తీరలేదు.
అవకాశాలు అందిపుచ్చుకుని పంజాబ్!!
పంజాబ్ టీం ను చూస్తే చాలా బలంగా కనిపిస్తుంది. క్రిస్ గేల్ టీమ్ లో జాయిన్ అయిన తర్వాత టీమ్ మరింత బలం పుంజుకుంది. అయితే కీలకమైన మ్యాచ్లో మాత్రం చేతులెత్తేయడం ఇప్పుడు పంజాబ్ అభిమానులను నిద్ర లేకుండా చేసింది. కెప్టెన్గా కేఎల్ రాహుల్ అత్యధిక పరుగులు నమోదు చేసి ఆరెంజ్ క్యాప్ దక్కించుకున్నాడు. అయితే టీమ్ను సమన్వయ పరచడం లో అతడు సరైన దృష్టి సారించ లేదని కేవలం ఎక్కువ రన్స్ చేసి వ్యక్తిగత ఆరెంజ్ క్యాప్ దక్కించుకోవడానికి మొగ్గు చూపడని సోషల్ మీడియాలో విమర్శలు వస్తున్నాయి. కీలకమైన ఆదివారం మ్యాచ్లో కె.ఎల్.రాహుల్ ప్రదర్శన అంతంతమాత్రంగానే ఉంది. క్రిస్ గేల్ వరుసగా మంచి స్కోరు సాధించిన ఆదివారం నాటి మ్యాచ్లో ప్రభావం చూపలేక పోయాడు. మ్యాక్స్వెల్ పంజాబ్ జట్టు వరుసగా టీంలో ఆడించడం మరో తప్పిదం. భారీ షాట్లు కొట్టడానికి గ్రౌండ్లో తడబడుతున్న మాక్స్ వెల్ ను తప్పించే సాహసం పంజాబ్ ఎందుకు చేయలేదో అర్థం కానీ ప్రశ్న. నికోలస్ పూరన్ అద్భుతమైన ఫామ్ లో ఉన్నా అతడికి సరైన ప్రాధాన్యత ఇవ్వలేదు. కేవలం మిడిల్ ఆర్డర్ లో దింపి అడపా దడపా ఓవర్లు ఆడించారు. పూరన్ పవర్ ప్లే లో మంచి స్కోర్ రాబట్టే అవకాశం ఉన్నా పంజాబ్ కెప్టెన్, కోచ్ ఈ దిశగా ఆలోచించలేదు.
* చెన్నై వరుస విజయాల్లో లైం లైట్ లోకి వచ్చింది మాత్రం ఓపెనర్ రుతు రాజ్ గైక్వాడ్. వరుస మ్యాచ్ల్లో అర్ధ సెంచరీలు సాధించిన యువ బ్యాట్స్మెన్ చెన్నైకి ఇప్పుడు ఆశాకిరణం. మొదట అవకాశం ఇవ్వని గైక్వాడ్ ను తర్వాత ఓపెనర్గా పంపి చెన్నై ప్రయోగం చేసింది. ఈ ప్రయోగం 100% విజయవంతమైంది. వరుస ఓటముల తరువాత చెన్నై కెప్టెన్ ఎంఎస్ ధోని కుర్రాళ్ళ లో గెలుపు తాలూకా స్పార్క్ కనిపించడం లేదని చెప్పిన అనంతరం టీమ్ లోకి వచ్చిన గైక్వాడ్ కెప్టెన్ ఆశలను చిగురింప చేశాడు. జట్టు నాయకుడిగా ముందుండి నడిపిస్తాడు అని అనుకున్న ధోని, ఆల్రౌండర్గా మెరిపిస్తాడు అనుకున్న షేన్ వాట్సన్ లు ఈ ఐపీఎల్ సీజన్ లో పూర్తిగా వెనుకబడి ఉండడం చెన్నైకు ప్రతికూల అంశం.
కెప్టెన్లు ఒకరు ఓహో.. మరొకరు ఉహు.!!
ఆదివారం జరిగిన మరో కీలక మ్యాచ్లో కలకత్తా నైట్ రైడర్స్ కెప్టెన్ ఇయాన్ మోర్గాన్ అద్భుతమైన పాటతో అలరిస్తే రాజస్థాన్ రాయల్స్ కెప్టెన్ స్మిత్ మాత్రం తన తీసికట్టు ఆటతో అందర్నీ నిరాశపరిచాడు. బౌలింగ్ సమయంలో కెప్టెన్గా సరైన ప్రణాళిక వేయడం లోను స్మిత్ ఆలోచన ఎక్కడో దెబ్బతింది. 100 లోపు రన్స్ కే ఐదు వికెట్లు పడిపోయి పీకల్లోతు కష్టాల్లో ఉన్న కోల్కతా టీం ను వెంటనే దెబ్బ తీసే ఎదురుదాడి చేయించలేదు. కేవలం రక్షణాత్మక బౌలింగ్ కు ప్రాధాన్యం ఇవ్వడంతో కోల్ కత పుంజుకుంది. స్కిప్పెర్ మోర్గాన్ విరుచుకుపడడంతో కోల్కత భారీ స్కోరు సాధించింది. చేజింగ్ లో మంచి రికార్డు ఉన్న రాజస్థాన్ ఈసారి పూర్తిగా చేతులు ఎత్తేసింది. ఒకరి తర్వాత ఒకరు బ్యాట్స్మెన్లు పెవిలియన్ కు దారి పట్టడంలో రాజస్థాన్ కథ ముగిసిపోయింది.
ఇంకా ఉంది ప్లే ఆఫ్ కథ!!
ఆదివారం నాటి రెండు మ్యాచుల్లో పంజాబ్ రాజస్థాన్ లు ప్లే ఆఫ్ రేసు నుంచి నిష్క్రమించినా, ఇంకా దీనిలో అసలు కథ పూర్తి కాలేదు. ఇప్పటికే ప్లేయర్ బెర్తు దక్కించుకున్న ముంబై ముందు వరుసలో ఉంటే, బెంగళూరు, ఢిల్లీ, హైదరాబాద్, కోల్ కతలు మూడు స్థానాల కోసం పోటీ పడుతున్నాయి. సోమవారం జరిగే ఢిల్లీ బెంగళూరు మ్యాచ్లో ఏ జట్టు గెలిస్తే ఆ జట్టు రెండో స్థానానికి వెళ్లి పోతుంది. ఇక మూడు నాలుగు స్థానాల కోసం నెట్ రన్ రేట్ ఆధారంగా మాత్రమే ప్లే ఆఫ్ బెర్త్ ఉంటుంది. హైదరాబాద్ జట్టు రన్ రేట్ విషయంలో మెరుగ్గా ఉంది. మంగళవారం ముంబై తో మ్యాచ్ నెగ్గితే నేరుగా ప్లే ఆఫ్ చేరుకుంటుంది. ఢిల్లీ బెంగళూరు మ్యాచ్ లో నమోదు అయ్యే స్కోర్లు చేజింగ్ లు, రన్ రేట్ ను బట్టి బెంగళూరు టు ఢిల్లీ ఏ స్థానాల్లో ఉంటాయో తెలుస్తుంది. ఇక సోమవారం జరిగే బెంగళూరు ఢిల్లీ మ్యాచ్ తోపాటు మంగళవారం జరిగే హైదరాబాద్ ముంబై మ్యాచ్ లో నమోదు అయ్యే స్కోర్లు, జట్లు విజయాలు మీదనే కోల్ కత ఆశలు పెట్టుకోవాలి. మొత్తంగా ప్లే ఆఫ్ రేసు చివరి వరకు నడవటం ఈ సారి ఐ పీ ఎల్ ప్రత్యేకం.
