America: కరోనా ప్రభావం ప్రపంచంలోని అన్ని దేశాల ఆర్ధిక వ్యవస్థపై పడిన విషయం తెలిసిందే. పేద, ధనిక అనే తేడా లేకుండా అన్ని దేశాలకు, వర్గాలకు దాని ప్రభావం పడింది. ఈ ప్రభావం కారణంగా అగ్రరాజ్యం అమెరికాలో ఉద్యోగం చేస్తూ స్థిరపడాలను కూనే ఎన్ఆర్ఐలకు కొత్త కష్టాలు వచ్చి పడుతున్నాయి. ప్రస్తుతం అమెరికాలో ఎన్ఆర్ఐలకే కాదు అక్కడి ప్రజలకు అద్దె ఇళ్లు దొరకని పరిస్థితులు నెలకొన్నాయి. ఆర్థిక వ్యవస్థ కుప్పకూలడం వల్ల అనేక మంది సొంతింటి వారు కూడా అద్దె ఇళ్లకు మారుతున్నారు. ఒక్కో ఇంటికి దాదాపు నలుగురైదుగురు అర్జీ పెట్టుకుంటున్నారు. దీంతో ఒక్కసారిగా అద్దె ఇళ్లకు భారీగా డిమాండ్ పెరిగింది. ఈ క్రమంలో ఇళ్ల యజమానులు అద్దెలను భారీగా పెంచేశారు. ముఖ్యంగా టంపా, ఫ్లోరిడా, టూ మెంఫిస్, టెన్నెస్సీ, రివర్ సైడ్, కాలిఫోర్నియా వంటి ప్రాంతాల్లో ఇళ్ల అద్దెలు శరవేగంగా పెరుగుతున్నాయి.
అమెరికాలో గత మూడు నెలల కాలంలోనే దాదాపు అయిదు లక్షల మందికి పైగా అద్దె అపార్ట్మెంట్లలోకి మారిపోయారు. 1993 తర్వాత ఈ స్థాయిలో అద్దె ఇళ్లకు ప్రజలు మారడం ఇదే మొదటి సారి అని ఇండస్ట్రీ కన్సల్టెంట్ రియల్ పేజ్ అనే సంస్థ నిర్వహించిన సర్వేలో వెల్లడైంది. ఇక గత నెల గణాంకాలు చూసుకున్నట్లయితే రికార్డు స్థాయిలో 96.9 శాతం మేర అద్దె ఇళ్లు నిండాయట. ఈ పరిస్థితిని హౌస్ ఓనర్లు క్యాష్ చేసుకుంటున్నారు. ఇంటి అద్దెలను కూడా దాదాపు 17శాతం పెంచేస్తున్నారు. అద్దెలు పెరిగినప్పటికీ డిమాండ్ తగ్గడంలేదు. ఇక అమెరికన్ల పరిస్థితే ఇలా ఉండగా అక్కడి ఎన్ఆర్ఐల పరిస్థితి ఏ విధంగా ఉందో అర్థం చేసుకోవచ్చు.