House rental : అద్దె ఇంట్లో కి వెళ్ళే వాళ్ళు గుర్తుపెట్టుకోవాల్సిన అంశాల గురించి తెలుసుకుందాం.
సొంత ఇల్లయినా, అద్దె ఇల్లయినా ఏదైనా కూడా వాస్తురీత్యా ఉండడం చాలా అవసరం. సొంత ఇల్లు కల నెరవేరాలంటే అద్దెకుండే ఇల్లు కూడా వాస్తురీత్యా బాగుండాలి. మీరు ఉండే ఇల్లు పల్లెలో అయినా, పట్నంలో అయినా సరే వాస్తురీత్యా ఉండాలి. కాబట్టి అద్దె ఇంట్లో కి వెళ్లే వాళ్ళు ఆచితూచి అడుగు వేయడం మంచిది. అద్దె ఇంటిలోకి వెళ్లే ముందు నైరుతి, దక్షిణ, పశ్చిమాలలో మాస్టర్ బెడ్‌రూమ్ ఉందోలేదో గమనించుకోవడం చాల ముఖ్యం.
అలాగే ఆగ్నేయంలో వంట గది ఉండాలి. ఈశాన్యంలో ద్వారం, గృహం మధ్య ఖాళీ ఉండాలి. నైరుతిలో బాల్కనీ ఉండకూడదు. ప్రతి పోర్షన్ చదరంగా లేదా దీర్ఘ చతురస్ర ఆకారంలో ఉండటం మంచిది. వృత్తాకారంలో మాత్రం ఉండకుండా చూసుకోండి. అదేవిధంగా నైరుతి గది కి నైరుతిలో ద్వారం ఉండకూడదు.ఇంటి ఆవరణలో వాస్తుకు అనుగుణంగా మాత్రమే నూతులు, గోతులు ఉండాలి. చెడు వీధిపోట్లు, చీకటిగా ఉండి గాలి, వెలుతురు రానివి, రోడ్డు నుంచి బాగా పల్లంగా ఉన్న ఇళ్ళు ఉండడానికి మంచిది కాదు.
టాయ్‌లెట్లు దక్షిణ, పశ్చిమాల్లో ఉండటం మంచిది. ఇవి మాత్రమే కాక మీకు కుదిరితే ఆ పోర్షన్ ఇంతకుముందు నుంచి అద్దెకు ఇస్తున్నదైతే ఇంతకుముందు అద్దెకున్న వారికి ఎలా ఉండేది, కలిసి వచ్చిందా లేక ఏవైనా ఇబ్బందులు పడ్డారా అన్న విషయం తెలుసుకొని దాన్నిబట్టి అద్దెకు దిగడం మంచిది. పైకి బాగానే కనిపించిన గతంలో అద్దెకు ఉన్న వారికి తీవ్ర అనారోగ్య సమస్యలు, నానా విధములైన ఇబ్బందులు కలిగించే పోర్షన్ లు , తరచూ ఖాళీ అయ్యే పోర్షన్ లు తీసుకోకుండా ఉండడమే మంచిది .
ప్రమాదాలు, అకాల మరణాలు, హత్యలు, ఆత్మహత్యలు జరిగిన పోర్షన్ లు తీసుకోకుండా ఉండడమే మంచిది. అసలు వాస్తు బాగున్న ఇళ్ళు తరచూ ఖాళీ అవ్వవన్న విషయాన్ని మరిచిపోకండి. ఈ రోజుల్లో ఇల్లు దొరకడమే కష్టం గా ఉంటే ఇంకా ఇవన్నీ ఎక్కడ చూసుకోము అని అనకండి… మీ పరిస్థితులు అన్ని సవ్యం గా ఉండాలంటే ఆ మాత్రం ఓపికతో వెతుక్కోక తప్పదు.