పాలకొల్లు: ప్రముఖ సినీ రచయిత చిన్ని కృష్ణ గురువారం వైసిపిలో చేరారు. పశ్చిమ గోదావరి జిల్లా పాలకొల్లులో జరిగిన వైసిపి ఎన్నికల ప్రచార సభలో చిన్ని కృష్ణ పార్టీ తీర్ధం పుచ్చుకున్నారు. పార్టీ అధినేత జగన్ ఆయనకు కండువా కప్పి సాదరంగా ఆహ్వానించారు.
ఆనాడు తన సినీ జీవితం రజినీకాంత్తో ప్రారంభమైందనీ ,నేడు తన రాజకీయ జీవితం వైఎస్ జగన్మోహన్ రెడ్డితో ఆరంభమైందనీ చిన్ని కృష్ణ అన్నారు.
జరగనున్న ఎన్నికల్లో వైసిపి క్లీన్ స్వీప్ చేస్తుందనీ, జగన్ ముఖ్యమంత్రి కావటం ఖాయమనీ చిన్ని కృష్ణ జోస్యం చెప్పారు. వైఎస్ జగన్ ప్రజలకు ఏం చేస్తారో సూటిగా చెబుతున్నారనీ, ఆయన ప్రసంగం విని చాలా మంది ఎంతో నేర్చుకోవాల్సి ఉంటుందనీ చిన్ని కృష్ణ అభిప్రాయపడ్డారు.
దివంగత ముఖ్యమంత్రి వైఎస్ రాజశేఖర రెడ్డిని ప్రతి పుట్టిన రోజున కలిసేవాడినని చిన్ని కృష్ణ తెలియజేశారు.
కొవ్వూరు మాజీ ఎమ్మెల్యే టివి రామారావు కూడా ఈరోజు జగన్ సమక్షంలో వైసిపిలో చేరారు.