TDP Vs Janasena: రాష్ట్ర స్థాయిలో టీడీపీ – జనసేన పార్టీలు పొత్తుతో ఎన్నికలకు వెళ్లాలని నిర్ణయించుకున్న సంగతి తెలిసిందే. ఈ క్రమంలో రెండు పార్టీలు ఉమ్మడి కార్యాచరణకు సిద్దమయ్యాయి. ఇప్పటికే రెండు సార్లు ఇరుపార్టీల నేతలు సమావేశమయ్యారు. రాష్ట్ర, జిల్లా స్థాయిలో టీడీపీ – జనసేన నేతల మధయ్ సమన్వయం కుదరడంతో ఇక నియోజకవర్గ స్థాయిలో ఆత్మీయ సమావేశాలు నిర్వహించాలని రాష్ట్ర జేఏసీ సూచించింది. దీంతో నియోజకవర్గ స్థాయి సమావేశాలు ప్రారంభమైయ్యాయి. రాష్ట్ర, జిల్లా స్థాయిలో టీడీపీ – జనసేన పార్టీల సమన్వయ భేటీలు సక్రమంగా జరిగినప్పటికీ క్షేత్ర స్థాయిలో ఆ సమన్వయం కొనసాగే పరిస్థితులు కొన్ని చోట్ల కనిపించడం లేదు. టీడీపీ, జనసేన బలంగా ఉన్న నియోజకవర్గాల్లో ఇరు పార్టీల నేతలు పోటీ చేయాలని భావిస్తుండటంతో సమస్యలు తలెత్తుతున్నాయి. 
టీడీపీ – జనసేన పొత్తులో భాగంగా ఏ నియోజకవర్గంలో ఎవరు పోటీ చేయాలన్న దానిపై ఇంకా పార్టీలు నిర్ణయించలేదు. అయితే పలు నియోజకవర్గాల్లో టీడీపీ, జనసేన నేతలు తామే అభ్యర్ధులుగా ఇప్పటి నుండి ప్రచారం చేసుకుంటున్నారు. ఇటువంటి నియోజకవర్గాల్లో ముఖ్యనేతలతో పార్టీ పెద్దలు ముందుగా సమావేశాలు నిర్వహించకపోవడంతో క్షేత్ర స్థాయిలో ఘర్షణలు తలెత్తుతున్నాయి. తాజాగా మంగళవారం పిఠాపురంలోని పాత టీడీపీ ఆఫీసు వద్ద జరిగిన రెండు పార్టీల సమన్వయ కమిటీ సమావేశం రసభాసగా మారింది. 
గత ఎన్నికల్లో టీడీపీ నేత, మాజీ ఎమ్మెల్యే వర్మ ఓడిపోయినందున ఈ సారి సీటు తనకు ఇవ్వాలని నియోజకవర్గ జనసేన ఇన్ చార్జి తంగెళ్ల ఉదయ్ శ్రీనివాస్ కోరారు. ఆ సమయంలో వర్మ కలుగజేసుకుని..గత ఎన్నికల్లో తానే కాదు..మహామహులే ఓడిపోయారని వ్యాఖ్యానించారు. దీంతో పవన్ కళ్యాణ్ ను ఉద్దేశించే వర్మ వ్యాఖ్యానించారని జనసేన కార్యకర్తలు అభిప్రాయపడ్డారు. తమ అధినేతను వర్మ అవమానించారని జనసైనికులు మండిపడ్డారు. జనసేన – టీడీపీ నేతల పరస్పర దూషణలతో, గలాటతో కుర్చీలు, బెంచీలను పడేయడంతో ఆ ప్రాంతం రణరంగాన్ని తలపించింది. ఇరుపార్టీల నేతలు సర్దిచెప్పే ప్రయత్నం చేసినా వారి మాటలు పట్టించుకోకుండా కార్యకర్తలు అక్కడి నుండి వెళ్లిపోయినట్లు తెలుస్తొంది.
పిఠాపురం నియోజకవర్గంలో జనసేన పార్టీకి బలమైన క్యాడర్ ఉంది. 2009 ఎన్నికల్లో ప్రజారాజ్యం పార్టీ నుండి పోటీ చేసిన వంగా గీత టీడీపీ అభ్యర్ధి వర్మపై వెయ్యి ఓట్ల స్వల్ప మెజార్టీతో విజయం సాధించారు. ఆ తర్వాత 2014 ఎన్నికల్లో టీడీపీ వర్మకు టికెట్ ఇవ్వకుండా పీవీ విశ్వంకు టికెట్ ఇవ్వగా, వర్మ స్వతంత్ర అభ్యర్ధి గా పోటీ చేసి వైసీపీ అభ్యర్ధి దొరబాబుపై 47వేల ఓట్ల మెజార్టీతో గెలుపొందారు. టీడీపీ అభ్యర్ధి విశ్వంకు కేవలం 15వేల ఓట్లు వచ్చాయి. ఎమ్మెల్యేగా గెలిచిన తర్వాత వర్మ టీడీపీలోనే కొనసాగారు. 2019 ఎన్నికల్లో టీడీపీ తరుపున వర్మ పోటీ చేయగా, వైసీపీ అభ్యర్ధి దొరబాబు 14,992 ఓట్ల మెజార్టీతో గెలుపొందారు. జనసేన పార్టీ నుండి పోటీ చేసిన శేషు కుమారికి 28వేలకు పైగా ఓట్లు వచ్చాయి. 15 శాతం ఓట్లు జనసేనకు పోల్ అవ్వడంతో ఆ ఓట్ల చీలిక కారణంగా వర్మ ఓటమి పాలైయ్యారు. 
ఈ నియోజకవర్గంలో జనసేన – టీడీపీ సమన్వయంతో ఉమ్మడి అభ్యర్ధి పోటీ చేసే విజయం ఖాయమనే మాట వినబడుతుండగా, ఇక్కడ సమన్వయమే ప్రధాన సమస్యగా మారింది. గత అసెంబ్లీ ఎన్నికల్లో జనసేన పార్టీ తరుపున పోటీ చేసి ఓటమి పాలైన శేషు కుమారిని తప్పించి ఆమె స్థానంలో తంగెళ్ల ఉదయ్ శ్రీనివాస్ కు నియోజకవర్గ బాధ్యతలు అప్పగించింది జనసేన పార్టీ. నియోజకవర్గంలో బలమైన క్యాడర్ ఉండటంతో జనసేన అభ్యర్ధి తంగెళ్ల ఉదయ్ శ్రీనివాస్ పోటీ చేయడం ఖాయమని భావిస్తుండగా, టీడీపీ నేత వర్మ టికెట్ ఇవ్వకపోతే మళ్లీ స్వతంత్ర అభ్యర్ధిగా పోటీకి దిగే అవకాశం ఉందని అంటున్నారు. నియోజకవర్గంలో జరుగుతున్న ఈ పరిణామాలు చూస్తుంటే టీడీపీ – జనసేన అధిష్టానానికి సమన్వయపర్చడం పెద్ద తలనొప్పిగా తయారవుతోందని అంటున్నారు. చూడాలి ఏమి జరుగుతుందో..!
BTech Ravi: పోలీసుల అదుపులో పులివెందుల టీడీపీ నేత బీటెక్ రవి..?