మళ్ళీ రాజకీయాల్లోకి బండ్ల గణేష్…?

తెలుగు సినీ ఇండస్ట్రీలో క్యారెక్టర్ ఆర్టిస్ట్ గా తన ప్రస్థానం మొదలుపెట్టిన బండ్ల గణేష్ ఆ తర్వాత మేటి ప్రొడ్యూసర్ గా ఎదిగాడు. కొన్ని బ్లాక్ బస్టర్ చిత్రాలు సాధించిన తర్వాత గణేష్ నిదానంగా నిర్మాణ రంగానికి దూరం అయి రాజకీయ రంగ ప్రవేశం చేశాడు. ఇక అతని రాజకీయ జీవితం ఎన్ని రోజులు ఉందో ఎలా ముగిసిందో అందరికీ తెలిసిందే. ఇక ప్రస్తుతం ఈ ప్రస్తావన ఎందుకు వచ్చింది అంటే….

గతంలో….

బండ్ల గణేష్ తాజాగా కమలనాధుల కోటలో ఒకటి రెండు రోజుల్లో చేరనున్నారని వార్తలు వినిపిస్తున్నాయి. చాలా రోజుల నుండి కాంగ్రెస్ నుండి మరియు ఇతర పార్టీల నుండి తెలంగాణ బీజేపీ లోకి వలసలు ఎక్కువ అయ్యాయి. గతంలో అసెంబ్లీ ఎన్నికలకు ముందు తెలంగాణ కాంగ్రెస్ తరపున ప్రచారం చేసిన గణేష్ పార్టీ గెలవకపోతే బ్లేడ్ తో తన గొంతు కోసుకుంటా అని శపథం చేశాడు. దీనిపై ఎంతోమంది ఎన్నో కామెంట్స్ చేసి అతనిని ఆట పట్టించారు. సినిమాల్లో కూడా ఈ వ్యవహారంతో సీన్లు రూపొందడం గమనార్హం.

ట్రెండ్ ఫాలో అవ్వడమే…?

అయితే గణేష్ మాత్రం ట్రెండ్కు తగ్గట్టు బీజేపీలోకి వెళ్లేందుకు మొగ్గు చూపుతున్నారని అంటున్నారు. ఇక రెండు తెలుగు రాష్ట్రాల్లో బీజేపీ సినీ గ్లామర్ కోసం పరితపిస్తూ ఉందని… తాజాగా విజయశాంతిని కూడా అలాగే తమ పార్టీలోకి చేసుకున్నారని అంటున్నారు. ఇక గణేష్ బిజెపిలో చేరే ముందు ఒక కీలక పోస్ట్ కావాలని అడుగుతున్నారని సమాచారం వచ్చింది. 2018 సెప్టెంబర్ లో రాహుల్ గాంధీ సమక్షంలో బండ్ల కాంగ్రెస్ పార్టీలో చేరారు. 2018 అసెంబ్లీ ఎన్నికలకు ముందు అతను వారి పార్టీకి స్టార్ క్యాంపెయినర్ గా వెలుగొందారు. ఇక ఆయన ఇచ్చిన ఇంటర్వ్యూలో ప్రచారస మయంలో చేసిన కామెంట్స్ అయితే ఇప్పటికీ రూపంలో సోషల్ మీడియాలో తిరుగుతూ ఉంటాయి.

పవన్ అడుగుజాడల్లో

2018 లో కాంగ్రెస్ ఘోర పరాజయం చవి చూసిన తర్వాత సైలెంట్ గా అయిపోయారు. అసలు రాజకీయంగా తనకు ఎవరితో ఎలాంటి సంబంధం లేదు అని చాలాసార్లు చెప్పారు. ఇక పవన్ కళ్యాణ్ పార్టీ లోకి గణేష్ ఎంట్రీ అవుతుంది అని అనుకున్నారు కానీ అది సాధ్యపడలేదు. అయితే పవన్ కళ్యాణ్ మాత్రం గణేష్ తో ఖచ్చితంగా ఒక సినిమా చేస్తానని హామీ ఇచ్చాడు. ఇప్పుడు పవన్ కళ్యాణ్ బీజేపీతో చేతులు కలిపిన తర్వాత గణేష్ కూడా తను దేవుడిలా ఆరాధించే పవన్ అడుగుజాడల్లో నడవాలని అనుకుంటున్నారని పలువురు అంటున్నారు. అందుకే అతను మళ్ళీ బిజెపిలో చేరి తెలంగాణ లో తన అదృష్టాన్ని పరీక్షించుకోవాలని చూస్తున్నారట.