Mamitha Baiju: కంటెంట్ బాగుంటే ఏ భాషలో అయినా ఆదరణ దక్కుతుందని ఎన్నో చిత్రాలు రుజువు చేశాయి. తాజాగా ఈ జాబితాలో ప్రేమలు చిత్రం కూడా చేరింది. ఈ ఏడాది ఫిబ్రవరి 9న మలయాళంలో విడుదలైన కామెడీ అండ్ లవ్ ఎంటర్టైనర్ ఇది. గిరీష్ ఏడీ డైరెక్ట్ చేసిన ఈ చిత్రంలో నస్లెన్ కె. గఫూర్ మమితా బైజు ప్రధాన పాత్రలు పోషించారు. ఎలాంటి అంచనాలు లేకుండా వచ్చిన ఈ సినిమా భారీ విజయాన్ని అందుకుంది. మలయాళంలో రూ. 100 కోట్ల రేంజ్ లో వసూళ్లను సాధించింది.
ఇక ఇదే చిత్రాన్ని రాజమౌళి తనయుడు కార్తికేయ తెలుగులో మార్చి 8న రిలీజ్ చేశాడు. తెలుగులో కూడా ఈ చిత్రానికి మంచి రెస్పాన్స్ తక్కింది. ముఖ్యంగా ఈ సినిమాలో హీరోయిన్ గా నటించిన మమితా బైజు ఓవర్ నైట్ స్టార్ గా గుర్తింపు సంపాదించుకుంది. ఇందులో సాఫ్ట్‌వేర్ ఉద్యోగి రీనూ పాత్రలో ఆమె ఒదిగిపోయి నటించింది. తన అందం అభినయంతో ప్రేక్షకులనే కాకుండా విమర్శకులను సైతం మెప్పించింది. దాదాపు 15 చిత్రాల్లో నటించిన కూడా రాని క్రేజ్ ప్రేమలు మూవీ ద్వారా మమితా సంపాదించుకుంది.
దీంతో సౌత్ లో ఆమెకు వ‌రుస అవ‌కాశాలు క్యూ కడుతున్నాయి. త్వరలోనే ఈ బ్యూటీ రెబల్ అనే మూవీ తో కోలీవుడ్ లోకి ఎంట్రీ ఇవ్వబోతోంది. జి.వి. ప్ర‌కాష్ కుమార్, మమితా జంటగా నటించిన ఈ చిత్రం మార్చి 22న తమిళంలో విడుదల కానుంది. అలాగే విష్ణు విశాల్ హీరోగా తెర‌కెక్క‌బోతున్న ఓ చిత్రంలో మమితా హీరోయిన్ గా ఎంపిక అయింది. మరికొన్ని ప్రాజెక్ట్ లు చ‌ర్చ‌లు ద‌శలో ఉన్నాయి.
ఇక‌పోతే ప్రేమలు మూవీ ద్వారా భారీ క్రేజ్ దక్కడంతో మమితా తన రెమ్యునరేషన్‌ను అమాంతం పెంచేసింద‌ని వార్తలు వస్తున్నాయి. ప్రేమలు చిత్రానికి గానూ రూ. 30 లక్షల రేంజ్ లో రెమ్యునరేషన్ తీసుకుందట. అయితే ఇకపై చేయబోయే సినిమాలకు మాత్రం మమితా రూ. 50 లక్షలు డిమాండ్ చేస్తుందట. అందుకు ఒక్క రూపాయి తగ్గినా సినిమాకు సైన్ చేయనని చెబుతుందని జోరుగా ప్రచారం జరుగుతోంది. ఇక వ‌రుస‌గా మరో రెండు మూడు హిట్లు పడ్డాయి అంటే మమితా రెమ్యునరేషన్ ని రూ. కోటి క్రాస్ అవ్వ‌డం ఖాయ‌మ‌ని సినీ ప్రియులు నెట్టింట చర్చించుకుంటున్నారు.