అవినీతి కేసులో అరెస్టయిన అచ్చెన్నాయుడిని పరామర్శించడానికి.. అక్రమాల కేసులో అరెస్టయ్యి కడప జైల్లో ఉన్న జేసీ ప్రభాకర్ రెడ్డి ని పరామరించడానికి జైల్ అధికారులు ససేమిరా అన్నారు. కరోనా సమయంలో పరామర్శలు, మిలాఖత్ లు ఉండవని తేల్చి చెప్పారు. ఈ క్రమంలో జేసీ ఫ్యామిలీని అయినా పరామర్శించాలని పట్టుబట్టిన లోకేష్… తాడిపత్రికి బయలుదేరారు!
రాష్ట్రంలో రాజారెడ్డి రాజ్యాంగం నడుస్తుందని దుయ్యబట్టారు. అన్నింటికీ వడ్డీతో సహా చెల్లిస్తామని హెచ్చరిచారు. ఆ వడ్డీ ఏమిటనేది ప్రస్తుతానికి అప్రస్తుతం! ఆ సంగతులు అలా ఉంటే…ఈ విషయంపై స్పందించిన జేసీ దివాకర్ రెడ్డి… హైదరాబాద్ నుంచి తాడిపత్రికి సుమారు 500 కి.మీ. దూరం వచ్చి తమకు మద్దతివ్వడం నాయకుల పట్ల లోకేశ్ నిబద్ధతకు నిదర్శనమన్నారు. సరిగ్గా అక్కడే లోకేష్ ను బుక్ చేసేశారు!
జేసీ దివాకర్ రెడ్డి అలా అన్నారో లేదో… ఆన్ లైన్ లో ప్రశ్నల వర్షాలు కురిసిపోయాయి. ఆ నిబద్ధత ప్రజలపట్ల ఎందుకు లేదని కౌంటర్లు మొదలైపోయాయి. గొప్ప గొప్ప నాయకుల పట్ల లోకేశ్ కి ఉన్న నిబద్ధత మంచిదే కానీ… అదే సమయంలో కాస్తో కూస్తో నిబద్ధత చిన్న చిన్న సామాన్య ప్రజానికంగా కూడా ఉండాలికదా అంటున్నారు ఏపీ వాసులు! కరోనా సమయంలో రాష్ట్ర ప్రజలను కన్నెత్తి కూడా చూడలేదు… విశాఖ ఎల్జీ పాలిమర్స్ బాధితులను కనీసం పలకరించలేదు. మరి ప్రజలపై ఆ నిబద్ధత ఏది?
హైదరాబాద్ నుంచి అక్రమాల కేసులో అరెస్టయిన జేసీ ఫ్యామిలీని పరామర్శించడానికి 500 కి.మీ. వెళ్లగలిగిన చినబాబు… మహానాడు మీటింగ్ కోసం హైదరాబాద్ నుంచి అమరావతికి వచ్చి మహనాడు చేసుకున్న చినబాబు… విశాఖలో అంతమంది చనిపోతే… హైదరాబద్ నుంచి విశాఖకు సుమారుగా 620 కి.మీ…. అక్కడి నుంచి కూడా రాలేకపోయారు. పోనీ మహానాడు సమయంలో అమరావతి వరకూ వచ్చారు కదా… అమరావతి నుంచి విశాఖకు సుమారుగా 380 కి.మీ… రాలేకపోయారు!
ఇక్కడ సమస్య దూరానిది కాదు.. నిబద్ధతది! దీంతో… తమ పార్టీ నాయకులు, తమ పార్టీ కార్యకలాపాలపై ఉన్న నిబద్ధత ప్రజలపట్ల ఎందుకు లేదని విశాఖ వాసులు నిలదీస్తున్నారు! 2019 ఎన్నికల్లో అంత తీవ్రంగా వీచిన ఫ్యాన్ గాలిలో కూడా సైకిల్ పడిపోకుండా చూసిన విశాఖ వాసులపై బాబులకున్న నిబద్ధత, కృతజ్ఞత ఇదేనా అని వారు ప్రశ్నిస్తున్నారు.
దానికి సమాధానంగా కరోనా కదా అని టీడీపీ నాయకులు చెబుతున్నా… వీవీఐపీలకు.. మరి ముఖ్యంగా మాజీ ముఖ్యమంత్రి, మాజీ మంత్రి స్థాయి వ్యక్తులకు కరోనా సమయంలో ప్రయాణాలు చేయడం పెద్ద విషయం కాదు! ఆరోగ్యం విషయంలో అతి శ్రద్ధ ఉంటేనో, ప్రాణాల మీద అతి తీపి ఉంటేనో, ప్రజల పట్ల నిర్లక్ష్యం ఉంటేనో తప్ప… రాష్ట్ర ప్రభుత్వం, డీజీపీల అనుమతితో తిరగొచ్చు… హైదారబాద్ నుంచి కమ్యునిస్టులు కూడా విశాఖకు వచ్చారు కదా! అని సమాధానం చెబుతున్నారట విశాఖ వాసులు!
ఏదీ ఏమైనా… తమ పార్టీ నాయకులపై లోకేశ్ కున్న నిబద్ధతపై మిగిలిన నాయకుల నుంచి ప్రశంసల జల్లులు.. ప్రజల నుంచి ప్రశ్నల వర్షాలు ఈ విధంగా కురుస్తున్నాయి!!