ఎవరి కర్మకు వారే బాధ్యులు అంటారు. ఇందుకు టిడిపి అధినేత చంద్రబాబు నాయుడేమీ అతీతుడు కాదు.మొన్నటి ఎన్నికల్లో ఎవరికి పడితే వారికి టిక్కెట్టు ఇచేసిన ఫలితాన్ని చంద్రబాబునాయుడు ఇప్పుడు అనుభవిస్తున్నారు.
ఓడిపోయాక కాడ దించేసిన ఆ నేతలను చూసి ఇపుడు చంద్రబాబు వాపోతున్నారు.మూడు పార్లమెంటరీ నియోజకవర్గాల్లో అంటే ఇరవై ఒక్క అసెంబ్లీ సెగ్మెంట్లలో ఈ ముగ్గురి కారణంగా టిడిపి అత్యంత దయనీయ పరిస్థితుల్లోకి వెళ్లిపోయింది .ఇప్పుడు అక్కడ పార్టీ జెండా కట్టే కార్యకర్త కూడా కనిపించడం లేదంటున్నారు.విశాఖ జిల్లాలో మూడు పార్లమెంటు నియోజకవర్గాలున్నాయి. గత 2019 ఎన్నికల్లో పోటీ చేసిన ముగ్గురు తెలుగుదేశం పార్టీ అభ్యర్థులు ఓటమి పాలయ్యారు.
విశాఖ ఎంపీగా గీతం సంస్థల అధినేత శ్రీభరత్ ను, అనకాపల్లి నుంచి ఆడారి ఆనంద్, అరకు నియోజకవర్గం నుంచి కాంగ్రెస్ పార్టీ నుంచి వచ్చిన కిశోర్ చంద్రదేవ్ కు టిక్కెట్ లు ఇచ్చారు. మొన్నటి ఎన్నికల్లో ముగ్గురూ ఓటమి పాలయ్యారు.విశాఖ ఎంపీగా పోటీచేసిన శ్రీభరత్ తన ఓటమికి టీడీపీ నేతలే కారణమని భావిస్తూ ఆయన పార్టీ కార్యక్రమాలకు దూరంగా ఉంటున్నారు. తాను అధిష్టానానికి ఈ విషయాన్ని నివేదికలతో సహా ఇచ్చినా ఎటువంటి చర్యలు తీసుకోవడం లేదని శ్రీ భరత్ అసహనంతో ఉన్నారని సమాచారం. అందుకే తెలుగుదేశం పార్టీ కార్యక్రమాలకు ఆయన దూరంగా ఉంటున్నారు.
ఖర్చు కూడా పార్టీ కోసం పెట్టడం లేదు. ఇటీవల కొందరు పార్టీ కార్యాలయం, కార్యక్రమాల నిర్వహణ కోసం కొంత మొత్తాన్ని ఇవ్వాలని శ్రీభరత్ వద్దకు వెళ్లగా ఆయన తిరస్కరించినట్లు తెలుస్తోంది.ఇక అనకాపల్లి నుంచి తెలుగుదేశం పార్టీ అభ్యర్థిగా పోటీ చేసిన ఆడారి ఆనంద్ వైసీపీలో చేరిపోయారు.ఇక అరకు పార్లమెంటు నియోజకవర్గం నుంచి పోటీ చేసిన కిశోర్ చంద్రదేవ్ అసలు పార్టీలోనే లేడనుకోవాలి. ఆయన ఎన్నికల ఫలితాల తర్వాత ఢిల్లీకే పరిమితమయ్యారు. ఇలా విశాఖ జిల్లా లోని మూడు పార్లమెంటు స్థానాల్లో తెలుగుదేశం పార్టీకి నాయకత్వం అనేది లేకుండా పోయిందంటున్నారు.
ఇందుకు నింది౦ చాల్సింది చంద్రబాబునాయుడునేనని ఆ పార్టీ వర్గాలు చెప్తున్నాయి.ఎన్నికల సమయంలో క్యాష్ సూట్కేసులతో వచ్చేసిన వారికి చంద్రబాబు టిక్కెట్లిచ్చే పంపారని వారు ఓడిపోయాక పార్టీ ముఖం కూడా చూడ్డం లేదని పార్టీ నాయకులే గుసగుసలాడుకుంటున్నారు.చివరకు వియ్యంకుడు బాలయ్య చిన్నల్లుడు భరత్ కూడా పార్టీకి హ్యాండ్ ఇవ్వడంతో చంద్రబాబు ఏమీ చేయలేని పరిస్థితుల్లో ఉన్నారట.అయినా మేకపోతు గాంభీర్యంతో అలా ముందుకు వెళదామంటూ చంద్రబాబు నెట్టుకొస్తున్నారు.