జస్ట్ మూడే మూడు నెలల్లో తెలంగాణలో అధికార బీఆర్ఎస్ పార్టీ సీన్ పూర్తిగా రివర్స్ అయిపోయింది. తెలంగాణ కొట్లాడి తెచ్చామన్న పార్టీ.. పైగా పదేళ్ల పాటు కేసీఆర్ ముఖ్యమంత్రిగా ఉన్నారు. సంస్థాగతంగా పార్టీ చాలా బలంగా ఉంది. గత ఎన్నికల్లో ఓడి అధికారానికి దూరమైంది. ఇదంతా జరిగి మూడు నెలలు కూడా కాలేదు. అంతే బీఆర్ఎస్ పరిస్థితి రాష్ట్రంలో దిక్కూ లేనిదిగా మారిపోయింది.పదేళ్లు ఏకచక్రాధిపత్యంగా రాష్ట్రాన్ని ఏలిన పార్టీ అంటే ఎంత బలంగా ఉండాలి.. ఆ పార్టీ నుంచి పార్లమెంటు ఎన్నికల్లో పోటీ చేసేందుకు లీడర్లు క్యూలో ఉండాలి.
మరో నెల రోజుల్లో పార్లమెంటు ఎన్నికలు జరుగుతుంటుంటే పలు నియోజకవర్గాల్లో పార్టీకి బలమైన అభ్యర్థులు లేని దుస్థితి. ప్రజాస్వామ్యం అంటే… ఇదే. ఎవరైనా ప్రజలు అధికారం ఇచ్చినంత వరకే కింగ్లుగా ఉంటారు. అధికారం లేనివాడు బొంగే. అధికారంలో ఉన్నప్పుడు విర్రవీగి ఆ తర్వాత ప్రజల చేత తిరస్కరణకు గురైన పార్టీలు చరిత్రలో చాలానే చూశాం. ఇప్పుడు తెలంగాణలో బీఆర్ఎస్ పరిస్థితి కూడా అంతే..!
2010 నుంచి తెలంగాణ ఉద్యమం ఊపందుకున్న తర్వాత బీఆర్ఎస్ టిక్కెట్ల కోసం ఎంత డిమాండ్ ఉండేదో ప్రత్యేకంగా చెప్పాల్సిన పని లేదు. అసలు ఒకానొక టైంలో బీఆర్ఎస్ లో టిక్కెట్లు దొరక్క బండి ఓవర్ లోడ్ అయిపోయింది. గత ఐదారు నెలల క్రితం వరకు కూడా ఇదే పరిస్థితి. కేసీఆర్ ఎవరికి సీటు ఇచ్చినా కూడా తెలంగాణ జనాలు అస్సలు పట్టించుకునే వారే కాదు. కేవలం కారు గుర్తుకు ఓటేసి వారిని భారీ మెజార్టీలతో గెలిపించే వారు.
అసలు 2018 ముందస్తు ఎన్నికల్లో బీఆర్ఎస్ అభ్యర్థులకు వచ్చిన మెజార్టీలు చూసి పలు ప్రాంతీయ పార్టీల నేతలకు దిమ్మతిరిగిపోయింది. ఇలాంటి గొప్ప ఘనవిజయాన్ని ఎవ్వరూ ఊహించనే లేదు. ఇక ఇప్పుడు ఎంపీ ఎన్నికలు జరుగుతుంటే ఆ పార్టీకి క్యాండెట్లు దొరకడం లేదు. అసలు సిట్టింగ్ ఎంపీలే పార్టీ నుంచి బయటకు వెళ్లిపోతున్నారు. జహీరాబాద్ లో బీబీ పాటిల్ అనే ఎంపీకి తెలుగు కూడా రాదు. అయినా ఆయన రెండుసార్లు ఎంపీ అయ్యారు. ఇప్పుడు ఆయన పార్టీ వదిలేసి బీజేపీలోకి వెళ్లి.. ఆ పార్టీ నుంచి పోటీ చేస్తున్నారు.
మహబూబ్ నగర్ ఎంపీ మన్నె శ్రీనివాస్ రెడ్డి ఎప్పుడో సైలెంట్ అయ్యారు. ఆయన సోదరుడి కుమారుడు కాంగ్రెస్లో చేరి ఎమ్మెల్సీగా పోటీ చేస్తున్నారు. ఆయన అసలు నోరు తెరిచి ఏనాడు ప్రసంగం కూడా చేయలేదంటారు. చివరకు బీఎస్పీతో పొత్తు పెట్టుకుని రెండు, మూడు ఎంపీ సీట్లు ఇచ్చేసి చేతులు దులిపేసుకునే ప్రయత్నం కూడా జరుగుతోంది. నాగర్కర్నూల్, పెద్దపల్లి ఎంపీలు కూడా పార్టీ మారిపోయారు. ఏదేమైనా జస్ట్ మూడే మూడు నెలల్లో కేసీఆర్ జాతకం ఈ స్థాయిలో రివర్స్ అవుతుందని ఊహించనే లేదు.