ఫలించిన చిరంజీవి తపన.. ‘స్వయంకృషి’కి 33 ఏళ్లు..

మెగాస్టార్ చిరంజీవి కెరీర్లో ఎక్కువగా చేసినన సినిమాలు మాస్ కంటెంట్ ఉన్నవే. డ్యాన్సులు, ఫైట్లు, కామెడీ, మాస్ ఎలివేషన్స్.. ఇవే ఆయన సినిమాల్లో ఎక్కువగా కనిపిస్తాయి. ఆ సినిమాలతోనే ఆయన సూపర్ స్టార్ డమ్ సంపాదించుకున్నారు. ప్రేక్షకులు కూడా చిరంజీవిని అలాంటి సినిమాల్లో చూడటానికే ఇష్టపడేవారు. అయితే.. చిరంజీవిలోని నటనను రాబట్టిన దర్శకులు ఉన్నారు.. చిరంజీవిలోని నటుడిని తెరపై ఆవిష్కరించిన సినిమాలూ ఉన్నాయి. ఆ లిస్టులో నిలిచే మొదటి దర్శకుడు కె.విశ్వనాధ్ అయితే.. చిరంజీవి నటనకు గీటురాయిగా నిలిచిన సినిమా ‘స్వయంకృషి’. ఈ సినిమా విడుదలై నేటికి 33 ఏళ్లు పూర్తయ్యాయి.

బ్రేక్ డ్యాన్సులు.. ఫైట్లు లేకపోయినా..

అదే ఏడాది జూలై 23న విడుదలైన పసివాడి ప్రాణం భారీ కలెక్షన్లతో దూసుకుపోతోంది. చిరంజీవి తొలిసారి చేసిన బ్రేక్ డ్యాన్సులకు ధియేటర్లు దద్దరిల్లిపోతున్నాయి. మాస్ అండ్ చైల్డ్ సెంటిమెంట్, చిరంజీవి మాస్ యాక్టింగ్ కు ప్రేక్షకులు ఫిదా అయిపోతున్నారు. ఆ సమయంలో సెప్టెంబర్ 3న విడుదలైంది స్వయంకృషి. కథ, కథనం, నటన, మేకప్ లేని నటులు మాత్రమే ఉన్న ఆఫ్ బీట్ సినిమా. చెప్పులు కుట్టే వ్యక్తి పాత్రలో చిరంజీవి ఒదిగిపోయారు. చిరంజీవి నటన చూస్తూ.. సినిమాలో బ్రేక్ డ్యాన్సులు, ఫైట్లు లేవనే విషయాన్నే మర్చిపోయారు అభిమానులు, ప్రేక్షకులు. కె.విశ్వనాధ్ అద్భుతమైన కథ, కథనంతో ప్రేక్షకులు సినిమాలో లీనమైపోయేలా తెరకెక్కించారు.

రష్యన్ భాషలోకి డబ్ అయిన ఘనత ‘స్వయంకృషి’దే

కమల్ హాసన్ కు స్వాతిముత్యంలా తనకూ అలాంటి సినిమా ఉండాలని భావిస్తున్న చిరంజీవి మనోగతాన్ని తెలుసుకున్న కె.విశ్వనాధ్ ఈ కథ వినిపించారట. తాను ఎదురుచూస్తున్న కథ ఇదేనంటూ చిరంజీవి చేసిన స్వయంకృషి ఆయన కెరీర్లో కలికితురాయిగా నిలిచిపోయింది. పూర్ణోదయా క్రియేషన్స్ పై ఏడిద నాగేశ్వరరావు ఈ సినిమా నిర్మించారు. రమేశ్ నాయుడు అందించిన సంగీతం సినిమాకు హైలైట్ గా నిలిచింది. స్వయంకృషి టైటిల్.. చిరంజీవికి సరిగ్గా సరిపోయింది. ఈ సినిమా సూపర్ హిట్టై 26 కేంద్రాల్లో శతదినోత్సవం జరుపుకుంది. చిరంజీవికి తొలిసారి ఉత్తమ నటుడిగా నంది అవార్డు వచ్చింది. స్వయంకృషిని రష్యన్ భాషలోకి డబ్ చేయడం విశేషం. మాస్కో ఇంటర్నేషనల్ ఫిలిం ఫెస్టివల్ లో ఈ సినిమాను ప్రత్యేకంగా ప్రదర్శించడం సినిమా గొప్పదనానికి నిదర్శనం. ఇంటర్నేషనల్ ఫిలిం ఫెస్టివల్, ఆసియా ఫసిఫిక్ ఫిలిం ఫెస్టివల్ లో కూడా ప్రదర్శితమైందీ సినిమా.