TRS MLA Vanama: ఖమ్మం జిల్లా పాల్వంచలో నాగ రామకృష్ణ కుటుంబం ఆత్మహత్య తెలంగాణలో తీవ్ర సంచలనం రేకెత్తించిన సంగతి తెలిసిందే. ఈ కేసులో టీఆర్ఎస్ ఎమ్మెల్యే వనమా వెంకటేశ్వరరావు కుమారుడు రాఘవ 61 రోజుల పాటు జైలులో ఉంటి ఇటీవలే బెయిల్ పై విడుదల అయ్యారు. తన కుమారుడు రాఘవపై కేసు నమోదు అయిన సమయంలో పోలీసు దర్యాప్తునకు పూర్తిగా సహకరిస్తామని ఎమ్మెల్యే వనమా వెంకటేశ్వరరావు తెలిపారు. అయితే రెండు నెలల తరువాత ఈ కేసు విషయంపై ఎమ్మెల్యే వనమా సంచలన వ్యాఖ్యలు చేశారు.
TRS MLA Vanama: కుట్రదారుల బండారాన్ని బయటపెడతా
శనివారం అసెంబ్లీ లాబీలో ఆయన మాట్లాడారు. రెండు నెలల పాటు తాను అనారోగ్యంతో బాధపడ్డాననీ, తాను లేని సమయంలో తన కుమారుడు రాఘవపై కుట్రలు పన్నారని ఆగ్రహం వ్యక్తం చేశారు. టీఆర్ఎస్ ఖమ్మం జిల్లా అధ్యక్షుడు కావాల్సిన తన కుమారుడి భవిష్యత్తు నాశనం చేశారని మండిపడ్డారు. తాను ఆరోగ్యంతో ఉండి ఉంటే ఈ పరిస్థితి వచ్చేది కాదని అన్నారు. నియోజకవర్గంలో తాను నిత్యం పర్యటిస్తున్నాననీ, తన కుమారుడిపై కుట్రలు చేసిన వారి బండారాన్ని త్వరలో బట్టబయలు చేస్తానని చెప్పారు. తన కుమారుడిపై కుట్ర వ్యవహారంలో టీఆర్ఎస్ నేతలతో పాటు ఇతర పార్టీల వారు కూడా కుమ్మక్కు అయ్యారని వనమా ఆరోపణలు గుప్పించారు.
నాడు ఆత్మహత్య చేసుకున్న నాగ రామకృష్ణ కారులో దొరికిన సూసైడ్ నోట్, సెల్ఫీ వీడియోలతో ఎమ్మెల్యే వనమా కుమారుడు రాఘవ పాత్ర వెలుగులోకి వచ్చింది. రాఘవకు వ్యతిరేకంగా సాక్షాలు వెలుగుచూడటంతో పోలీసులు ఆయనను అరెస్టు చేసి జైలుకు తరలించారు. ఈ కేసు నేపథ్యంలో రాఘవను టీఆర్ఎస్ నుండి సస్పెండ్ చేసిన విషయం తెలిసిందే.