CM Revanth Reddy: తెలంగాణ ముఖ్యమంత్రిగా టీపీసీసీ చీఫ్ రేవంత్ రెడ్డి ఇవేళ ప్రమాణ స్వీకారం చేసిన సంగతి తెలిసిందే. రేవంత్ రెడ్డి ప్రమాణ స్వీకార కార్యక్రమానికి ఏపీ సీఎం వైఎస్ జగన్, ప్రతిపక్ష పార్టీ నాయకులు చంద్రబాబు, పవన్ కళ్యాణ్ తదితరులకు ఆహ్వానాలు పంపారు. అయితే వీరు ప్రమాణ స్వీకారానికి హజరు కాలేదు కానీ, ట్విట్టర్ వేదికగా అభినందనలు తెలియజేశారు.
తెలంగాణలో కొలువు తీరిన కొత్త ప్రభుత్వానికి అభినందనలు తెలియజేసిన సీఎం వైఎస్ జగన్.. ప్రమాణ స్వీకారం చేసిన ముఖ్యమంత్రి రేవంత్ రెడ్డి, డిప్యూటి సీఎం భట్టి విక్రమార్క, మంత్రులకు శుభాకాంక్షలు చెప్పారు. రెండు తెలుగు రాష్ట్రాల మధ్య సోదరభావం, సహకారం పరిఢవిల్లాలని మనస్పూర్తిగా కోరుకుంటున్నట్లు ఏపీ సీఎం జగన్ పేర్కొన్నారు.
టీడీపీ అధినేత చంద్రబాబు, నారా లోకేష్ ట్విట్టర్ వేదికగా రేవంత్ కు అభినందనలు తెలియజేశారు. ప్రజాసేవలో ఆయన విజయం సాధించాలని కోరుకుంటున్నట్లు పేర్కొన్నారు. హిందూపురం ఎమ్మెల్యే నందమూరి బాలకృష్ణ తదితరులు కూడా రేవంత్ రెడ్డికి అభినందనలు తెలియజేశారు.
జనసేన అధినేత పవన్ కళ్యాణ్ రేవంత్ కు శుభాకాంక్షలు తెలియజేస్తూ పత్రికా ప్రకటన విడుదల చేశారు. సీఎంగా బాధ్యతలు చేపట్టిన రేవంత్ రెడ్డికి, మంత్రివర్గ సహచరులకు శుభాకాంక్షలు తెలిపారు. రేవంత్ రెడ్డితో తనకు వ్యక్తిగతంగా స్నేహం ఉందని పేర్కొన్న పవన్ కళ్యాణ్.. తెలంగాణలో యురేనియం తవ్వకాలను వ్యతిరేకిస్తూ నిర్వహించిన అఖిలపక్ష సమావేశంలో రేవంత్ పాల్గొన్నారనీ, అంతే కాకుండా .. కాంగ్రెస్ పార్టీ అభిప్రాయాన్ని సూటిగా వెల్లడించారని గుర్తు చేశారు. వాగ్దాటి, ప్రజాకర్షణ కల్గిన ఆయన.. రాజకీయంగా ఎన్నో ఒత్తిళ్లను ఎదుర్కొంటూ పోరాటాలు చేసి ముఖ్యమంత్రి స్థాయికి ఎదిగారని ప్రశంసించారు.
తెలంగాణలో జరిగిన ఉద్యమాలు, వాటి నేపథ్యంపై సంపూర్ణ అవగాహన ఉన్న నాయకుడు రేవంత్ అని పవన్ పేర్కొన్నారు. నీళ్లు, నిధులు, నియామకాలు.. ప్రధాన అంశాలుగా పోరాడి సాధించుకున్న రాష్ట్రం తెలంగాణ.. రాష్ట్ర సాధన కోసం అమరులైన యువత.. ఏ ఆశయాల కోసం అత్మబలిదానాలు చేసిందో వాటిని సంపూర్ణంగా నెరవేర్చి ఆ త్యాగాలకు గౌరవాన్ని, సార్ధకతను కల్పించాలని,రాష్ట్ర ప్రజల ఆకాంక్షలకు అనుగుణంగా సంక్షేమం, అభివృద్ధి తో తెలంగాణ రాష్ట్రాన్ని ముందుకు తీసుకువెళ్లాలని మనస్పూర్తిగా కోరుకుంటున్నానని పేర్కొన్నారు పవన్ కళ్యాణ్.
Revanth Reddy: తెలంగాణ సీఎం రేవంత్ కి అభినందనలు తెలిపిన ప్రధాని మోడీ