Krishna: టాలీవుడ్ లెజెండరీ సూపర్ స్టార్ పద్మభూషణ్ నటశేఖర కృష్ణ మరణం తో సినీ ఇండస్ట్రీ అంతా తీవ్రదుఖంలో మునిగిపోయింది. డేరింగ్ అండ్ డాషింగ్ హీరో గా పిలవబడే సూపర్ స్టార్ మరణాన్ని అభిమానులు జీర్ణించుకోలేకపోతున్నారు. ఒక లెజెండరీ స్టార్ కాలం చేసిన ప్రతిసారి వారి బయోపిక్ తీయడం గురించి పెద్ద ఎత్తున చర్చలు జరుగుతుంటాయి.. ఇప్పటికే అనేకమంది స్ఫూర్తిదాయకమైన వ్యక్తుల జీవిత చరిత్రను బయోపిక్ గా వెండి మీదకు తీసుకువచ్చారు. ఇప్పుడు దివంగత కృష్ణ బయోపిక్ పై సోషల్ మీడియాలో చర్చించుకుంటున్నారు..
ఒక్కసారి సూపర్ స్టార్ కృష్ణ జీవితాన్ని పరిశీలిస్తే.. నటుడిగా దర్శకుడిగా నిర్మాతగా స్టూడియో అధినేతగా కృష్ణ తనదైన ముద్ర వేసుకున్నారు. ఎన్నో సంచలనాలకు కేంద్ర బిందువుగా నిలిచారు. సినీ రంగంలోనే కాకుండా ఎంపీగా గెలిచి రాజకీయాలలోనూ కీలకపాత్ర పోషించారు. సినీ రంగ ప్రవేశం నుంచి టాలీవుడ్ స్టార్ హీరోగా ఎదగడం నిర్మాతల హీరో అనిపించుకోవడం, సొంతంగా బ్యానర్ ను స్థాపించి సినిమాలు నిర్మించడం, ఇండస్ట్రీకి కొత్త టెక్నాలజీని పరిచయం చేయడం, పద్మాలయ స్టూడియో నిర్మాణం, రాజకీయ జీవితం, వ్యక్తిగత జీవితం, విజయనిర్మలతో రెండో పెళ్లి, తన కుమారుడు మహేష్ బాబును హీరోగా నిలబెట్టడం వరకు సూపర్ స్టార్ కృష్ణ జీవితంలో ఎన్నో విశేషాలు ఉన్నాయి.
అయితే ఈ అంశాలన్నీ ఒక బయోపిక్ లేదా వెబ్ సిరీస్ తీయడానికి సరిపోతాయా అనేది ఆలోచించాలి. ఎవరి ..జీవితాన్ని అయినా తెరమీదకు బయోపిక్ తీసుకురావాలంటే వారి లైఫ్ లో ఎన్నో ఒడిదుడుకులు ఉండాలి. ఎమోషన్స్ ఉండాలి. అవన్నీ ఉంటేనే డ్రామా పండుతుంది. అంతేకాదు బయోపిక్ అంటే వారి సక్సెస్ ఫుల్ జీవితంలోని సానుకూలత వైపు మాత్రమే కాకుండా ప్రతికూలత తో పాటు ఎవరికీ తెలియని మరో కోణాన్ని కూడా ఆవిష్కరించాలి. అలా చేయలేకపోతే ఆ సినిమా నిజాయితీగా అనిపించదు. సావిత్రి జీవిత చరిత్ర ఆధారంగా తలకెక్కిన మహానటి సినిమా అందర్నీ ఆకట్టుకుంది. సావిత్రి బయోపిక్ బ్లాక్ బస్టర్ హిట్ అయింది. కానీ దివంగత తమిళనాడు మాజీ ముఖ్యమంత్రి జయలలిత బయోపిక్ తలైవి, నందమూరి తారకరామారావు బయోపిక్ రెండు డిజాస్టర్ గా నిలిచాయి. వీటిని దృష్టిలో పెట్టుకొని కథ, కథనాలను రాసుకుంటే కృష్ణ బయోపిక్ కూడా కచ్చితంగా హిట్టవుతుంది.