Thaman: థమన్ Thaman పవన్ కల్యాణ్ ‘వకీల్ సాబ్’ సినిమా తెలుగు రాష్ట్రాల్లో స్టడీ కలెక్షన్లతో దూసుకెళ్తోంది. యూఎస్ లో కూడా మంచి కలెక్షన్లే రాబడుతోంది. కరోనా మలి విజృంభణ, ఏపీలో టికెట్ రేట్ల విషయంలో అలజడి లేకుంటే కలెక్షన్ల ఫిగర్ ఇంకా ఎక్కువగా ఉండేది. అయినా.. ఇవేవీ వకీల్ సాబ్ ప్రభంజనాన్ని అడ్డుకోలేదు.
సాఫ్ట్ గా ఉండే ఒరిజినల్ పింక్ సినిమాను కమర్షియలైజ్డ్ గా మలచి దర్శకుడు వేణు శ్రీరామ్ మంచి మార్కులు కొట్టేశాడు. పవన్-ప్రకాశ్ రాజ్ నటన, కథనం పవన్ మాసివ్ లుక్ అన్నీ సినిమాకు ప్లస్ అయ్యాయి. అయితే.. అందరి నోటా వినిపిస్తున్న మరో పేరు థమన్. ఈ సినిమాకు ఇచ్చిన మ్యూజిక్, బ్యాక్ గ్రౌండ్ స్కోరింగ్ గురించ ప్రతిఒక్కరూ ప్రత్యేకంగా ప్రస్తావిస్తున్నారు.
ఎస్ఎస్ థమన్ కు 2008లో కిక్ తర్వాత అనూహ్యంగా డిమాండ్ పెరిగిపోయింది. ఎంతగా అంటే.. కేవలం మూడేళ్ల వ్యవధిలోనే 50 సినిమాలు పూర్తి చేసేశాడు. టాలీవుడ్ లో థమన్ పేరు మోగిపోయింది. మణిశర్మ కాస్త తగ్గడం.. దేవిశ్రీ ప్రసాద్ పుంజుకోవడంతో థమన్ ప్రాభవం తగ్గిపోయింది. కాపీ కంటెంట్ ముద్రతోపాటు రిపీట్ మ్యూజిక్ అంటూ ఆఫర్లు తగ్గాయి. థమన్ కూడా ఆకట్టుకోలేక పోయాడు. ఈ సమయంలో 2018 థమన్ కు కమ్ బ్యాక్ ఇయర్ అయింది. ఆ ఏడాది వరుణ్ తేజ్ ‘తొలిప్రేమ’, ‘అరవింద సమేత..’ కు థమన్ ఇచ్చిన సంగీతం ప్రేక్షకులను విపరీతంగా ఆకట్టుకుంది. అనుష్క భాగమతికి ఇచ్చిన బ్యాక్ గ్రౌండ్ స్కోరింగ్ సినిమాకు ప్లస్ అయింది.
2020లో బన్నీ అల.. వైకుంఠపురములో సినిమాకు థమన్ ఇచ్చిన పాటలు ఏస్థాయిలో హిట్ అయ్యాయో తెలిసిందే. ప్రస్తుతం వకీల్ సాబ్ తో థమన్ పేరు మోగిపోతోంది. మగువా.. మగువా.. పాట ఓ సంచలనం. పాటలతోనే సినిమాపై హైప్ పెంచేసిన థమన్ బ్యాక్ గ్రౌండ్ తో మ్యాజిక్కే చేశాడు. మహేశ్ కూడా తన ట్వీట్ లో థమన్ గురించి ప్రత్యేకంగా ప్రస్తావించాడు. దీంతో ఇక థమన్ కు కొన్నేళ్లపాటు తిరుగులేదనే వార్తలు వస్తున్నాయి. రామ్ చరణ్-శంకర్ సినిమాకు కూడా థమన్ సంగీతం అనే వార్తలు వస్తున్నాయి. తెలుగులో థమన్ కు వరుస ఆఫర్లున్నాయి. ఇదే హవా కంటిన్యూ చేస్తే థమన్ కు ఇప్పట్లో తిరుగులేనట్టే.
Mogali Rekulu: మెగా ఫ్యామిలీతో సందడి చేసిన మొగలిరేకులు ఆర్కే నాయుడు.. వైరల్ అవుతున్న ఫొటోస్..!