Political Trending: రాష్ట్ర రాజకీయాల్లో గడిచిన 12 రోజుల నుండి గుడివాడ – క్యాసినో అంశమే హైలైట్ అవుతూ వస్తుంది.. ఈ క్యాసినో రాజకీయంలో ఒకరకంగా మంత్రి కొడాలి నాని పీకల్లోతు ఇరుక్కుపోయారు.. జిల్లాల విభజన అంశం తెరమీదకు రాకుంటే.., నిన్న విజయవాడ టీడీపీ నేతపై లైంగిక వేధింపుల ఆరోపణలు రాకుంటే.. పేకాట ఆడుతూ టీడీపీ ఇంచార్జి అరెస్టు కాకుంటే వైసీపీకి ఈ విషయంలో సమాధానం కూడా దొరికేది కాదు..! అయితే ఈ క్యాసినో రాజకీయంలో మొత్తానికి కొడాలి సేఫ్, వైసీపీ సేఫ్.. అటూ, ఇటూ తిరిగి తిరిగి ఇప్పుడు టీడీపీ ఇతర అంశాల్లో, ఆరోపణల్లో ఇరుక్కునే పరిస్థితి వచ్చింది. విశాఖపట్నం దగ్గర్లోని భీమిలి బీచ్ లోని ఓ రిసార్ట్ లో ఏలూరు కి చెందిన టీడీపీ నాయకులు ఇంచార్జి బడేటి చంటి సహా మరో 20 మంది కలిసి పేకాట ఆడుతున్నారు. ఈ విషయం తెలుసుకున్న పోలీసులు ఆ రిసార్ట్ పై దాడి చేసి ఈ నాయకులను అరెస్టు చేసారు. రూ. 5 లక్షల నగదు, 8 కార్లు స్వాధీనం చేసుకున్నారు.. అదే సమయంలో విజయవాడలో వినోద్ జైన్ అనే టీడీపీ నేత 14 ఏళ్ళ బాలికపై లైంగిక వేధింపులు చేయడంతో ఆమె ఆత్మహత్య చేసుకుంది.. ఇలా ఈ రెండు ఘటనలతో టీడీపీ కాస్త డిఫెన్స్ లో పడింది.. వైసీపీ సేఫ్ కి వెళ్ళిపోయింది..!
Political Trending: క్యాసినో క్యా సీన్ హై..!!
నిజానికి గుడివాడలో క్యాసినో జరగలేదా..!? ఏమీ జరగలేదా..!? అంటే నూటికి నూరు శాతం జరిగింది. గుడివాడలోని కొడాలి కి చెందిన కె కన్వెన్షన్ పక్కనే ఉన్న రెండున్నర ఎకరాల స్థలం లీజుకి తీసుకుని.. ఒక ఎకరం ప్రదేశంలో పేకాట.. ఒక అరెకరం ప్రదేశంలో కోడి పందాలు.., ఇంకో పక్కన ఎడ్ల పందాలు.. ఇలా అన్ని నిర్వహించారు. కాకపోతే కొడాలి నాని నోరు పెద్దది. పదవి పెద్దది. పైగా టీడీపీకి బద్ధమైన ద్వేషి అని జగన్ దగ్గర కాస్త గుర్తింపు ఉంది. అందుకే అవకాశం దొరికింది కదా అని నోటికి పని చెప్పి.., ఆ క్యాసినో ఇష్యూని చుట్టూ తిప్పి తిప్పి చివరికి తానే పీకల్లోతు ఇరుక్కునే ప్రమాదంలోకి వెళ్లి తప్పించుకున్నారు. చివరికి ఇతర గేమ్స్ లో టీడీపీ తనకు తాను దొరికిపోయింది. అందుకే వైసీపీ సేఫ్.. టీడీపీ కి ఇప్పుడు కొత్త కష్టం వచ్చి పడింది.
ఎన్టీఆర్ పేరుతో మరో గేమ్..!?
ఇక ఇక్కడితో వైసీపీ గేమ్ అయిపోలేదు. కొడాలి నాని ఆ క్యాసినో అంశం జనం మర్చిపోయేలా చేసి.. మరో అంశంలో తాను ఎలివేట్ అయ్యేలా జాగ్రత్త పడ్డారు. కృష్ణా జిల్లాను విభజించిన తరుణంలో విజయవాడ ప్రాంతానికి ఎన్టీఆర్ పేరు పెట్టారు. ఆ పేరు పెట్టడం వెనుక సీఎం జగన్ ఆశించిన రాజకీయ ప్రయోజనాన్ని తనకు కట్టబెట్టే తీవ్ర ప్రయత్నంలో కొడాలి నాని నిమగ్నమయ్యారు. చంద్రబాబు అంటే ద్వేషించే.. ఎన్టీఆర్ అంటే పూజించే టీడీపీ లేదా న్యూట్రల్ కమ్మ ఓట్లు కాస్తో, అవి వైసీపీకి పడేలా చేయడం అనే ఒక అంటారా ఉద్దేశంతో కొడాలి గేమ్ స్టార్ట్ చేసారు. మొత్తానికి ఆ క్యాసినో నుండి తప్పించుకోవడం.. పనిలో పనిగా జిల్లాల విభజన రాజకీయం తెరపైకి రావడం.. ఎన్టీఆర్ పేరు వైసీపీ ప్రయోజనకర్తగా మారిపోవడం.. సరిగా అదే టైం లో టీడీపీ నేతలు ఈ కేసుల్లో ఇరుక్కోవడంతో ఇప్పుడు వైసీపీ సేఫ్ .. టీడీపీకి నెగిటివ్ పవనాలు వేస్తున్నట్టు చెప్పుకోవచ్చు..!