Lata Mangeshkar: దిగ్గజ గాయని, గానకోకిల, భారతరత్న లతా మంగేష్కర్ కన్నుమూసిన సంగ‌తి తెలిసిందే. ముంబైలోని బ్రీచ్‌ క్యాండీ ఆస్పత్రిలో ఆదివారం ఉదయం లతాజీ తుదిశ్వాస విడిచారు. ఈమె మ‌ర‌ణ వార్త యావ‌త్ దేశాన్ని శోక‌సంద్రంలోకి నెట్టేసింది. ప్ర‌స్తుతం పలువురు ప్రముఖులు ఆమె భౌతికకాయాన్ని సందర్శించి నివాళులర్పిస్తున్నారు. మ‌రోవైపు సోషల్ మీడియా ద్వారా లతాజీ మ‌ర‌ణంపై సంతాపం వ్య‌క్తం చేస్తున్నారు.
మ‌రి కొద్దిసేప‌టిలో శివాజీ పార్క్‌లో ప్రభుత్వ లాంఛనాలతో అధికారింగా ఆమె అంత్య క్రియలు నిర్వహించనున్నారు. ఇక‌పోతే వృత్తిరీత్యా దేశం గర్వించే స్థాయికి ఎదిగినా లతాజీ పెళ్లి మాత్రం చేసుకోలేదు. అస‌లు ఆమె వివాహం చేసుకోక‌పోవ‌డం వెన‌కున్న అస‌లు ర‌హ‌స్యం ఏంటీ..? అన్న ప్ర‌శ్న ఎంద‌రిలోనూ ఉంది. అయితే దీనికి గ‌తంలో ల‌తాజీనే స్వ‌యంగా స‌మాధానం ఇచ్చారు.
ఇంత‌కీ ఆమె ఏం చెప్పారంటే..`కుటుంబంలో పెద్ద అమ్మాయిని కావడం వ‌ల్ల తండ్రి చనిపోయాక 13ఏళ్ల వయసు నుంచే కుటుంబ బాధ్యతని భుజాన వేసుకున్నాను. ఓ దశలో పెళ్లి చేసుకోవాలనే ఆలోచన వచ్చినప్పటికీ బాధ్య‌త‌లెన్నో భుజాన ఉండ‌టం కారణంగా కుదరలేదు. అయినా జీవితంలో ప్రతిదీ దేవుడి నిర్ణయం ఆధారంగానే జరుగుతుంది. ఏం జరిగినా అది మన మంచి కోసమే అనుకోవాలి.` అంటూ చెప్పుకొచ్చారు.
కాగా, లతా మంగేష్కర్ 1929 సెప్టెంబర్ 28న మధ్యప్రదేశ్‌లోని ఇండోర్ లో జన్మించారు. తండ్రి దగ్గర సంగీతంలో ఓనమాలు నేర్చుకున్న లతాజీ.. 1942లో గాయనిగా కెరీర్‌ ప్రారంభించారు. దాదాపు 36 భాష‌ల్లో వేలావి పాట‌లు పాడిన ఆమె.. లెక్కకు మించిన అవార్డులు, రివార్డులు దక్కించుకుని చరిత్ర పుటల్లో చిరస్థాయిగా మిగిలిపోయారు.