Cine Artist Balaiah: సీనియర్ నటుడు మన్నవ బాలయ్య (94) ఈరోజు ఉదయం కన్నుమూసారు. హైదరాబాద్ యూసుఫ్ గూడా లోని తన నివాసంలో బాలయ్య తుది శ్వాస విడిచారు. బాలయ్య దాదాపుగా 300పైగా చిత్రాల్లో నటించారు. ఎత్తుకు పై ఎత్తు చిత్రం ద్వారా తెలుగు సినీ పరిశ్రమలోకి అడుగు పెట్టిన బాలయ్య నటుడిగానే కాక నిర్మాత, దర్శకుడిగా, కథా రచయితగా తన ప్రతిభను చాటారు. అమృత ఫిలిమ్స్ సంస్థ ద్వారా హీరోలు శోభన్ బాబు, కృష్ణ, చిరంజీవి లతో సినిమాలు తీశారు.
Cine Artist Balaiah కథా రచయిత, నిర్మాతగా నంది అవార్డులు
చెల్లెలి కాపురం, నేరము – శిక్ష, చుట్టాలు ఉన్నారు జాగ్రత్త, ఊరికిచ్చిన మాట వంటి సినిమాలు నిర్మించారు. పసుపు తాడు, నిజం చెబితే నేరమా, పోలీస్ అల్లుడు సినిమాలకు దర్శకత్వం వహించారు. ఊరికి ఇచ్చిన మాట చిత్రం ద్వారా ఉత్తమ కథా రచయిత నంది అవార్డు అందుకున్నారు. చెల్లెలి కాపురం చిత్రానికి నిర్మాతగా నంది అవార్డు అందుకున్నారు. ఆయన కుమారుడు తులసి రామ్ కూడా పలు చిత్రాల్లో కథానాయకుడిగా నటించారు. బాలయ్య మృతికి పలువురు సినీ ప్రముఖులు సంతాపం ప్రకటించారు.