ఇంట్లో సీసీ కెమెరాలు ఏంటి..? ఇంట్లో అంత మంది సిబ్బంది ఏంటి..? ఒక ఫోన్ పోయిందని పని వాడిని ఇంటికి పిలిపించి కొట్టడం ఏంటి..?? శిరోముండనం చేయించి పంపించడం ఏంటి..?? అసలు ఎవరీ నూతన్ నాయుడు..?
ఓ సారి టీడీపీ అనుకూల సర్వే టీంలో కనిపిస్తాడు..! మరోసారి పవన్ అభిమాని అని, జనసేనకు పని చేస్తానంటాడు..! ఇంకోసారి వైసీపీకి అనుకూలంగా పని చేసి రాజకీయ అజెండాలు రూపొందించాం అని చెప్తుంటాడు..!! 2014 ఎన్నికల్లో “జై సమైఖ్యఆంధ్ర” తరపున పోటీ చేశా అంటాడు..! అసలు ఎవరీ నూతన్ నాయుడు..??
ఎవరికైనా “ఓవర్ నైట్ స్టార్” ఒక్క రాత్రి చాలు.., కానీ ఈ నూతన్ నాయుడు అనేవాడికి రెండు రాత్రుళ్ళు వచ్చాయన్నమాట. అందుకే అప్పుడెప్పుడో బిగ్ బాస్ సందర్భంగా ఈయన పేరు గూగిలితే.., మళ్ళీ ఇన్నాళ్లకు గూగుల్ కి నూతన్ నాయుడుని వెతికే పని పడింది.
డబ్బు పైత్యం… బాగా కమ్ముకున్నట్టుంది..!!
నూతన్ నాయుడు వ్యక్తిత్వం అనేది పక్కన పెడితే.., ఈ శిరోముండనం కేసులో ఆయన పాత్ర ఉందా, లేదా అనేది పక్కన పెడితే… ఆయనలో డబ్బు పైత్యం మాత్రం బాగా కనిపిస్తుంది. లేకపోతే “ఇంట్లో సీసీ కెమెరాలు ఏంటి..? ఆరుగురు పని వాళ్ళు ఏంటి..? మెంటార్ పేరిట ఒక సంస్థ ఏంటి ..? మొత్తం పాతిక మంది ఎక్కువగా అమ్మాయిలు పని చేయడం ఏంటి..? సీసీ కెమెరాల ద్వారా పర్యవేక్షిస్తూ అవసరమైతే తన రూమ్ కి రావడం ఏంటి..? ఇలా చాలా కోణాల్లో అతనికి డబ్బు పైత్యం కమ్ముకుంది అనేది స్పష్టమవుతుంది. ఆ పైత్యమే ఆయన కుటుంబాన్ని, భార్యని చివరికి పోలీసులకు, మీడియాకు అడ్డంగా బుక్ చేసేలా చేసింది. పోలీసుల పని సులువు చేసింది. ఇంట్లో సీసీ కెమెరాల రికార్డింగుల ద్వారానే “ఆయన ఇంట్లో శిరోముండనం” కేసుని త్వరగా ఛేదించగలిగాం అంటూ పోలీసులే చెప్పారు. తద్వారా ఆయన భార్యని తప్పించాలన్నా అవ్వలేదు. భార్య కూడా చేతిలో కర్ర పట్టుకుని అడ్డంగా కనిపించడంతో చేసేదేమి లేక ఆమె పాత్ర పోలీసులకు తేలికయింది. ఇదే లేకపోతే ఏదోటి చేసి తన భార్యని తప్పించేసే వాడే. తీరా రెడ్ హ్యాండెడ్ గా దొరికేసింది తర్వాత భార్యకి బాలేదని, బెయిల్ ఇచ్చేయాలని కోరుతున్నారట. అసలే అట్రాసిటీ కేసు, ఆధారాలున్నాయి, రాష్ట్రంలో సంచలన కేసుగానూ మారింది. కాబట్టి నూతన్ నాయుడు కొన్నాళ్ళు ఆగాల్సిందే..!
ఇంతకూ నూతన్ ఏ పార్టీ..??
నూతన్ నాయుడు రాజకీయ నాయకుడు కాదు. ప్రజా నాయకుడు అసలు కాదు. కేవలం డబ్బుంది. బిగ్ బాస్ పుణ్యామాని కొంచెం ఫేమ్ ఉంది. ఇప్పుడు శిరోముండనం ఘటనతో ఇంకాస్త ఫేమ్ వచ్చేసింది. మధ్యలో అనేక సార్లు మీడియా కంట పడినా పెద్దగా పట్టించుకునే వారు లేరు. నూతన్ నాయుడు ఏ పార్టీ అంటే చెప్పడం కష్టమే.
* 2019 ఎన్నికల్లో లగడపాటి టీడీపీ తరపున పనిచేసారు (సర్వే చేసారు) ఆ సర్వే ద్వారా నూతన్ నాయుడు కూడా లగడపాటితో కలిసి పని చేసారు. ప్రత్యక్షంగానో, పరోక్షంగానో టీడీపీకి పని చేశారు.
* 2014 ఎన్నికల్లో పెందుర్తి నియోజకవర్గం నుండి “జై సమైఖ్యఆంధ్ర” పార్టీ తరపున ఎమ్మెల్యేగా పోటీ చేసి ఓడిపోయారు.
* 2014 కి ముందు రెండేళ్ల పాటూ వైసిపిలో తెరవెనుక పని చేశారు. పార్టీ అజెండా, సిద్ధాంతాల రూపొందించే టీమ్ లో పని చేశారు. ఈ విషయాన్నీ ఆయనే స్వయంగా వెల్లడించారు.
* తాజాగా జనసేన అభిమానిగా మారిపోయారు.. పవన్ కళ్యాణ్ పై వర్మ టార్గెట్ చేసి సినిమా తీస్తే.., ఈయనే దానికి విరుగుడుగా “పరాన్నజీవి” అనే సినిమా తీసేసి వదిలారు. మొత్తానికి రాజకీయుడు, రచయిత, నటుడు, నిర్మాత, డైరెక్టర్ అన్నీ అయిపోదాం అనుకుని… కావాల్సినంత డబ్బున్నా ఏమి కాలేని సాధారణ నూతన్ నాయుడు చివరికి ఇలా సెలెబ్రిటీ అయిపోయారు.