పాపం..! తెలుగు మీడియా మొఘల్ రామోజీరావు ఆస్తి జస్ట్ రూ. 2500 కోట్లేనట..! ఆయన కేవలం ఉషోదయ ఎంటర్ ప్రైజెస్ అనే సంస్థకు మాత్రమే ఓనరట..! మరి డాల్ఫీన్ హోటల్స్, రామోజీ ఫిలిం సిటీ, మార్గదర్శి చిట్స్, కళాంజలి షోరూంస్, ఉషా కిరణ్ మూవీస్, ప్రియా పచ్చళ్ళు… ఇవన్నీ ఎవరివి..? ఎవరి ఆస్తులన్నట్టు..? 1600 ఎకరాల్లో విస్తారంగా ఉన్న ఫిలిం సిటీ విలువ ఎంత ఉన్నట్టు..? పాపం రామోజీని కేవలం రూ. 2500 కోట్లకు పరిమితం చేసి ఈ లెక్కలేసిన సంస్థ ఎంత పాపం మూటగట్టుకుందో..!!
తెలుగు నాట 62 మందితో జాబితా..!!
తెలుగు రాష్ట్రాల్లో టాప్ రిచెస్ట్ జాబితా నిన్న బయటకు వచ్చింది. వెల్త్ హురాన్ ఇండియా రిచ్ లిస్ట్ 2020 లో లిస్టు చూసి వహ్వా అని ముక్కున వేలేసుకున్న వారూ ఉన్నారు.., కాలర్ ఎగరేసిన వారూ ఉన్నారు. దీనిలో కులాలు కెలికి, మా కులస్తులే టాప్ లో ఉన్నారు అని లెక్కలుసుకుని.., సంబురాలు చేసుకున్న వారూ ఉన్నారు. మొత్తానికి ఈ 62 మందికి చెందిన ఆస్తులను లెక్కేశారు. మొత్తం కలిపి రూ. 2 , 45 , 000 కోట్లు. అంటే అంబానీ ఒక్కడి ఆస్తిలో మూడో వంతు మాత్రమే. దీని ప్రకారం తెలుగు నాట దివీస్ లాబ్స్ అధినేత మురళి దివి కుటుంబం టాప్ లో ఉంది. రూ. 49 వేల కోట్లు ఆస్తి ఉంది. ఆ తర్వాత వరుసలో హెటేరో డ్రగ్స్, డాక్టర్ రెడ్డీస్ ఉన్నారు. ఇదే జాబితాలో పాపం మన రామోజీరావు ఎక్కడో కింద ఉన్నారు. టాప్ 10 లో కూడా లేరు. అసలు విషయం ఏమిటయ్యా అంటే..!! ఈ రామోజీ బుర్ర, రామోజీ ఆస్తుల లెక్కలు ఆ లెక్కల సంస్థకి దొరకలేదన్నమాట..!!
ఉషోదయ మాత్రమే రామోజీ సంస్థా..??
రామోజీ అంటే పేద్ద వ్యాపార బుర్ర. ఆయన తన సామ్రాజ్యం మొదలు పెట్టింది మార్గదర్శి చిట్స్ తోనే. ఆ తర్వాత ప్రియా పచ్చళ్ళు పెట్టారు. తర్వాత ఈనాడు (ఉషోదయ ఎంటర్ ప్రైజెస్ ) పెట్టారు. కానీ ఈ సంస్థ కేవలం ఈనాడు లెక్కలను మాత్రమే వేసి, మిగిలినవి వదిలేసింది. రామోజీని చిన్నబుచ్చింది. ఫిలిం సిటీ విలువ కనీసం రూ. వేయి కోట్లు ఉండదా..?
ఇక ఏడాదికి రూ. 10 వేల కోట్లు టర్నోవర్ చూపిస్తున్న మార్గదర్శి.., డాల్ఫీన్ హోటళ్లు ., కళాంజలి షోరూంస్, విలువ ఏమవ్వాలి..? ఎంత ఉండాలి..? ఏమో.., రామోజీని చిన్నబుచ్చడానికి ఈ లెక్కల సంస్థ కంకణం కట్టుకుందేమో… సగమే లెక్కలు వేసి ప్రచురించేసింది. పోనీ బినామీ పేరిట ఉన్నవి వదిలేసినా… కొన్ని కుటుంబ సభ్యులకే ఉన్నాయి కదా..! డాల్ఫీన్ హోటళ్లు సుమన్ భార్యకు.., కళాంజలి ఒక కూతురుకి, ప్రియా పచ్చళ్ళు మరో కూతురికి, ఫిలిం సిటీ ఒకరికి, ఈనాడు, ఈటివి కిరణ్ కి… ఇలా అప్పగించారు. ఆ కుటుంబ సభ్యుల ఆస్తులు లెక్కేసినా మాంచి సంఖ్య ఉండేది. పాపం..!! రామోజీ మీకు 2500 కోట్లు మాత్రమే అంటే తెలుగు రాష్ట్రానికే అవమానం కాదయ్యా..!!