టిడిపి అధినేత చంద్రబాబు నాయుడు పిలుపును తెలుగు తమ్ముళ్లు లైట్ తీసుకున్నారు. ఆయన చెప్పింది ఈ చెవితో విని ఆ చెవితో వదిలేశారు.దీంతో చంద్రబాబు మహా ఫీలై పోతున్నారని సమాచారం.
అమరావతి ఉద్యమం ప్రారంభమై మూడొందల రోజులైన సందర్భంగా మూడు రోజుల సంఘీభావ కార్యక్రమాలకు చంద్రబాబు నాయుడు షెడ్యూల్ జారీ చేయడం తెలిసిందే. శనివారం రాష్ట్ర వ్యాప్తంగా టీడీపీ నేతలందరినీ అమరావతి మద్దతుగా ప్రెస్మీట్లు పెట్టమన్నారు. ఆదివారం నాడు స్కై క్యాండిల్ ప్రదర్శనలు చేయమన్నారు. సోమవారం రాష్ట్ర వ్యాప్తంగా ఎమ్మార్వో కార్యాలయాల ఎదుట నిరసన ప్రదర్శనలు నిర్వహించాలని చంద్రబాబు పిలుపునిచ్చారు.ఇటీవలే పార్లమెంటు నియోజకవర్గాల వారీగా అధ్యక్షులను నియమించినందున వల్ల మహిళా నేతలకు కొందరికి పదవులిచ్చిన కారణంతో ఈ కార్యక్రమాలు సూపర్ సక్సెస్ కాగలవని చంద్రబాబు ఆశించారు.కానీ వాస్తవంలో జరిగింది వేరుగా ఉంది.ఒక్క గుంటూరు కృష్ణా జిల్లాల్లో మినహాయిస్తే చంద్రబాబు పిలుపునకు తెలుగు తమ్ముళ్లు స్పందించలేదు.
శనివారం కొన్నిచోట్ల ప్రెస్మీట్ లయితే పెట్టారు గాని ఆదివారం స్కై క్యాండిల్ ప్రదర్శనలు జరపలేదు. సోమవారం రోడ్ల మీదికి రాలేదు. అమరావతికి పొరుగున ఉండటమే కాకుండా తెలుగుదేశం పార్టీకి ముగ్గురు ఎమ్మెల్యేలు ఉన్న ప్రకాశం జిల్లాలో పరిస్థితి మరీ దారుణం. రెండు లోక్సభ నియోజకవర్గాల టిడిపి సమన్వయకర్తగా ఉన్న ముక్కు ఉగ్రనరసింహారెడ్డి మాత్రం కనిగిరిలో కాస్త హడావిడి చేశారు. ఏది ఏమైనా ఇస్తే జిల్లాలో ఎక్కడా ఏ విధమైన సందడి లేదు. ఇదే పరిస్థితి రాష్ట్ర వ్యాప్తంగా కూడా నెలకొందంటున్నారు. సాధారణంగా చంద్రబాబు కార్యక్రమాల రూపకల్పన పక్కాగా ఉంటుంది..అవి సక్సెస్ కూడా అవుతుంటాయి. కానీ అమరావతి సంఘీభావ కార్యక్రమాలు అట్టర్ ఫ్లాప్ కావటానికి రకరకాల కారణాలు ఉన్నాయంటున్నారు.ముఖ్యంగా మూడు రాజధానుల ఏర్పాటుకు రాష్ట్ర ప్రజల్లో వ్యతిరేకత కానరావడం లేదు.అమరావతి అంటే చంద్రబాబు ఆస్థానంగా అందరికీ కనిపిస్తోంది.
కేవలం చంద్రబాబు కోసం ఈ తరహా నిరసన ప్రదర్శనలు చేసి తామెందుకు అందరికీ వ్యతిరేకం కావాలి అన్నది టిడిపి నేతల ఆలోచనగా గోచరిస్తోంది.అమరావతి రాజధానిగా ఉండాలంటూ కార్యక్రమాలు నిర్వహిస్తే అటు రాయలసీమలోనూ ఇటు ఉత్తరాంధ్రలోనూ అవును ప్రజలే తరిమి కొట్టే ప్రమాదం ఉందని టిడిపి నేతలు పసిగట్టారు. ఇదంతా తమకు ఎందుకొచ్చిన గొడవ అని అనుకున్నారో ఏమో చంద్రబాబు పిలుపును గాలికొదిలేసి టీడీపీ నేతలంతా ఇంటిపట్టునే ఉన్నారు. ఒక్క మాటలో చెప్పాలంటే ఇది బాబు కు భంగపాటు!
