(న్యూస్ ఆర్బిట్ డెస్క్)
ప్రధానమంత్రి నరేంద్ర మోదీ పుణ్యమా అంటూ హిందీ హీరో అక్షయ కుమార్ ఇటీవల వార్తల్లోకి ఎక్కారు. సినిమా కథానాయకులు ఎప్పుడూ వార్తల్లోనే ఉంటారు, నిజమే! కానీ ఈసారి అక్షయ్ కుమార్‌ను వార్తల్లోకి ఎక్కించింది సినిమా కాదు; రాజకీయాలు.
అదేంటి దేశభక్తికి ప్రతీక అయిన ఆ హీరో మోదీని చేసిన ఇంటర్వ్యూకు రాజకీయాలకూ ఏం సంబంధం అనుకుంటున్నారా? అక్కడే ఉంది మతలబు. అధికారం నిలబెట్టుకోవడం కోసం అన్ని రకాల దారుల్లో ప్రయత్నాలు చేస్తున్న మోదీ తన ప్రచారం కోసం వేసిన కొత్త ఎత్తుగడే ఆ ఇంటర్య్యూ అని ప్రజలు చాలామంది గ్రహించారు.
దానితో అక్షయ్‌పై జనం దృష్టి పడింది. గూగుల్‌లో అతనిపై శోధనలు పెరిగాయి. మీడియా కూడా అక్షయ్‌ను హీరోగా కాకుండా ఇతరత్రా చూడడం మొదలుపెట్టింది. ముంబైలో మొన్న జరిగిన పోలింగ్‌లో చాలామంది తారలు తమ వోటు హక్కు వినియోగించుకున్నారు. అక్షయ్ మాత్రం పోలింగ్ కేంద్రం మొహం చూడలేదు. మామూలుగా అయితే మీడియా పట్టించుకునేది కాదేమో! మొన్నటి ఇంటర్వ్యూ కారణంగా కాబోలు అక్షయ్‌ను వోటు ఎందుకు వేయలేదని మీడియా అడిగింది. దానికి ఆయన సమాధానం ఇవ్వలేదనుకోండి.
ఇప్పుడు ఒక కొత్త విషయం బయటకు వచ్చింది. అక్షయ్ కుమార్ కెనడా పౌరుడని తెలిసింది. ‘వాంకూవర్ అబ్జర్వర్’ అనే కెనడాకు చెందిన ఆన్‌లైన్ వార్తాపత్రిక ఒక వార్తా కథనంలో ఈ విషయం వెల్లడించింది. నిజానికి అక్షయ్ కుమార్‌కు కెనడా పౌరసత్వం ఉందని చెప్పడం ఆ వార్తా కథనం అసలు లక్ష్యం కాదు. వాస్తవంగా కెనడా పౌరులయిన వారికి కెనడా పౌరసత్వం నిరాకరిస్తున్నారంటూ రాసిన ఆ కథనంలో, బాలీవుడ్ నటుడు అక్షయ్ కుమార్ లాంటి వారికి మాత్రం వారాల వ్యవధిలోనే పౌరసత్వం ఇస్తున్నారని పేర్కొన్నారు.
ఇండియా చట్టాల ప్రకారం భారత పౌరులకు ద్వంద్వ పౌరసత్వం అవకాశం లేదు. మరి అక్షయ్ కుమార్ కెనడా పౌరసత్వం తీసుకున్నదే నిజమయితే ఆయన ఇండియా పౌరసత్వాన్ని వదులుకుని ఉండాలి.