Angry: కోపం అనేది ప్రతి మనిషికి ఉంటుంది. కానీ దాన్ని అదుపు చేసుకోవడం లోనే తేడాలు ఉంటాయి.కొందరు కోపాన్ని బాగా అదుపు చేయగలుగుతారు.. ఇంకొందరు అసలు కంట్రోల్ చేయలేరు. కానీ కోపాన్ని కంట్రోల్ చేయడం అనేది జీవితంలో చాలా ముఖ్యమైన విషయం.కోపం వచ్చినప్పుడు చెలరేగిపోయి ఇష్టమొచ్చినట్టు ప్రవర్తిస్తే వచ్చే సమస్యలు మాటలతో చెప్పడం కష్టమే. అందుకే కోపాన్ని అదుపులో ఉంచుకోవడం చాలా అవసరం.
అయితే కోపాన్ని అదుపు చేసే మంచి మార్గాలు కూడా ఉన్నాయి అంటున్నారు నిపుణులు. కోపం రాకుండా శరీరాన్ని సిద్ధం చేయవచ్చు అంటున్నారు. ఇలా చేయటానికి మంచి పద్దతి ఏదైనా ఉంది అంటే అది ధ్యానం అని సందేహం లేకుండా చెప్పవచ్చు. కోపాన్ని అదుపు చేయడానికి ధ్యానం బాగా ఉపయోగపడుతుంది. ఉదయాన్నే ఒక అరగంట వాకింగ్ చేసి, ఒక నలభై నిమిషాల పాటు యోగా చేసి.. మరో పదిహేను నిమిషాలపాటు ధ్యానం చేస్తే మంచి మార్పు కనిపిస్తుంది. ఉదయం ఎంత ఆహ్లాదంగా ఉంటే రోజంతా అంతే ప్రశాంతంగా ఉంటుంది. అదే విధంగా తీసుకునే ఆహారం మీద కూడా దృష్టి పెట్టడం చాలా అవసరం. మసాలా, ఉప్పు, కారం తగ్గించు కోవడం అనేది చాలా అవసరం ఎందుకంటే ఉద్రేకాలను ప్రేరేపించే గుణం వీటికి ఉంది . సాత్విక ఆహారం తినడం వలన ఇలాంటి సమస్యలు రావు అని నిపుణులు తెలియచేస్తున్నారు.
వీలైనంత వరకు రోజూ ఆహారంలో ఫ్రూట్ సలాడ్స్,టొమాటో రసం, కీరా ముక్కలు, పుచ్చకాయ, పల్చటి మజ్జిగ తీసుకోవడం, మాంసాహారం తగ్గించడం చేస్తే మంచి ప్రయోజనం ఉంటుంది. ధూమపానం, మద్యం కూడా ఉద్రేకాలను పెంచుతాయి. కాబట్టి వాటికి దూరంగా ఉంటే ఉండటం ఉత్తమం. అదే విధంగా సరిపడినంత మంచి నిద్ర ఉండటం వలన ఒత్తిడి తగ్గి కోపాన్ని అదుపులో ఉంచుకోవడం తేలికవుతుంది. ఇవన్నీ పాటించండి. మీలో ఎంత మార్పు వస్తుందో చూడండి.