ఎస్ ఇప్పుడు ఇదే చర్చ తెలంగాణ రాజకీయ వర్గాల్లో బాగా వినిపిస్తోంది. కేటీఆర్ తాజాగా సీఎం రేవంత్రెడ్డిని టార్గెట్ చేస్తూ రేవంత్ రెడ్డికి దమ్ముంటే ఆయన తన ముఖ్యమంత్రి పదవికి రాజీనామా చేయాలని.. అలాగే తాను సిరిసిల్లలో తన ఎమ్మెల్యే పదవికి రాజీనామా చేస్తానని… ఇద్దరం మల్కాజ్గిరిలో పార్లమెంటుకు పోటీ చేద్దామని ఎవరు గెలుస్తారో తేల్చుకుందాం అంటూ సవాల్ విసిరారు. వాస్తవానికి ఇది కేటీఆర్ విసిరిన పలాయన వాద సవాల్ అన్న సెటైర్లు బాగా పేలుతున్నాయి.
ఒక్కసారి వెనక్కు వెళితే 2018 ముందస్తు ఎన్నికల్లో ఏకంగా 88 సీట్లతో బంపర్ మెజార్టీ సాధించి అధికారంలోకి వచ్చిన బీఆర్ఎస్ ఆ వెంటనే నాలుగు నెలలకే జరిగిన ఎన్నికల్లో పార్లమెంటు ఎన్నికల్లో బొక్క బోర్లా పడింది. అసెంబ్లీ ఎన్నికల్లో కేసీఆర్ పట్టుబట్టి ఓడించిన ఎంతోమంది నేతలు తర్వాత ఎంపీలుగా గెలిచారు. కొడంగల్లో ఓడిన రేవంత్ రెడ్డి మల్కాజ్గిరిలో స్వల్ప మెజార్టీతో ఎంపీగా గెలిచారు. అలాగే కోమటిరెడ్డి వెంకటరెడ్డితో పాటు ఉత్తమ్కుమార్ రెడ్డి, బండి సంజయ్, సోయం బాపూరావు, కిషన్ రెడ్డి కూడా ఎంపీలు అయ్యారు. వీళ్లలో ఉత్తమ్ కుమార్ రెడ్డి మినహా మిగిలిన వారంతా అసెంబ్లీ ఎన్నికల్లో కేసీఆర్ పనికట్టుకుని ఓడించిన నేతలే.
రేవంత్ ఎంపీగా గెలిచిన మల్కాజ్గిరి పార్లమెంటు పరిధిలోని అన్ని సెగ్మెంట్లలో ఇటీవల అసెంబ్లీ ఎన్నికల్లో బీఆర్ఎస్ అభ్యర్థులే భారీ మెజార్టీలతో విజయం సాధించారు. దీంతో కేటీఆర్ ఎక్కడా లేని ధైర్యాన్ని కూడదీసుకుని తాను తప్పకుండా గెలుస్తాననుకుని డిసైడ్ అయ్యి మల్కాజ్గిరిలో రేవంత్ పోటీ చేయాలని సవాల్ విసరడం చూస్తుంటే చాలా కామెడీగా ఉందని అంటున్నారు. మెదక్ తర్వాత బీఆర్ఎస్ పక్కాగా గెలిచే సీటు మల్కాజ్గిరి అని కేటీఆర్ అనుకుంటున్నా రేపటి పార్లమెంటు ఎన్నికల వేళ అది అంత ఈజీ కాదు.
కేటీఆర్ విసిరిన కామెడీ సవాల్ చూసిన కాంగ్రెస్ వాళ్లు కేటీఆర్కు దమ్ముంటే రేవంత్ రెడ్డి మీద లేదా ఖమ్మంలో తాము నిలబెట్టే కాంగ్రెస్ అభ్యర్థి మీద కేటీఆర్ ఇక్కడకు వచ్చి పోటీ చేయాలని సవాల్ విసురుతున్నారు. ఖమ్మం పార్లమెంటు పరిధిలోని ఏడు అసెంబ్లీ సెగ్మెంట్లలో ఆరు చోట్ల కాంగ్రెస్, కొత్తగూడెంలో కాంగ్రెస్ మిత్రపక్షం సీపీఐ విజయం సాధించాయి. ఇక్కడ కాంగ్రెస్ నుంచి మొత్తంగా 2 లక్షల పై చిలుకు ఓట్ల మెజార్టీతో ఎంపీ విజయం సాధించే ఛాన్సులు ఉన్నాయి.
అందుకే రేవంత్ మాల్కాజ్గిరి కి రేవంత్ రావాలని సవాల్ విసురుతుంటే ఇక్కడ కాంగ్రెస్ వాళ్లు కేటీఆర్కు దమ్ముంటే ఖమ్మం వచ్చి కాంగ్రెస్ నుంచి ఎవరు పోటీ చేసినా వాళ్లపై గెలిస్తే చాలు అని ప్రతి సవాళ్లు విసురుతున్నారు. ఏదేమైనా మల్కాజ్గిరి పేరు చెప్పి అక్కడకు రేవంత్ రావాలని సవాల్ విసరడం కేటీఆర్ లాంటి నేత రేంజ్కు తగిన సవాల్ కాదనే చెప్పాలి.