వందేళ్ల చరిత్ర ఉన్న ఉస్మానియా యూనివర్సిటీలో చరిత్రలో మరచిపోలేని పేరు జార్జిరెడ్డి. విద్యార్థి నాయకుడిగా పేద విద్యార్థులకే కాదు.. రైతు సమస్యలకు కూడా అండగా నిలబడ్డాడు జార్జిరెడ్డి . అగ్ర వర్ణాల ఆధిపత్యానికి చెక్ పెట్టిన జార్జి రెడ్డి పేరు చెబితేనే కొంత మంది భయపడేవారంటే పోరాటాల పురిటిగడ్డ లాంటి ఉస్మానియా యూనివర్సిటీలో జార్జిరెడ్డి ఎంతంటి ప్రభావాన్ని చూపారో అర్థం చేసుకోవచ్చు. అలాంటి వ్యక్తిని కొంత మంది దుండగులు హత్య చేశారు. అలాంటి విద్యార్థి నాయకుడు జీవితాన్ని`జార్జిరెడ్డి` సినిమాగా తెరకెక్కిస్తున్నారనగానే అందరిలో ఆసక్తి మొదలైంది. అసలు జార్జిరెడ్డిని ఎవరు హత్య చేశారు? ఎందుకు హత్య చేశారు? అనే విషయాలను ఈ బయోపిక్లో ఏమైనా చూపిస్తారా? అసలు ఈ బయోపిక్లో ఏ అంశాలను ప్రస్తావించారనే దానిపై సర్వత్రా చర్చ జరిగింది. కొందరు ఈ సినిమా విడుదలను కూడా వ్యతిరేకించారు. సమస్యలను, సవాళ్లను దాటి విడుదలైన `జార్జిరెడ్డి` సినిమా ప్రేక్షకులను ఎలా ఆకట్టుకుందనే విషయం తెలుసుకోవాలంటే సినిమా కథలోకి వెళదాం.
సినిమా: జార్జి రెడ్డి
సెన్సార్: యు/ఎ
బ్యానర్: మైక్ మూవీస్, త్రీ లైన్ సినిమాస్, సిల్లీ మాంక్స్
విడుదల: అభిషేక్ పిక్చర్స్
నటీనటులు: సందీప్ మాధవ్, సత్యదేవ్, మనోజ్ నందన్, చైతన్య కృష్ణ, అభయ్, ముస్కాన్, వినయ్ వర్మ, మహతి తదితరులు
ఎడిటింగ్: ప్రతాప్ కుమార్
ఆర్ట్: గాంధీ నడికుడికార్
సంగీతం: సురేష్ బొబ్బిలి
బ్యాగ్రౌండ్ స్కోర్: హర్షవర్ధన్ రామేశ్వర్
కెమెరా: సుధాకర్ యెక్కంటి
నిర్మాత: అప్పిరెడ్డి
దర్శకత్వం: జీవన్ రెడ్డి
కథ:
కేరళలో పుట్టిన జార్జిరెడ్డి(సందీప్ మాధవ్) తండ్రి చిన్నప్పుడే చనిపోవడంతో తల్లి పెంచి పెద్ద చేస్తుంది. కొత్త విషయాలను నేర్చుకోవడానికి జార్జిరెడ్డి ఎప్పుడూ ఆసక్తి కనపరుస్తుంటాడు. తల్లి కూడా జార్జికి అడ్డు చెప్పకుండా కొత్త విషయాలను నేర్పుతుంది. చిన్నప్పుడే జార్జిరెడ్డి యుద్ధ విద్యలను నేర్చుకుంటాడు. భగత్ సింగ్, చెగువేరా వంటి విప్లవ వీరుల జీవిత చరిత్రలను చదవడం ద్వారా ఆయనలో విప్లవ భావాలు మొలకెత్తుతాయి. ఆయనతో పాటే అవి పెరిగి పెద్దవుతాయి. తన కళ్ల ముందు అన్యాయం జరిగితే జార్జిరెడ్డి ఒప్పుకోడు, ఎదిరిస్తాడు. తల్లి ఉద్యోగరీత్యా జార్జిరెడ్డి ఉస్మానియా యూనివర్సిటీలో జాయిన్ అవుతాడు. అక్కడ అగ్ర వర్ణానికి చెందినవారు పేదవారిని, నిమ్న జాతులపై చేస్తున్న దౌర్జన్యాలు, సంకుచిత మాటలు జార్జిరెడ్డికి నచ్చవు. ఆయన ఎదురు తిరుగుతాడు. అప్పటి వరకు సైలెంట్గా ఉన్న బడుగు, బలహీన వర్గాలకు, పేదవారికి జార్జిరెడ్డి ఆశాజ్యోతిలా కనపడతాడు. దాంతో జార్జిరెడ్డికి విద్యార్థుల సహకారం కూడా లభిస్తుంది. క్రమంగా జార్జిరెడ్డికి విద్యార్థుల్లో మద్దతు పెరుగుతూ వస్తుంది. విద్యార్థి నాయకుడిగా ఎదుగుతాడు. విద్యార్థి సమస్యలతో పాటు రైతు సమస్యలపై గళమెత్తుతాడు జార్జిరెడ్డి. ఈయన చర్యలు కొంత మంది ప్రభుత్వ పెద్దలకు తలనొప్పిగా మారుతుంది. జార్జిరెడ్డిని ఓ పథకం ప్రకారం హత్య చేస్తారు. అసలు జార్జిరెడ్డిని ఎవరు హత్య చేశారు? ఆయన హత్యకు ఎలాంటి పథకం వేశారు? అనే విషయాలు తెలియాలంటే సినిమా చూడాల్సిందే..
సమీక్ష:
ముస్కాన్ అనే అమ్మాయి న్యూయార్క్ యూనివర్సిటీ నుండి జార్జిరెడ్డిపై రీసెర్చ్ చేసి డాక్యుమెంటరీని రూపొందించడానికి ఇండియా వస్తుంది. జార్జిరెడ్డి గురించి తెలుసుకోవడానికి ఆమె కొంత మంది వ్యక్తులను కలుసుకుంటుంది. ఆ క్రమంలో ఆమెకు ఎలాంటి విషయాలు తెలిశాయి అనే కోణంలో సినిమాను స్టార్ట్ చేశాడు దర్శకుడు జీవన్ రెడ్డి. జార్జిరెడ్డి చిన్నతనం నుండి సినిమా ప్రారంభం అవుతుంది. ఆయన చిన్నతనంలో ఎలా ఉండేవాడు? ఆయన ఆలోచనలు చిన్నప్పుడే ఎలా ఉండేది? అనే కోణంలో సినిమాను స్టార్ట్ చేసిన దర్శకుడు జీవన్ రెడ్డి ఆయన మనస్తత్వాన్ని తొలి సన్నివేశాల్లోనే ఆవిష్కరించాడు. అలాగే పెద్దయిన తర్వాత జార్జిరెడ్డి కాలేజీ బస్సులో ఆకతాయిల ఆగడాలను ఆట్టకట్టించడంతో ఆయన హీరోయిజాన్ని ఎలివేట్ చేశాడు. ఆ క్రమంలో ఆయన క్యాంటీన్ విద్యార్థులకు సరైన భోజనాన్ని అందించడంలో, స్కాలర్ షిప్స్ను అర్హులకు వచ్చేలా చేయడంలో, అమ్మాయిలను ఏడిపించే గ్యాంగుల పని పట్టడంలో, బయట వారిని క్యాంపస్లోని రాకుండా చూడటంలో అగ్ర వర్ణాల వారు తక్కువ కులాల వారిని చిన్న చూపు చూడకుండా ఆడ్డుపడటంలో ఎలా పోరాడాడు అనే విషయాలను కళ్లకు కట్టినట్లు చూపించాడు దర్శకుడు. దీంతో పాటు సినిమాలో మాయ అనే అమ్మాయి జార్జిరెడ్డిని ఎందుకు ఇష్టపడింది అనే అంశాన్ని కూడా వన్ సైడ్ లవ్ యాంగిల్లో చూపాడు దర్శకుడు. అలాగని జార్జిరెడ్డి కేవలం కాలేజీలో జరిగే గొడవల్లోనే ముందుండేవాడు కాదు.. చదువులోనూ టాపర్. ఎమ్మెస్సీలో గోల్డ్ మెడలిస్ట్గా నిలిచారని ఆయనలోని మరో కోణాన్ని కూడా ఆవిష్కరించాడు. కాలేజీల్లో ఇతర విద్యార్థి సంఘాలు, ఆ సంఘాల నాయకులు జార్జిరెడ్డికి ఎందుకు వ్యతిరేకంగా మారారని కూడా సినిమాలో చూపెట్టారు. ఇవన్నీ ప్రేక్షకులను ఆకట్టుకునేవే. ఇక సినిమా సెకండాఫ్లో అంతా రైతు సమస్యలపై జార్జిరెడ్డి పోరాటాన్ని చూపెట్టడంలోనే ఎక్కవ సమయాన్ని తీసుకున్నారు. ఈ సన్నివేశాలు డ్రాగింగ్గా అనిపిస్తాయి. సన్నివేశాల్లో ఎమోషన్స్ బలంగా అనిపించవు. అలాగే కథనం గ్రిప్పింగ్గా లేదు. సన్నివేశాల మధ్య ఉన్న ఫ్లో మిస్ అయ్యింది. పాటలన్నీ కథానుసారం సాగేవే. సురేష్ బొబ్బలి సంగీతం, హర్షవర్ధన్ రామేశ్వర్ నేపథ్య సంగీతం బావున్నాయి. సుధాకర్ యెక్కంటి సినిమాటోగ్రఫీ, గాంధీ నడికుడికార్ ఆర్ట్ వర్క్ అన్నీ బావున్నాయి.
బయట వ్యక్తులు కాలేజీలోకి రానీయకుండా జార్జిరెడ్డి అడ్డుకున్నాడు. దానికి సంబంధించిన జరిగిన గొడవలను మనసులో పెట్టుకున్న కొందరు పథకం ప్రకారం జార్జిరెడ్డిని హత్య చేశారని సినిమాలో చూపించారు. సినిమాలో చాలా సన్నివేశాల్లో సినిమాటిక్ లిబర్టీనీ తీసుకున్నారని అర్థమవుతుంది. ఎందుకంటే సినిమాలో జార్జిరెడ్డి నేపథ్యాన్ని చూపించిన విధానం, ప్రచారంలో ఉన్న కథనం ప్రకారం ఆయన నేపథ్యానికి సంబంధమే లేదు. అలాగే సినిమా విడుదలను కొందరు వ్యతిరేకించారు. కానీ దర్శకుడు జీవన్ ఎవరి మనోభావాలు దెబ్బతినకుండా సినిమాను తెరకెక్కించారు.
పాత్రధారుల విషయానికి వస్తే `వంగవీటి` సినిమాలో టైటిల్ పాత్రలో నటించిన సందీప్ మాధవ్ ఈ సినిమాలో టైటిల్ పాత్రధారి జార్జిరెడ్డిగా అద్భుతంగా నటించారు. నేటితరం యువతకు జార్జిరెడ్డి గురించి సరిగా తెలియదు. సందీప్ను చూస్తే ఇతనే జార్జిరెడ్డినేమో అనుకునేంతగా తను పాత్రలో ఒదిగిపోయాడు. జార్జిరెడ్డి తల్లిగా నటించిన మరాఠి నటి దేవిక, హీరోయిన్ ముసాన్, స్నేహితులుగా నటించిన అభయ్, వినయ్ వర్మ, కీలక పాత్రలో నటించిన సత్యదేవ్, మనోజ్ నందం, చైతన్యకృష్ణ తదితరులు వారి వారి పాత్రలకు న్యాయం చేశారు.
చివరగా.. జార్జిరెడ్డి.. బయోపిక్ను చేయాలనుకోవడమే గొప్ప అటెంప్ట్ అని చెప్పాలి. ప్రచారంలోని కొంత కథ, తనకు దొరికిన కొంత సమాచారం మేరకు దర్శకుడు జీవన్ రెడ్డి ఈ చిత్రాన్ని తెరకెక్కించినట్లు అర్థమవుతుంది. ప్రయత్నం మంచిదే అయినా సన్నివేశాలను ఆసక్తికరంగా ఆకట్టుకునేలా తెరకెక్కించి ఉండుంటే బావుండేది.
రేటింగ్: 2.5/5