యువతకు దేశంలోనే అతి పెద్ద బ్యాంకు లో అప్రెంటిస్ శిక్షణ పొందే అవకాశం లభించింది. మొత్తం 8500 ఖాళీలతో ఎస్ బీఐ (SBI) నోటిఫికేషన్ ను ప్రకటించింది. ఇది శాశ్వత ఉద్యోగం కాదు. పరిమిత కాల శిక్షణ మాత్రమే. తెలుగు రాష్ట్రాల్లో మొత్తం 1080 ఖాళీలు ఉన్నాయి. ఆంధ్రప్రదేశ్ లో 620, తెలంగాణలో 460 ఖాళీలు ఉన్నాయి. ఏదైనా డిగ్రీ పూర్తి చేసిన వారు వీటికి దరఖాస్తు చేసుకోవచ్చు. బ్యాంకింగ్ రంగంలో అత్యుత్తమ ఉద్యోగ నైపుణ్యాలను మెరుగుపరచుకోవచ్చు.
దరఖాస్తు ఇలా :
వయసు 20-28 ఏళ్లు ఉండాలి. ఏదైనా డిగ్రీ పూర్తి చేసిన వారు ఆన్లైన్లో దరఖాస్తు చేసుకోవాలి. జనరల్, ఓబిసి, ఈ డబ్ల్యూఎస్ అభ్యర్థులకు పరీక్ష ఫీజు రూ. 300 చెల్లించాల్సి ఉంటుంది. ఎస్సీ, ఎస్టీ, పిడబ్ల్యుడి వారికి అలాంటి రుసుము చెల్లించనవసరం లేదు. చివరి తేదీ 10/12/2020. ఆన్లైన్ పరీక్షను జనవరి 2021లో నిర్వహిస్తారు.
ఎంపిక విధానం :
ఈ అప్రెంటిస్ షిప్ అభ్యర్థుల ఎంపికను 2 దశల్లో నిర్వహిస్తారు. మొదటిది ఆన్లైన్ రాత పరీక్ష, రెండోది ప్రాంతీయ భాషలో రాతపరీక్ష. ఇందులో వంద మార్కులకు ప్రశ్నాపత్రం ఉంటుంది. జనరల్ ఇంగ్లీష్, క్వాంటిటేటివ్ ఆప్టిట్యూడ్, రీజనింగ్ ఎబిలిటీ అండ్ కంప్యూటర్ ఆప్టిట్యూడ్, జనరల్ & ఫైనాన్షియల్ అవేర్నెస్. ఈ నాలుగు విభాగాల నుంచి 25 ప్రశ్నల చొప్పున మొత్తం 100 మార్కులు ప్రశ్నాపత్రాన్ని ఇస్తారు. ప్రతి విభాగానికి 15 నిమిషాల చొప్పున సమయాన్ని కేటాయిస్తారు. పరీక్షా సమయం ఒక గంట వ్యవధి. మొదటి దశలో ఎంపికైన వారిని రెండో దశ స్థానిక భాష సామర్ధ్య పరీక్షను నిర్వహిస్తుంది. ఒకవేళ అభ్యర్థులు స్థానిక భాషలో ఒక సబ్జెక్టుగా చదివి ఉంటే లోకల్ లాంగ్వేజి టెస్ట్ రాయాల్సిన అవసరం లేదు. ఇతరులు మాత్రం తప్పనిసరిగా అర్హత సాధించాల్సి ఉంటుంది. ఈ రెండు దశల్లో ఎంపిక అయితే వైద్య పరీక్షలు నిర్వహించి అప్రెంటిస్ షిప్ నకు ఎంపిక చేస్తారు.
మూడేళ్లపాటు శిక్షణ :
డిగ్రీ పూర్తి కాగానే నిజమైన వృత్తి నైపుణ్యాన్ని సాధించాలంటే అప్రెంటిస్ షిప్ చేయాలి. దీనివల్ల అభ్యర్థులు సంస్థలోని వాస్తవ పని వాతావరణానికి అలవాటు పడటంతో పాటు ఆత్మవిశ్వాసాన్ని పెంపొందించుకోగలరు. అప్రెంటిస్ షిఫ్ చేసిన వారికి ఉద్యోగాల ఎంపిక లోను ప్రాధాన్యం లభిస్తుంది. అయితే ఇది శాశ్వత ఉద్యోగం కాదు. ఎంపికైతే మూడేళ్ల పాటు మాత్రమే అభ్యర్థులు అప్రెంటిస్ శిక్షణ పొందుతారు. వీరికి మొదటి సంవత్సరం రూ.15000, రెండో సంవత్సరం రూ. 16500, మూడవ సంవత్సరం రూ.19000 వేతనంగా ఇస్తారు. ఇతర అలవెన్సులు ఏమీ ఉండవు. దీనికి గతంలో అప్రెంటీస్ శిక్షణ తీసుకున్న, ఉద్యోగ అనుభవం ఉన్నవారు అనర్హులు.
