(న్యూస్ ఆర్బిట్ డెస్క్)
పన్నెండు రోజుల పాప సీసాలోంచి పాలు తాగుతుండగా గొంతుకు అడ్డం పడ్డాయి. ఊపిరి కష్టమైపోయింది. తల్లి పాపను తీసుకుని ఆసుపత్రికి వెళుతోంది. ఎమర్జన్సీ కదా, కారు వేగంగా నడుపుతోంది. పరిమితికి మించిన వేగంతో కారు నడుపుతున్నందుకు ఓ పోలీసు అధికారి ఆ కారును ఆపాడు. పాపకు ఏమయిందోనని ఆందోళనగా ఉంది కదూ?
పాపకు ఏం కాలేదు. నిజానికి పోలీసు అధికారి కారును ఆపినందువల్లనే ఆ పాప ప్రాణాలు నిలిచాయామో! అమెరికా, దక్షిణ కరోలీనాలో ఈ సంఘటన జరిగింది. బర్కిలీ కౌంటీ డిప్యూటీ డబ్ల్యు కింబ్రో వేగంగా వెళుతున్న కారు ఆపగానే అందులో ఉన్న పాప తల్లి విషయం వివరించింది. కింబ్రో పాపను చేతుల్లోకి తీసుకున్నాడు. వెంటనే ఏదో ఒకటి చేయకపోతే కష్టం అన్న విషయం అతనికి అర్ధం అయింది.
వెంటనే ఆతను పాపకు ప్రాధమిక చికిత్స మొదలుపెట్టాడు. పాప గుండెలపై మసాజ్ చేస్తూ, గాలి లోపలకు వెళ్లేందుకు పాప నోట్లో వేలు పెట్టి ఆడిస్తూ ఎమర్జెన్సీ వైద్య సహాయం వచ్చేంతవరకూ పాప ప్రాణాలు పోకుండా కాపాడాడు. కింబ్రో చేసిన పని వీడియోను బర్కిలీ కౌంటీ షరీఫ్ కార్యాలయం ఫేస్‌బుక్‌లో పోస్టు చేసింది. దీనికి సోషల్ మీడియాలో మంచి స్పందన వచ్చింది.
Video Courtesy: Inside Edition
