(న్యూస్ ఆర్బిట్ డెస్క్) : రెండవ ప్రపంచ యుద్ధ కాలంలో ఆ దీవి బ్రిటిష్ సేనలకు కమాండింగ్ సెంటర్. తర్వాత జపాన్ స్వాధీనమయింది. అనంతరం అమెరికా సేనలు భీకరమైన యుద్ధంలో ఆ దీవిని తిరిగి వశపరచుకున్నాయి. ఇంత చరిత్ర ఉన్నఈ దీవి విస్తీర్ణం 2.08 చదరపు కిలోమీటర్లు మాత్రమే. అంత చిన్న దీవి కోసం ఇంత గొడవ ఏమిటనుకుంటున్నారా. ఆ దీవికి సహజసిద్ధంగా ఏర్పడిన డీప్వాటర్ పోర్టు ఉంది. అదే ఆ దీవి గిరాకీకి కారణం. అలాంటి దీవిని ఇప్పుడు చైనా 75 ఏళ్లకు లీజుకు తీసుకుంది. ఈ పరిణామంతో పాశ్చాత్య దేశాలు గతుక్కుమన్నాయి.
దక్షిణ పసిఫిక్ దేశమైన సాలమన్ దీవుల్లో తులాగి ద్వీపం ఒకటి. అమెరికా, ఆస్ట్రేలియా మధ్య సముద్రమార్గంలో సాలమన్ దీవులు ఉన్నాయి. ఈ మధ్యనే సాలమన్ దీవుల ప్రభుత్వం తైవాన్కు ఇచ్చిన దౌత్య గుర్తింపును ఉపసంహరించుకుని చైనాను గుర్తిస్తున్నట్లు ప్రకటించింది. ఆ తర్వాత కొద్ది రోజులకే చైనా కమ్యునిస్టు పార్టీతో సన్నిహిత సంబంధాలు ఉన్న చైనా శామ్ అనే కంపెనీ తులగి దీవిని ఒక రహస్య ఒప్పందం కింద లీజుకు తీసుకుంది.
తులాగి ద్వీపంలో పెట్టుబడులు, వాణిజ్యం, మౌలిక సదుపాయాలు, వ్యవసాయం, మత్స్య పరిశ్రమ, కమ్యునికేషన్లు, టూరిజం అభివృద్ధి లక్ష్యంగా తులాగిని 75 సంవత్సరాలకు తీజుకు తీసుకున్నట్లు ఒప్పందం చెబుతోంది. అయితే కీలకమైన ప్రాంతంలోని తులాగీ దీవిని మిలటరీ అవసరాలకు వినియోగించుకోవడమే చైనా ఉద్దేశమని అమెరికా, ఆస్ట్రేలియా అనుమానిస్తున్నాయి. తులాగి జనాభా వెయ్యికి కాస్త ఎక్కువగా ఉంటుంది. తమ ప్రభుత్వం ఇలా మొత్తం ద్వీపాన్ని గంపగుత్తగా లీజుకు ఇచ్చారని తెలిసి అక్కడి ప్రజలు ఆగ్రహావేశాలు వ్యక్తం చేస్తున్నారు.
Photos Credit: The New York Times