ఎండుమిర్చి.. అనగానే హాట్ హాట్ ఘాటు, కారం గుర్తుకొస్తాయి. అయితే, వీటిని ఎక్కువగా తినడం వల్ల కడుపులో అల్సర్లు, ఇతర అనారోగ్య సమస్యలు వస్తాయని వైద్యులు హెచ్చిరిస్తుంటారు. చాలా మందికి ఘాటు హాటు కారంతో వండిన ఆహార పదర్థాలు తినాలని కోరిక ఉన్నా.. వైద్యుల హెచ్చరికల నేపథ్యంలో వాటికి దూరంగా ఉంటారు. మరి కొందరైతే అవేవీ పట్టించుకోకుండా వాటిని ఆస్వాదిస్తుంటారు. ఈ నేపథ్యంలోనే అమెరికాకు చెందిన పరిశోధకులు ఎండు మిరపకాయలకు సంబంధించి పలు ఆసక్తికరమైన విషయాలను వెల్లడించారు.
ఆ విషయాలు వింటే అయ్య బాబోయ్ ఎండు మిరపకాయలు ఇంత పని చేస్తాయా? అరే మనం ఇన్ని రోజులు మిస్సయ్యామే అనుకుంటారు. అదేంటి అనుకుంటున్నారా? ఎండు మిర్చి తినడం వల్ల సమస్యలు రావడం గురించి పక్కన బెడితే.. .దాని తినడం వల్ల అనేక రకాల లాభాలు ఉన్నాయని అమెరికాకు చెందిన ఓ పరిశోధన బృందం వెల్లడించింది. మరీ ముఖ్యంగా అకాల మరణం, గుండె సంబంధ వ్యాధులు, ఊపిరితిత్తుల సమస్యలు, క్యాన్సర్ వంటి రోగాలు దరిచేరే అవకాశం చాలా తక్కువగా ఉంటుందని పేర్కొంది. అలాగే, ఆయుష్షును సైతం పెంచుతుందని అమెరికన్ హార్ట్ అసోసియేషన్ అధ్యయనం వెల్లడించింది.
ఘాటు, కారం కలిగిన ఈ మిరపకాయలను ఆహారంగా తీసుకోవడం వల్ల చాలా రకాల ఆరోగ్య ప్రయోజనాలు ఉన్నాయని తెలిపింది. శరీరంలో ఏర్పడే కణితలను అడ్డుకోవడంతో పాటు రక్తంలో గ్లూజోజ్ స్థాయిలను నియంత్రణలో ఉంచి, మెరుగైన రక్త ప్రసరణకు తోడ్పడుతుందని తెలిపింది. క్యాన్సర్ వ్యాధులను అడ్డుకునే నిరోధకాలు సైతం భారీగా పెరుగుతాయని వివరించింది. ఆయా ఆరోగ్య సమస్యలను దాదాపు 25 శాతం వరకూ తగ్గిస్తుందని తమ అధ్యయనంలో వెల్లడైందని పరిశోధకులు తెలిపారు. ఘాటు, కారం ఎక్కువగా ఉండే ఎండు మిరపకాయలను సైతం ఆహారంగా తీసుకోవడం మంచిదేనని సూచించారు.
అమెరికా, చైనా, ఇటలీ వంటి దేశాలకు చెందిన దాదాపు 5.70,000 మందికి పైగా ప్రజలపై తాము వారు తీసుకునే ఆహారం. ఆరోగ్యం, ఇతర సమస్యలు వంటి అంశాలపై జరిపిన పరిశోధనలో ఈ విషయాలు వెల్లడయ్యాయని క్లీవ్ల్యాండ్ క్లినిక్ పరిశోధకుడు కార్డియాలజిస్ట్ బోజు చెప్పారు. ఈ ఫలితాలు మరిన్ని ప్రయోగాలకు బాసటగా నిలుస్తాయని యూఎస్ హార్ట్ అసోసియేషన్, పెన్సిల్వేనియా స్టేట్ యూనివర్శిటీకి చెందిన పోషకాహార నిపుణుడు పెన్నీ క్రిస్-ఈథర్టన్ అన్నారు. మరణం ముప్పును తగ్గించడంలోనే కాదు శరీరంలోని కొవ్వును తగ్గించడం, ఇతర నొప్పుల నుంచి ఉపశమనం కలిగించడంలో ఉపయోగపడుతోంది. జీర్ణ వ్యవస్థ పని తీరును సైతం ఎండు మిర్చి మెరుగుపరుస్తుంది.