Fish: సాధారణంగా మనుషులకి 100 సంవత్సరాలు ఆయుష్ అంటారు. అలాగే తాబేళ్లు 300 సంవత్సరాలు పైగా బ్రతుకుతాయట. ఇంకా కుక్కల విషయానికి వస్తే అవి దాదాపుగా 15 సంవత్సరాలు బ్రతుకుతాయి. అదే చేప ఆయుర్ధాయం ఎంత ఉంటుంది? చాలా తక్కువ అని మనం అనుకుంటాం కానీ అలా అనుకుంటే పొరపాటే.… జపాన్ కు చెందిన ఈ చేప ఏకంగా 226 ఏళ్లు బ్రతికిందట. వినడానికి ఆశ్చర్యంగా ఉన్నా ఇది నిజం. చరిత్రలోనే ఓ చేప ఇన్ని సంవత్సరాలు బ్రతకడం ఇదే మొదటిసారి.
ఈ చేప పేరు హనాకో. ఈ చేప 1751 లో పుట్టింది. అంతేకాదు ఈ చేపని డాక్టర్ కోమెయి కోషిహరా అనే వ్యక్తి పెంచుకునేవారు. ఈ చేప 1751 నుంచి 1970 వ సంవత్సరం వరకు జీవించింది. హనాకో గురించి కోమెయి కోషిహరా తొలిసారి 1966 వ సంవత్సరంలో ప్రపంచానికి తెలిపారు. ఈ చేప గురించి ఓ ప్రముఖ రేడియో స్టేషన్లో ఆయన మాట్లాడుతూ తన కాలేజ్లో పనిచేస్తున్న ప్రొఫెసర్ మసయూకి అమానో సహాయంతో హనాకో ఆయుర్ధాయం తెలుసుకోగలిగానని చెప్పారు.
ప్రొఫెసర్ మసయూకి అమానో జంతువులపై పరిశోధనలు చేస్తూ ఉంటారు. ఇక హనాకో బరువు విషయానికి వస్తే అది 7.5 కేజీల బరువు మరియు 70 సెం.మీ. ల పొడవు ఉండేదట. హనాకో చేపని తనకు తన అమ్మమ్మ ఇచ్చారని, వాళ్ళ అమ్మమ్మకు దీన్ని ఆమె అత్తగారు ఇచ్చారని చెప్పుకొచ్చారు. ఈ చేపను చాలా జాగ్రత్తగా చూసుకోమని ఆమె సూచించిందని అన్నారు. ‘ఫెంగ్ షూయ్’ అనే జపాన్ వాస్తు శాస్త్రం ప్రకారం అక్కడి ప్రజలు కోయి చేపను అదృష్టానికి సూచికగా భావిస్తారట.