`జెంటిల్మ్యాన్`, `నిన్నుకోరి`, `జై లవకుశ` చిత్రాలతో తెలుగువారికి బాగా చేరువైన మలయాళ నటి నివేదా థామస్. కల్యాణ్రామ్ సరసన ఆమె నటించిన `118` శుక్రవారం విడుదల కానుంది. ఈ సినిమా గురించి నివేదా థామస్ ఇచ్చిన ఇంటర్వ్యూ
* ఏంటి `118` సస్పెన్స్ థ్రిల్లరా?
– అవునండీ. అది సస్పెన్స్ థ్రిల్లర్. మిస్టరీ కూడా ఉంటుంది.
* అసలు కథ ఏంటి?
– డ్రీమ్ని ఫాలో కావడమే అండీ. సస్పెన్స్, థ్రిల్లింగ్, ఫిక్షన్ తరహాలో సాగుతుంది. ట్రైలర్లోనూ `ఇట్స్ ఎ మెడికల్ మిరాకిల్` అని వినే ఉంటారుగా. ఆ మెడికల్ మిరాకిల్ ఏంటనేది సినిమాలో చూసి తెలుసుకోవాలి.
* మీ పాత్ర సినిమా అంతా ఉంటుందా?
– ఆఖరి 20 నిమిషాల పాటు సాగుతుంది. నా పాత్ర పేరుగానీ, నా పాత్ర గురించి కానీ ప్రస్తుతానికి సస్పెన్స్. కల్యాణ్రామ్, శాలినీ పాండే పాత్రల గురించి మాత్రం బయటికి చెబుతున్నారు.
* అంత తక్కువ నిడివి ఉన్న పాత్ర చేయడానికి కారణం?
– సినిమా అంతా ఉంటే ఎంత ఇంపాక్ట్ ఉంటుందో, ఈ నిడివిలోనూ అంతే ఇంపాక్ట్ గా చేయవచ్చు. నిజం చెప్పాలంటే వాటికన్నా ఈ సినిమా కోసమే చాలా జాగ్రత్తగా చేశాను. ఎక్స్ ట్రా కేర్ తీసుకున్నా.
* ఇలాంటి కలల గురించి మీరు నమ్ముతారా?
– ఇది నిజంగా గుహన్గారికి అనుభవంలోకి వచ్చిన విషయం. అయితే ఆయన కలను వెతుక్కుంటూ వెళ్లలేదు. కానీ ఈ సినిమాలో హీరో మాత్రం కలను వెతుక్కుంటూ వెళ్లాడు. తేడా అదే.
* మీకు ఎప్పుడైనా కల నిజమవుతున్నట్టు అనిపించిందా?
– రోజూ తెల్లారుజామున ఒకే కల వచ్చి అది నెరవేరుతున్నట్టు అనిపిస్తే ఎవరికైనా ఎంత భయమేస్తుందండీ. నాకు అలాంటివేమీ రాలేదు. కాకపోతే కొన్నిసార్లు ఎక్కడికైనా వెళ్లినప్పుడు అలా అంతకుముందు కూడా ఎప్పుడో వెళ్లినట్టు కొన్ని సెకనుల పాటు ఫీలింగ్ ఉంటుంది అంతే.
* ఎన్టీఆర్ మీ పాత్ర గురించి చాలా మెచ్చుకున్నారు
– నాకు ఎన్టీఆర్ అంటే చాలా ఇష్టం. ఒక నటుడిగా, సహ నటుడిగా ఆరాధిస్తాను. అలాంటి వ్యక్తి స్టేజీ మీద అలా చెబుతుంటే కాస్త అసౌకర్యంగానే అనిపించింది. కానీ అంతకు మించిన అందమైన భావన కూడా కలిగింది.
* ఈ సినిమాకు ముందు అన్వేషణ అని టైటిల్ పెడదామనుకున్నారా?
– అంటే చాలా టైటిళ్లు అనుకున్నాం. `భానుప్రియ`గారి `అన్వేషణ`కు మా సినిమాకూ ఏమీ పోలికలు ఉండవు. కాకపోతే టైటిల్ కోసమే ఆలోచించాం. ఏం టైటిల్ పెట్టాలా అని ఆలోచించిన వాళ్లలో నేను కూడా ఉన్నా. బుర్రబద్ధలు కొట్టుకున్నా.
* సినిమాలో మీ భాగస్వామ్యం ఎంతవరకు ఉంటుంది?
– కల్యాణ్రామ్కి ఓ విజన్ ఉంది. ప్రతిదీ ఆయన షేర్ చేసుకుంటారు. ఒక సినిమా చేసేటప్పుడు ఎంత వరకు జోక్యం చేసుకోవాలో నాకు బాగా తెలుసు. ఈ సినిమా విషయంలో కొంచెం చనువుంది, పైగా నచ్చిన సబ్జెక్ట్ కాబట్టి వెంటనే చేస్తున్నా.
* మీ మలయాళీలంతా తెలుగులోకి వస్తున్నారు. త్వరలోనే తెలుగమ్మాయిలు మీకు గట్టి పోటీ ఇస్తారులెండి…
– ఇవ్వనివ్వండి. అయినా పోటీ అంటూ మొదలయ్యాక తెలుగు అమ్మాయిలతోనే ఎందుకు? అబ్బాయిలతోనూ పోటీ పడవచ్చుగా. అయినా నాకు పోటీ ఒకరితో ఎప్పుడూ ఉండదు. నాతో నాకే ఉంటుంది. ఉదాహరణకు ఈ మధ్య `118`కు తెలుగులో డబ్బింగ్ చెప్పుకున్నా. బాగా చెప్పానో లేదోనని ఒకటే టెన్షన్. అక్కడున్నవారి బుర్ర తినేశాననుకోండి.
* ఆ మధ్య బాగానే బ్రేక్ తీసుకున్నారు?
– కావాలని తీసుకున్నది కాదండీ. నేను ఆర్కిటెక్చర్ చదువుతున్నా. అందులోనూ కష్టమైన ప్రాజెక్ట్ తీసుకున్నా. అందుకే గ్రౌండ్ లెవల్లో వర్క్ చేయాల్సి వచ్చింది. ఆ సమయంలో అటు ప్రాజెక్టు, ఇటు సినిమాలు అంటే నా వల్ల అయ్యేది కాదనిపించింది. అందుకే షూటింగుల్లో పాల్గొనలేదు. కథలు మాత్రం చాలానే విన్నా. అందులో 118 కూడా ఒకటి. నచ్చగానే చేశా.
* ఎలాంటి పాత్రల్లో నటించాలనుకుంటున్నారు?
– నాలుగు పాటలకు డ్యాన్సులు వేసి వెళ్లమంటే నాక్కూడా సులువుగానే ఉంటుంది. చేసేస్తాను. కానీ అంతకు మించి చేయాలి. స్క్రీన్ మీద నన్ను చూసినప్పుడు ప్రేక్షకులకు వారిలో ఒకమ్మాయిగా కనిపించాలి. అప్పుడు ఆ పాత్ర చేయడంలో చాలెంజ్ ఉంటుంది.
* ఇప్పుడేం చేస్తున్నారు?
– బ్రోచేవారెవరురాలో కామెడీ చేస్తున్నా. తొలిసారి కామెడీ రోల్ చేస్తున్నా. నిఖిల్తో `శ్వాస` మార్చి మధ్యలో మొదలవుతుంది. దాంతో పాటు కొన్ని తమిళ సినిమాలు చర్చల్లో ఉన్నాయి.
previous post
next post
Mogalirekulu: నీకెంతా బలుపు రా?.. మొగలిరేకులు ఫేమ్ ఆర్కే నాయుడు పై సీనియర్ నటి ఫైర్..!