ఉమ్మడి కృష్ణా జిల్లాలోని కీలకమైన నియోజకవర్గం గుడివాడ. ఇక్కడ నుంచి వరుసగా నాలుగు సార్లు గెలుపు గుర్రం ఎక్కుతున్న కొడాలి నాని.. తనకు తిరుగులేదనే విధంగా ప్రచారం చేసుకుంటున్నారు. అంతేకాదు.. సాధారణంగా ఏ నాయకుడైనా తన చేతల ద్వారా ప్రజలకు చేరువ అవుతారు. కానీ, నాని విషయం డిఫరెంట్. ఆయన నోటికి పనిచెబుతారు. బూతులతో విరుచుకుపడతారు. తన మన అనే తేడా లేకుండా.. ఏ విషయంపైనైనా.. తన నోటికి పనిచెప్పి.. విమర్శలతో విరుచుకుపడుతున్నారు.
అంతేకాదు.. గత 20 ఏళ్లుగా ఎమ్మెల్యేగా ఉన్న నాని నియోజకవర్గంపై కంటే కూడా.. వ్యక్తిగతంగా తన ఇమేజ్ను పెంచుకునే పనిలోనే ఉన్నారు. తెల్లారిలేస్తే.. విపక్షాలపై విరుచుకుపడడం.. వ్యక్తిగతంగా వారిని దూషించడమే ఆయన దైనందిన పనిగా పెట్టుకున్నారు. అయితే.. ఇప్పటి వరకు ఆయన రాజకీయాలు ఇలానే సాగిపోయాయి. దీనికి కారణం.. ఆయనకు సరైన ప్రత్యర్థి లేక పోవడం. బలమైన నాయకుడు ఆయనపై పోటీ చేయకపోవడమే.
కానీ, రోజులన్నీ ఒకేలా ఉండనట్టే.. ఇప్పుడు కొడాలి నాని రాజకీయం కూడా మారిపోతోంది. బలమైన నాయకుడు.. ప్రజలకు చేరువయ్యే నాయకుడు.. ఇప్పుడు గుడివాడ గడ్డపై తన సత్తా చాటుతున్నారు. ఆయనే వెనిగండ్ల రాము. గత ఏడెనిమిది మాసాలకుపైగానే ఆయన ఇక్కడ తన ముద్ర వేస్తున్నారు. టీడీపీ తరఫున ఆయన ఇక్కడ నుంచి పోటీ చేయనున్నారు. చంద్రబాబు ఆశీస్సులతో ఎన్నారైగా ఉన్న వెనిగండ్ల రాము ప్రత్యక్ష రాజకీయాల్లోకి అడుగు పెట్టారు.
దీనికి ముందే ఆయన గుడివాడలో అనేక సేవా కార్యక్రమాలకు శ్రీకారం చుట్టారు. ఆర్తికంగా బలంగా ఉన్న నాయకుడు కావడం.. నియోజకవర్గంపై పట్టు పెంచుకోవడం.. స్థానికులతో మమేకం కావడం.. ప్రస్తుత ఎమ్మెల్యే నాని చేస్తోన్న ప్రజా వ్యతిరేక పనులు తన వద్దకు వచ్చేవారిని ఖసురు కోవడం.. మీకు ఎంత చేసినా పరగడుపే అంటూ చీదరించుకోవడం వంటివాటికి వెనిగండ్ల చెక్ పెడుతున్నారు. సమస్యల్లో ఉన్నవారు ఎంతటి వారైనా.. ఎంత దిగువస్థాయి సామాజిక వర్గమైనా.. తాను ముందుంటున్నారు.
మురికి వాడల్లోనూ వెనిగండ్ల పర్యటిస్తున్నారు. ప్రతి ఒక్కరినీ పలకరిస్తున్నారు. వారి సమస్యలు తెలుసుకుంటున్నారు. ఉదయం నుంచి రాత్రి వరకు వివిధ కార్యక్రమాలతో ఆయన నిత్యం ప్రజల్లోనే ఉంటున్నారు. వారి సమస్యలు ఓపిగ్గా వింటున్నారు. పరిష్కారానికి దారులు చూపిస్తున్నారు. ఇదేసమయంలో కొడాలి నాని ఫైర్ రాజకీయాలకు భిన్నంగా.. ఆయన ఎక్కడా విమర్శలు చేయడం లేదు. పనులు చేసుకుని పోతున్నారు.
నేనున్నాను.. గుడివాడను మారుస్తాను! అనే నినాదంతో రాము.. ప్రజలకు చేరువయ్యారు. ఫలితంగా ఇప్పుడు గుడివాడలో కొడాలి కూసాలు కదులుతున్నాయి. వెనిగండ్ల రాకతో.. రెండు దశాబ్దాలుగా గుడివాడ అంటే.. బూతుల నేత అనేమాటను చెరిపేసే ప్రయత్నం చేస్తున్నారు. దీంతో గుడివాడలో సరికొత్త మార్పు కనిపిస్తోందని అంటున్నారు పరిశీలకులు.