(న్యూస్ ఆర్బిట్ డెస్క్) : పిల్లవాడికి పెద్ద చేప పడింది. ఎవరైనా ఇంటికి తీసుకువెళ్లి అమ్మకు ఇచ్చి కమ్మటి కూర వండించుకు తింటారు. కానీ ఆ బాలుడికి మనసు ఒప్పలేదు. దానిని మళ్లీ అక్కడే వదిలిపెట్టాడు. ఈ వీడియో ప్రస్తుతం ఆన్లైన్లో చూసినవారి మనసులను కదిలించివేస్తోంది.
ఈ సంఘటన ప్లోరిడాలో సంభవించింది. కెమారీ తన తండ్రితో కలిసి చేపలవేటకు వెళ్లాడు. తండ్రికి పడలేదు కానీ కుర్రవాడికి దాదాపు మూడు కిలోల బరువున్న పండుగప్ప పడింది. దానిని కెమారీ తిరిగి నీళ్లలో వదిలిపెట్టడాన్ని ఆ తండ్రి వీడియో తీసి యుట్యూబ్లో పోస్టు చేశాడు. వెంటనే అది వైరల్ అయింది.
వీడియోలో కెమారీ తనకుపడిన చేపను ముందు గర్వంగా తండ్రికి చూపిస్తాడు. అంత పెద్ద చేపను పట్టిన కుమారుడి ఆనందాన్ని తండ్రి వీడియోలో బంధిస్తుండగా కెమారీ అకస్మాత్తుగా అనూహ్యంగా ఈ బ్యూటీని తిరిగి నీటిలో వదిలిపెడదాం అంటూ చేపను నెమ్మదిగా నీటిలో వదులుతాడు. నీటిలో చేపను వెన్ను నిమిరుతూ, తిరిగివెళ్లి బాగా ఉండు అంటాడు. ఒక్క క్షణం అక్కడే ఉన్న చేప ఈదుకుంటూ వెళ్లిపోతుంది.
పిల్లవాడు ఆ చేపను వదలడం, దాని వెన్ను నిమరడం, దాని క్షేమం కోరడం..ఇవన్నీ కూడా నెటిజెన్స్ మనసు దోచుకున్నాయి. ఒకరయితే ఈ కుర్రవాడు ఎప్పటికయినా అమెరికా అధ్యక్షుడు కావాల్సిందే అని ట్వీట్ చేశారు.