డిసెంబర్ 21 జగన్ పుట్టిన రోజు నేపథ్యంలో చాలా మంది ప్రముఖులు పార్టీ కార్యకర్తలు ఆయనకు శుభాకాంక్షలు చెప్పుకొస్తున్నారు. సోషల్ మీడియాలో సినిమా ఇండస్ట్రీకి చెందిన వాళ్లు అదే విధంగా పలు రాజకీయ నాయకులు ఆయన పై ప్రశంసల వర్షం కురిపిస్తూ పరిపాలననీ మెచ్చుకుంటూ పోస్టులు పెడుతున్నారు.
ఈ క్రమంలో టాలీవుడ్ సూపర్ స్టార్ మహేష్ బాబు కూడా జగన్ కి పుట్టినరోజు శుభాకాంక్షలు ట్విట్టర్లో పెట్టారు. ‘సీఎం వైఎస్ జగన్ మోహన్ రెడ్డి గారికి పుట్టినరోజు శుభాకాంక్షలు. మీ విజన్ కృషితో ఆంధ్రప్రదేశ్ అభివృద్ధి వైపు పురోగమిస్తుంది. మీరు ఆయురారోగ్యాలతో ఎల్లప్పుడూ సంతోషంగా ఉండాలి’ అంటూ మహేష్ ట్వీట్ చేశారు.
దీంతో మహేష్ అభిమానులతో పాటు జగన్ ఫ్యాన్స్ కూడా మహేష్ పెట్టిన పోస్ట్ కి భారీగా రియాక్ట్ అవుతున్నారు. మొదటి నుండి వైయస్ ఫ్యామిలీ కి కృష్ణ ఫ్యామిలీ చాలా దగ్గరగా ఉండటంతో పాటు రాజకీయాలలో కూడా కృష్ణ మహేష్ ఫ్యాన్స్ వైసిపికి సపోర్ట్ చేస్తూ ఉండటంతో.. మహేష్ తాజాగా చేసిన ట్వీట్ సోషల్ మీడియాలో వైరల్ అవుతుంది. ఇదే క్రమంలో మంత్రి కేటీఆర్ సైతం జగన్ కి పుట్టినరోజు శుభాకాంక్షలు తెలిపారు. సీఎం వైఎస్ జగన్మోహన్ రెడ్డికి ఇది 48వ పుట్టినరోజు వేడుక. దీంతో రాష్ట్ర వ్యాప్తంగా ఉన్న వైసిపి పార్టీ క్యాడర్ భారీ స్థాయిలో సేవా కార్యక్రమాలు చేస్తూ మహిళలకు చీరలు పంచుతూ జగన్ జన్మదిన వేడుకలు ఘనంగా జరుపుకున్నారు.