Anasuya: హాట్ యాంక‌ర్, నటి అనసూయ భరధ్వాజ్ అంటే తెలియ‌ని వారుండ‌రు. సాక్షి టివి లో వ్యాఖ్యాతగా చేసిన అనసూయ.. బుల్లితెర‌పై ప్ర‌సారం అవుతున్న `జబర్దస్త్` కామెడీ షో ద్వారా యాంక‌ర్‌గా తొలి సారి ప్రేక్ష‌కుల‌ను ప‌ల‌క‌రించి సూపర్ క్రేజ్ ద‌క్కించుకుంది. ఆ త‌ర్వాత ఎన్నో టీవీ షోల‌కు హోస్ట్‌గా చేసిన ఈ బ్యూటీ.. `సోగ్గాడే చిన్నినాయనా` సినిమాతో వెండితెర‌పై మెరిసింది.
అప్ప‌టి నుంచీ ఓవైపు యాంక‌ర్‌గా బుల్లితెర‌పై దూసుకుపోతూనే.. మ‌రోవైపు సినిమాల్లో అవ‌కాశాలు ద‌క్కించుకుంటూ మంచి న‌టిగా గుర్తింపు పొందింది. ఇక‌పోతే అనసూయ ఏ విష‌యంలో అయినా ముక్కుసూటిగా మాట్లాడుతుంటారు. త‌నపై ఎవ‌రైనా ట్రోల్స్ చేసినా.. వాటికి ధీటుగా స‌మాధానం ఇస్తుంటుంది.
అయితే తాజాగా ఓ వెబ్ సైట్ వారు అనసూయ వ‌య‌సును 40 అంటూ ప్ర‌చురించారు. ఇది గ‌మ‌నించిన ఆమె.. ట్విట్ట‌ర్ వేదిక‌గా దిమ్మ‌తిరిగే రిప్లై ఇచ్చింది. `నాకు 40+ కాదు..నా వయసు 36. వ‌యస్సు పెరగడం అనివార్యం. నేను ఆ విష‌యంలో ఎప్పటికీ సిగ్గుపడను. వయసుకి తగ్గట్లుగా నేను అందంగా కనిపిస్తానని హామీ ఇస్తున్నాను. కానీ జర్నలిస్ట్ లు ఇలా తప్పుడు ప్రచారం మాత్రం చేయొద్దు. ఈ రోజుల్లో జర్నలిజం అనేది చాలా శక్తివంతమైన ఆయుధం.. దానిని సరిగ్గా నిర్వహించండి.` అంటూ ట్విట్ట‌ర్ ఖాతాలో అనసూయ రాసుకొచ్చింది.
దీంతో ఇప్పుడామె పోస్ట్ కాస్త నెట్టింట వైర‌ల్‌గా మారింది. కాగా, సినిమాల విష‌యానికి వ‌స్తే.. ఇటీవ‌ల `ఖిలాడి`తో ప్రేక్ష‌కుల ముందుకు వ‌చ్చిన అనసూయ ప్ర‌స్తుతం రంగ మార్తాండ, ప‌క్కా కమర్షియల్, పుష్ప 2 చిత్రాల్లో న‌టిస్తోంది. వీటిలో పాటు త‌మిళ్‌, మ‌ల‌యాళ భాష‌ల్లోనూ ప‌లు సినిమాల‌కు సైన్ చేసింది.