Insult to the Ambedkar statue: భారత రాజ్యాంగ నిర్మాత డాక్టర్ బిఆర్ అంబేద్కర్ విగ్రహాన్ని ఇద్దరు ఆకతాయిలు ఘోరంగా అవమానించడం తీవ్ర కలకలాన్ని రేపింది. రేపల్లె నియోజకవర్గం చెరుకుపల్లి మండలం గుళ్లపల్లి జిల్లా పరిషత్ హైస్కూల్ ఆవరణలో ఉన్న అంబేద్కర్ విగ్రహానికి ఇద్దరు యువకులు నోట్లో సిగరెట్ పెట్టి అవమానకరంగా దూషించారు. అంతే కాకుండా విగ్రహాం చెంపలపై కొడుతూ అసభ్యంగా ప్రవర్తించారు. దీనికి సంబంధించిన వీడియో సోషల్ మీడియాలో చక్కర్లు కొట్టడంతో పోలీసులు రంగ ప్రవేశం చేశారు. ఈ దుర్ఛర్యకు పాల్పడిన ఇద్దరు గౌడ సామాజిక వర్గానికి చెందిన యువకులను పోలీసులు అదుపులోకి తీసుకున్నారు.
ఈ ఘటనపై అంబేద్కర్ సేవా సంఘం, కొందరు యువకులు, గ్రామస్తులు పోలీస్ స్టేషన్ వద్దకు చేరుకుని అంబేద్కర్ ను ఘోరంగా అవమానపర్చిన నిందితులపై కఠిన చర్యలు తీసుకోవాలని డిమాండ్ చేస్తూ ధర్నా చేశారు. శుక్రవారం రాత్రి చెరుకుపల్లి పోలీస్ స్టేషన్ వద్దకు పెద్ద సంఖ్యలో యువకులు చేరుకుని ధర్నా నిర్వహించారు. ఘటనపై కేసులు నమోదు చేశామనీ, నిందితులు ఇద్దరిని అరెస్టు చేశామని వారిని కఠినంగా శిక్షిస్తామని పోలీసు అధికారులు ఆందోళనకారులకు హమీ ఇచ్చారు. ఈ ఘటనను రాష్ట్ర వ్యాప్తంగా మానవతావాదులు అందరూ తీవ్రంగా ఖండిస్తున్నారు.