రామ్ ట్వీట్లు రేపిన రచ్చ
ఓవైపు కుల పంచాయితీ ఎగిసి మంటలు రాజేస్తుంటే… అందుకు సినీ గ్లామర్ యాడయ్యింది. తెలుగు తెరపై లవ్, ఫ్యామిలీ సినిమాలతో దూసుకుపోతున్న హీరో రామ్ మొత్తం వ్యవహారాన్నంతా తనవైపు తిప్పేశాడు. స్వర్ణ ప్యాలెస్ ఘటన, ఆ తర్వాత రమేశ్ హాస్పటల్పై విచారణ వ్యవహారాన్ని ఒక కులానికి వ్యతిరేకంగా జరుగుతున్నాయన్న భావన కలిగిలే ఆయన చేసిన వరుస ట్వీట్లు రాష్ట్రంలో రచ్చకు కారణమయ్యాయి. రామ్ చేసిన ట్వీట్లు మొత్తం కుల పంకిలాన్ని తెలుగు నేలపై ఉన్న జాడ్యాన్ని గుర్తుచేశాయ్.
ఒకే ఒక్క ఘటన..?
హీరో రామ్కు తమ కుటుంబంపై అభిమానం ఉండటాన్ని ఎవరూ కాదనలేరు. కుటుంబంపై అభిమానం లేని వాడు సమాజంపై అభిమానం ఎలా చూపిస్తాడు. సదరు రమేశ్ హాస్పటల్ ఓనర్ తనకు స్వయంగా పెదనాన్న అయినప్పటికీ… ఎందుకో అంత ప్రేమో అర్థం కాదు. స్వర్ణప్యాలెస్ అగ్నిప్రమాదం ఘటనలో నిజానిజాలు కచ్చితంగా బయటకు వస్తాయ్. దోషులకు కచ్చితంగా శిక్ష పడుతుంది. అయితే మధ్యలో ఈ రాద్ధాంతం ఎందుకు? ఒక ఆసుపత్రిపై ఈగ వాలకుండా చేయాలన్న ఆ వర్గం చేసిన ప్రయత్నాలు రాజధాని ప్రాంతంలో మరోసారి కులం కత్తిని జనంపైకి విసిరింది. అమరావతికి మద్దతు రావడం లేదని కొందరు ఆ సామాజికవర్గం వ్యక్తుల రియాక్షన్కు తాజా యాక్షన్ దృశ్యాలే దుష్టాంతాలు. ఈ చిన్న విషయాన్ని హీరో రామ్ ఎందుకు అర్థం చేసుకోవడం లేదో…
అసలు కులం ఎందుకు?
రామ్ వరుస ట్వీట్లతో బెజవాడ పోలీసులు ఆగ్రహం ఎలా ఉంటుందో రుచిచూడాల్సి వచ్చింది. కంటికి కన్పించని శత్రువుతో పోరాటం చేస్తున్న మనావాళికి ఇప్పుడు కొత్త సమస్యలు తెచ్చిపెట్టింది స్వర్ణ ప్యాలెస్ ఘటన. కులం అంటే ఒక ఆత్మాభిమానం. ఒక గౌరవం. కులం ఎప్పుడు కూడా ఒక అస్తిత్వమే గానీ అది వ్యక్తి సామర్థ్యానికి గీటురాయి ఎంత మాత్రం కాదు… కానీ సమాజంలో ఒక కులమే టాప్ టు బాటమ్ నిర్ణేతగా మారాలని చూస్తే… ? హీరో రామ్ రియాక్ట్ అయిన తీరు అతనిని ఒక సామాజికవర్గానికి ఆపాదించేలా పరిస్థితులు కలగడం దారుణం. ఇప్పటికే ఒక మీడియా సమాజ పోకడలను శాసిస్తోందన్న విమర్శలు ఎక్కువగా విన్పిస్తున్నాయ్. ఇదే సమయంలో కొన్ని వ్యవస్థలు కూడా కొందరి ఆధీనంలోనే ఉంటే జరిగే ప్రమాదం ఊహించలేం. అది మన సమజాన్ని నిట్టనిలువునా చీల్చేస్తుంది.
కరోనా కంటే కుల వైరస్సే ప్రమాదం
తాజాగా రామ్ చేసిన మరో ట్వీట్తో ఈ వ్యాసాన్ని ముగిద్దాం. సోదర సోదరీమణులారా… కోరనా కంటే కుల వైరస్ చాలా వేగంగా వ్యాప్తి చెందుతుందంటూ రాసుకొచ్చాడు. ఇలా కుల పిచ్చను వ్యాప్తి చేసే వారి పట్ల అప్రమత్తంగా ఉండాలంటూ సందేశం ఇచ్చాడు. ఇదంతా కొంచెం ముందుగా ఆలోచించినట్టయితే బాగుండేది. విద్వేషాగ్ని చెలరేగేది కాదు. తమవారి కోసం ఏం చేసేందుకైనా కొందరు వెనుకాడరు. కానీ అందులో కులం అన్న విషం ఉంటే… పరిస్థితులు ఇలాగే మారిపోతాయ్… ఈ కథనానికి కొంచెం చరిత్ర జోడించి పార్ట్ 2లో అసలు కృష్ణా జిల్లాలో కుల పంకిలం… రాజకీయ సామాజిక పరిస్థితులపై ఎలా ముద్ర వేసిందో ఓసారి చూద్దాం…