NTR: స్వర్గీయ నందమూరి తారక రామారావు గారి మనవడిగా చిత్ర పరిశ్రమలోకి అడుగుపెట్టిన జూనియర్ ఎన్టీఆర్.. 1991లో వచ్చిన బ్రహ్మర్షి విశ్వమిత్ర సినిమా ద్వారా తొలిసారి వెండితెరపై మెరిశాడు. 2001 లో వచ్చిన నిన్ను చూడాలని సినిమాతో హీరోగా మారాడు. ఫ్యామిలీ నుంచి సరైన సపోర్ట్ లేకపోయినా తన ప్రతిభను నమ్ముకున్నాడు. గొప్ప నటుడిగా, అద్భుతమైన డాన్సర్ గా పేరు తెచ్చుకున్నాడు. 20 ఏళ్లకే భారీ స్టార్డమ్ ను సంపాదించుకున్నాడు. తాతకు తగ్గ మనవడినని నిరూపించుకున్నాడు. టాలీవుడ్ టాప్ హీరోల్లో ఒకడిగా సత్తా చాటడమే కాకుండా.. దేశ విదేశాల్లో సైతం ఫ్యాన్ బేస్ ఏర్పాటు చేసుకున్నాడు.
అటువంటి ఎన్టీఆర్ కు పాతికేళ్లుగా ఒక కల మాత్రం కలగానే మిగిలిపోయింది. హీరోగా కెరీర్ ప్రారంభమై ఇన్నేళ్లు అవుతున్నా ఎన్టీఆర్ ఇప్పటివరకు ఒక్క ఇండస్ట్రీ హిట్టు కూడా కొట్టలేకపోయాడు. ఎన్టీఆర్ తర్వాత వచ్చిన రామ్ చరణ్, ప్రభాస్, అల్లు అర్జున్ వంటి హీరోలు ఇప్పటికే ఇండస్ట్రీ హిట్స్ త‌మ ఖాతాలో వేసుకున్నారు. కానీ ఎన్టీఆర్ కు మాత్రం అటువంటి ఛాన్స్ రాలేదు. స్టూడెంట్ నెంబర్ 1, ఆది, సింహాద్రి, రాఖి, యమదొంగ, అదుర్స్, బృందావనం, టెంపర్, నాన్నకు ప్రేమతో, జనతా గ్యారేజ్, అరవింద సమేత వీర రాఘవ ఈ సినిమాలన్నీ ఎన్టీఆర్ కెరీర్ లో భారీ విజయాన్ని అందుకున్నాయి. బాక్సాఫీస్ వద్ద అనేక రికార్డులు తిరగ‌రాశాయి. కానీ ఇండస్ట్రీ హిట్ మాత్రం అవ్వ‌లేదు.
2022లో వచ్చిన ఆర్ఆర్ఆర్ చిత్రం ఆల్ టైం ఇండస్ట్రీ హిట్ గా నిలిచింది. కానీ దర్శకధీరుడు రాజమౌళి తెరకెక్కించిన ఈ చిత్రంలో ఎన్టీఆర్ తో పాటు రామ్ చరణ్ కూడా నటించాడు. ఈ సినిమా విజయంలో ఎన్టీఆర్ పాత్ర ఎంత ఉందో రామ్ చరణ్ పాత్ర కూడా అంతే ఉంది. అందువ‌ల్ల ఆర్ఆర్ఆర్ ఇండస్ట్రీ హిట్ అయినా కూడా ఎన్టీఆర్ లెక్కలోకి రాలేదు. ఈ నేపథ్యంలోనే సోలోగా ఇండస్ట్రీ హిట్ కొట్టాలని ఎన్టీఆర్ ఎప్పటి నుంచి కల కంటున్నాడు. ఆ కల తన రాబోయే చిత్రం దేవరతో తీరుతుందని ఆశ‌ప‌డుతున్నాడు.
కొర‌టాల శివ ద‌ర్శ‌క‌త్వంలో రూపుదిద్దుకున్న మాస్ యాక్ష‌న్ డ్రామానే దేవ‌ర. ఇందులో ఎన్టీఆర్, బాలీవుడ్ బ్యూటీ జాన్వీ క‌పూర్ జంట‌గా న‌టిస్తున్నారు. బాలీవుడ్ హీరో సైఫ్ అలీ ఖాన్ ఈ చిత్రంతో ప్ర‌తినాయ‌కుడిగా చేస్తున్నాడు. రమ్యకృష్ణ, చైత్ర రాయ్, షైన్ టామ్ చాకో, శృతి మరాఠే, శ్రీకాంత్, ప్రకాష్ రాజ్ త‌దిత‌రులు ఈ కీల‌క పాత్ర‌ల‌ను పోషిస్తుండ‌గా.. అనిరుధ్ రవిచందర్ సంగీతం అందిస్తున్నాడు. ఎన్.టి.ఆర్ ఆర్ట్స్, యువసుధ ఆర్ట్స్ బ్యాన‌ర్ల‌పై నందమూరి కళ్యాణ్ రామ్, సుధాకర్ మిక్కిలినేని, కొసరాజు హరికృష్ణ సంయుక్తంగా నిర్మిస్తున్న దేవ‌ర సినిమా రెండు భాగాలుగా రాబోతోంది.
దేవ‌ర ఫ‌స్ట్ పార్ట్ 2024 ఆక్టోబ‌ర్ 10న తెలుగు, త‌మిళ్‌, మ‌ల‌యాళ, క‌న్న‌డ, హిందీ భాష‌ల్లో విడుదల కానుంది. ప్ర‌స్తుతం ఈ మూవీ షూటింగ్ హైద‌రాబాద్ లో శ‌ర‌వేగంగా జ‌రుగుతోంది. దేవరతో ఇండస్ట్రీ హిట్ కొట్టాలంటే ఎన్టీఆర్ బాక్సాఫీస్ టార్గెట్ దాదాపుగా రూ. 2 వేల కోట్లు. ఈ టార్గెట్ ను అందుకుని ఎన్టీఆర్ తన క‌ల‌ను నెర‌వేర్చుకుంటాడా.. లేదా.. అన్న‌ది చూడాల్సి ఉంది.