Sputnik V Vaccine: భారత్ లో సింగిల్ డోస్ స్పుత్నిక్ లైట్ వ్యాక్సిన్ ను అందుబాటులోకి తీసుకొచ్చేందుకు ప్రయత్నాలు జరుగుతున్నాయని భారత్ లోని రష్యా రాయబారి నికోలాయ్ కుడషేవ్ అన్నారు. ఇప్పటి వరకూ భారత దేశంలో రెండు డోసుల వ్యాక్సిన్ లే అందుబాటులో ఉన్నాయి. కోవాగ్జిన్, కోవిషీల్డ్ వ్యాక్సిన్ లు ఇప్పటి వరకూ అందుబాటులో ఉండగా తాజాగా రష్యాకి చెందిన స్పుత్నిక్ – వీ టీకా కూడా మార్కెట్ లోకి వచ్చేసింది. ఇప్పటికే తొలి విడత కింద లక్షన్నర డోసులు ఈ నెల 1వ తేదీన భారత్ కు చేరుకోగా నేడు రెండవ విడతగా మరో 60వేల టీకా డోసులు ప్రత్యేక విమానంలో హైదరాబాద్ లోని శంషాబాద్ విమానాశ్రయానికి చేరుకున్నాయి.
ఈ సందర్భంగా రష్యా రాయబారి నికోలాయ్ కుడషేవ్ మాట్లాడుతూ కోవిడ్ ను సమర్థవంతంగా ఎదుర్కొవడంలో స్పుత్నిక్ వీ వ్యాక్సిన్ మెరుగ్గా పని చేస్తోందని అన్నారు. కొత్త వైరస్ రకాలపైనా ఈ వ్యాక్సిన్ పని చేస్తుందని తెలిపారు. కరోనా మహమ్మారిపై పోరులో ఇరు దేశాల మధ్య దైపాక్షిక సహకారం పటిష్ఠంగా ముందుకు సాగుతోందన్నారు. భారత్ లో వ్యాక్సిన్ తయారీని దశలవారీగా ఏడాదికి 850 మిలియన్ డోసులకు పెంచేందుకు సన్నాహాలు జరుగుతున్నాయని తెలిపారు.
భారత్ లో స్పుత్నిక్ వి వ్యాక్సిన్ తయారీ, పంపిణీకి హైదరాబాద్ లోని డాక్టర్ రెడ్డీస్ ల్యాబ్స్ రష్యన్ డైరెక్ట్ ఇన్వెస్ట్ మెంట్ ఫండ్ తో ఒప్పందం కుదుర్చుకున్న సంగతి తెలిసిందే. డాక్టర్ రెడ్డీస్ కు మొదటి విడతగా 1.5 లక్షల డోసుల స్పుత్నిక్ వి వ్యాక్సిన్ ఈ నెల 1వ తేదీన దిగుమతి అయ్యింది. వాటిని పంపిణీ చేయడానికి హిమాచల్ప్రదేశ్ రాష్ట్రంలోని కసౌలిలో ఉన్న సెంట్రల్ డ్రగ్స్ లేబొరేటరీ ఈ నెల 13న అనుమతి ఇచ్చింది. ఈ క్రమంలో టీకాల పంపిణీ కార్యక్రమానికి డాక్టర్ రెడ్డీస్ శ్రీకారం చుట్టింది. డాక్టర్ రెడ్డీస్ లో కస్టమ్ పార్మా సర్వీసెస్ వ్యాపార విభాగ అధిపతి దీపక్ సప్రా స్పుత్నిక్ వి తొలి డోసు తీసుకున్నారు.
#WATCH | N Kudashev, Russian Ambassador to India to ANI says, "Sputnik V is Russian-Indian vaccine. We expect that its production in India will be gradually increased up to 850 million doses per year… There are plans to introduce single-dose vaccine soon in India-Sputnik Lite." pic.twitter.com/IW5Kb8LrE0
— ANI (@ANI) May 16, 2021