అక్కడ ఇద్దరూ ఫెయిల్ ! ఇక్కడైనా మళ్లీ సక్సెస్ అవుతారా?

ఆ భక్తుడికి ‘దేవుడు ‘ వరం ఇచ్చేశాడట.ఇక సినిమా తీయడమే తరువాయట..ఈనాటి తాజా వార్త ఇది.ఇప్పటికే ఆభక్తుడెవరో …ఆ దేవుడెవరో పాఠకులు కనిపెట్టేసివుంటారు.

అవును మీ ఊహ కరెక్టే!ఆ దేవుడు పవన్ కళ్యాణ్ …భక్తుడేమో బండ్ల గణేష్ బాబు!పవన్‌ ని తన దేవుడిగా ఎప్పుడూ చెప్పుకునే బండ్ల గణేశ్‌ ముచ్చటగా మూడోసారి పవన్ కళ్యాణ్ .‌తో సినిమా చేయబోతున్నాడట. ఈ విషయాన్ని గణేష్‌ తన అధికారిక సోషల్‌ మీడియా అకౌంట్స్‌ ద్వారా ప్రకటించారు. ‘నా బాస్‌ ఓకే చెప్పారు. మరోసారి ఆయనతో కలిసి పనిచేయబోతున్నాను. నా నెక్ట్స్‌ ప్రాజెక్ట్‌ ఆయనతో చేస్తున్నాను. నా కలలు నిజమయ్యాయి. నా దేవుడు పవన్ కళ్యాణ్ .‌కు ధన్యవాదాలు’ అని మెసేజ్‌తోపాటు పవన్‌కల్యాణ్‌తో ఉన్న ఫొటోను షేర్‌ చేశాడు.ఇప్పటికే ఆయన పవన్‌తో కలిసి రెండు సినిమాలను చేశారు.

‘తీన్ మార్, గబ్బర్ సింగ్’ వంటి సినిమాలకు బండ్ల గణేష్ నిర్మాతగా వ్యవరించారు.తీన్‌ మార్ సినిమా ఫ్లాప్ టాక్ తెచ్చుకోగా.. గబ్బర్ సినిమా మాత్రం సూపర్ హిట్‌గా నిలిచింది.వీరి కాంబినేషన్‌లో ఎలాంటి సినిమా తెరకెక్కనుంది..? ఎవరు డైరెక్ట్‌ చేస్తారు..? అనే అంశాలు ఇప్పుడు పవన్‌ అభిమానుల్లో ఆసక్తి కలిగిస్తున్నాయి.

పవన్ కళ్యాణ్ ని నా దేముడు అని అన్ని వేదికల మీద చెప్పుకునే బండ గణేష్ రాజకీయ రంగప్రవేశం చేసేపుడు మాత్రం కాంగ్రెస్ వైపు వెళ్లిపోయారు .పవన్ కల్యాణ్ కి జనసేన పార్టీ ఉన్నాబండ్ల గణేష్ అటువైపు చూడను కూడా లేదు.పైగా పవన్ కల్యాణ్ ఏ పార్టీ వారి పంచెలనయితే వూడ కొడతానన్నాడో అదే కాంగ్రెస్ పార్టీలో స్టార్ క్యాంపైనర్ గా బండ్ల గణేష్ పనిచేశారు. కాంగ్రెస్ పార్టీ టిక్కెట్ రాక ముందే ఎమ్మెల్యేగా తాను ఎలా అసెంబ్లీలో ప్రమాణ స్వీకారం చేయబోతున్నాడో బండ్ల గణేష్ ఒక టీవీ షోలో డెమాన్స్ట్రేషన్ ఇవ్వడం పెద్ద కామెడీగా మారింది .

అప్పట్లో బండ్ల గణేష్ ఏ చానల్ ఇంటర్వ్యూకు వచ్చినా మీరు మీ దేవుడు పార్టీలో కాకుండా కాంగ్రెస్ లో ఎందుకు చేరారనే ప్రశ్న ఆయనకు ఎదురయ్యేది.ఆ ప్రశ్న అడగనంటేనే ఇంటర్వ్యూలకు వస్తానని బండ్ల గణేష్ షరతు పెట్టిన సందర్భాలు కూడా ఉన్నాయి. అయితే విధి వక్రించి బండ్లగణేష్ చేరిన కాంగ్రెస్ పార్టీ తెలంగాణలో అడ్రస్ లేకుండా పోయింది.బండ్ల గణేష్ కి కనీసం కాంగ్రెస్ పార్టీ టిక్కెట్ కూడా దక్కలేదు .ఇక పవన్ కళ్యాణ్ జనసేన పార్టీ కూడా ఆంధ్రప్రదేశ్లో తుడిచిపెట్టుకుపోయింది పవన్ కల్యాణ్ పోటీ చేసిన రెండు స్థానాల్లో ఓడిపోయారు.ఇలా రాజకీయ రంగం లో విఫలమైన ఈ దేవుడు ..భక్తుడు మళ్లీ ఒకటై సినిమా రంగంలో తమ అదృష్టాన్ని పరీక్షించుకోనున్నారు.